DE:LUM  DOPPIYONG

                                                                                                            Tuladoi Pa:yeng Taíd

    Díkong  do:lu:lokké Déntaiké De:lumbí doppiyongo:la dokír-dopaggém dola dungai. Dépé dokín-domín dotíla Dumai  dumpérbí dakrobla De:lumé démpérung démto. Dépé démdodém De:lumbí dukpítsupé dugdodém Do:la do:lu:pé dugangkang. Duga:la Do:la do:lu:dok Dénuké dungkodo  dugangkang. Démpé dugla duga:la dologom donam dopa:ma:la dotíng doyotpé doddom dotí:sumangai. Dépila De:lumbí dogo donamo:ém dolí:la dokeretsula daktog dagdu:pé dakorém daglídagai. Dolíng doyod dolí:la dopénamésong dopéma:namésong dola dotursula dodungai. Dépila dungko:do du:la:mangai. Du:la:ma:la dunggo: dunggo:la du:dungai. Dépé du:dom De:lumbí dogo: dogo:la Damroto:pé dogongkapé dakropkang. Damropé dékpí:la Dírbumké dungko du:tí:dolo déga:la du:mínto. Dépidodém Dírbumké Dumbi:mé dékríksuto. Dolo De:lumbí Dumbi:mé Dékríksuge:kula dugbosulangkula  Díkong do:lu:pé dugbosukangku. Dugbosulangkula Déntaiké dungkolo du:bo dagbosula du:ledbosutoku. Doggarké De:lumbí doppiyongémsin doptokuma. Donamémsin dobu-dolusula dotokuma. Délokké De:lumbí Dumbimé du:bo   dagbosulangkula dodílo donamémsin dokangku odokké dokinna:sin donamémsin dobosula dungkangku.