DO:LUNG MO:LUSÉ:M NAPÍ-NARÉMONAM LÉGAPÉ AGER TARONG

      Nirmol Perme:

Siro ngo mé:padungku leke tani:lok lunam agomsém-Ngolu sí:lung aralo sí:sala donam-tínam légangé adjokosin ngasodém pa:tomang,anu-anu bírduglo anu-anu a:yé-apíémbulum to:dí-to:dílo dopatíla dungai.Naréné ésar oksijenémbulum dodungai,ansíngo:né ésarémbulum pa:dungai,pa:tang asi,a:né-a:bulok asisém tílídagdoloi tídungai,tídaggom oko kinamésin a:mangai.Su:pak se: mo:dinné kinlam to:díso ka:bégdung takam tani:lok mé:dír ngasodém,lené miksíko díla kapnamém.Donam-tínamsokké ager-gertínsukolopé,kémoné ayírsokké longé ayírlopé ,tedla dungkosokké dagla du:dagdolpé ngasodémo: ka:bégdung.Siro se: tani:é émna lusuné ,appíngémyam kinné-pa:né émna mé:suné a:íké í:rgang légapé molennam milennam mo:lungdé,mojarné mo:pí mo:lusém mo:yudlíkpé émna idung.Édémpila aso-asopé sé: mo:písé kémo jíng-jínga:dung.

    Do:lung Mo:lung napí-narémonam légapé bottéru:pakné ager tarongko la:dagdo kéiké binam do:yíngkídísém kinponamdé aidag-

Ako(1)Asi Molung=Asisé takam gíturnélok yaloé.Apinsém longéko domapé du:layépé,asisém adjokosin tíma:pé du:lamang.A:né-a:bung,pa:tangkídílo naréma:né koksikídídém yoblíkla lé:la,sokgíngké tapumé lenna naréngo:la du:né asisém mobulpakdag.Sé:  asisém péyi:-péttangé déngala ,so:bo-menjek,sumyo-si:tumébulu gía:la tíngkolo kinamém a:modag odokké rammodag.

Bím mosíngkunam agerdé=Naréma:né koksikídídém asilo yoblíkpa:mayé,aimané attar lénggéngkolo yoblíkla lé:payé.Asisém napí-narépé mopula lé:payé.

Anyi:(2)Among Molung=Ngolu tani: kisapé méngkinsuma:la gejíkné mo:lulo du:né ísíngém tékpaka:mla ísíng sí:lung amolo pédong-asi kakuma:la a:ínémpiné amongé siro do:sanpakdung.Aré kané sa:tur pinbugkídídé kakumapé ila donam koksedésin siro kokpansudung.Siro takam turnéké dungko okumé kama:pé ila bulu bikér-biérdung.Siro buluké dungko amongém ímí ukpé-ukpakbomna gídung.Odokké ménggésunam mirígkídílok aríg amongém do:nyi ka:nam aba:la kamagné amongé mo:san kisapé ipakdung.

Bím Mosíngkunam agerdé-=Ngolu appíngé méngkinsugel bojeru:ngko ísíngém le:gel mo:pí mo:lusém gejíkla du:mopayé,odolopak takam turnékídísé bojeru:ngko mé:poko pa:yéku.

A:um(3) Ésar Molung=Ésarsé kama:pé imílo mo:písok du:né takam turnékídísé adjokosin turla du:mayé.Ésarsém mobulnékídídé-Gari:-motorlok lenné yogmo mikkí,botté-botténé mo:rémlok lenné yogmo mikkí odokké lambé-pédulo sorgoné dé:mígkídídé naréné ésar lédído yedlusugel ésarsém mobulpakdag.

Bím Mosíngkunam Agerdé=Ísíngém bojeru:ngko lepa:yé.Ísíngkídídé yogmopé ila sorgoné mikkí ,dé:mígkídídém ísíng anné kídídé dopakbidag.Odokké ísíng kídídé ngolum naréné ésar oksijenémbulum bidag.

Tayotolok lusarbinam a:um-nané ijubné do:yingkídísém ngolu takamé kennamdé aidag.Do:lung-Mo:lung napí -narémonam légapé ngolu rélígpé lenpayé.Lédí mokudsula du:mílo kaboma:yé.Ékéma:mílo sé: donam koksedsé aropé lékoném kokpén-kokrénpakyéku.Ngolu appíngé ansulai,sé: mo:písém mosíng-ka:silai.Do:lung Mo:lung napí-narémonam légapé sé: bottéru:pakné ager tarosém "TAKAM MISING PORIN KÉBANG"sé:m onané yila:ké(16)nané dísang longédo sé: do:lung napí-narémonam ager tarosém aginpé gerbomtíla gílai,Do:lung-Mo:lusém lodísém gejíkmolaje.