MISING LEKE DÍRBÍ MAGBO DUGNAM ODOKKÉ YAGE:SULLAD

 

MISING LEKE DÍRBÍ

MAGBO DUGNAM ODOKKÉ YAGE:SULLAD

Mg. Raju Kumar Narh

Mo:písok bangkí bangkí tani: opín-opé: lokkéi yamné dugnam-gínam-la:nam, kédan-abír bírsunam atílo aí-aíké ilod-gilod atíko atégru:pé kasudung. Édémpí:pé yamné langkurdag me:lampé du:né/juné gínam-gíkunam atí gílod alodégom aí aíké suapé kasunamém anpang-ka:pa:dag.

     Édé bangkí bangkí ope:opín kídí:dok ju:né gílod gíkampé Mising réngamkégom aí sukampí atékru:pí ju:né gíkunam gílamko kasudung.

      Lekelo Mising réngam ara:lo mímbír-yame:é ka:líg mé:líksuyemílo odokké ané-abué:sin édém tolígye:mílo magbo-dugla du:dungai édém magbo dugnam émdo. Magbo dugnamdé ato-ayo éra:dok yabnédém pa:nam léga:ngé éra:do ager gerrésula du:dag. Bík ager gernamdém ka:líg-mé:líg sumílo bím buluk omédém yamnépé bido. Émdaggom lédu lédu:pé Mising réngam ara:lo:sin bojéko anu-anuyamné gínam-la:nam do:yingé kakangku. Édé la:nam gínam kídí:dé-Sola-la:nam, dugla-la:nam, kumsu-jo:sul-lanam, odokké Midang da:la atí atí:é.

      Édémpé la:nam-gínam appí:dém Mising réngam ara:lo yamné la:nam-gínam émdo. Yamné la:sa:dag longkondo ko:érangé ko:néng érangém lutatsukapé gído. Édém duktad gínam émdo.Édé longédém ko:néng éra:dé kédan-abír bírsunam léga:pé édílo adum-alag bipénampé iye:ji édé do:ying appíngém ru:ségla lulígdoku. Odo longédo ko:éra:dé adum-alíg bido:do oko oko attarém bompa:yeji édé appí:dém lupo-tausula gídoku. Odokkí kédan-abír bírsunam lédu:Pé ko:-ko:nédé ané-abu okumdo:pé gílatkunam yage-sullad manggom ju:ne/du:né émna ludo. Juné/du:né gíladokudo magbodé gonro ugon gége:la gípénampé idag odokké apong ki:líng pumsuko jo:bomna gípénampé idag. Jo:bomnam appong kídí:dém  okum koktogdo jo:la lédo. Apong ki:ling-pumsu:dém gíbokunam mímbír-yamé kídí:dém jo:bommodo. Bulum ju:né ya;me-mímbír émdo. Odok lédup:pé yumédém bulu appíngé érang-éra:lo gíla guye-pa:némsin orgo:namko kado. Odo yumédo do:lu:lok mímbír-ya:me:é gíkumsula  jun:né/du:né mímbírkokki yumé yirman-so:maném modo. Leke:lo do:lu mímbír-yame:é ju:né mímbír-ya:melok lédu:lo aipé ír-pongkírpé so:man-yirmaném monamko kadungai. Su-su:yang édé yirman so:mandé kakuma:pé idungku:bo. Odokké okolai-okolai kadunggom leke yirman-so:manlokké angu-angu:la gídungku. Édémpila lupé lumílo édébulu gu:nying-ka:nyi:né dírbípí idungku:bo. Kapéné sukké mímbír ya:me:é ír-pongkírpé so:man-yirmandém mége:la, ju:né minom kídí:dém nígre:-ba:re:la kaggu-tadgu:ma:pé inam agerém ka:padung. Édémpiné agerém gernamkokki su-su:yang ju:né minom gínam légap:pé mímbír-ya:me:ésin mala pa:mapé idungkubo.

    Mising réngamlok dírbí ara:lo édémpiné ggu:nying-pétnyi:né inam-gínam kídí:dé gía:mílo lédu:-lédupé édé leke dírbí bélamdé missing réngam ar:lokké aso: aso:pé yokpagyékubo. Sémpé ako-akopé missing dírbíé yogampé émmílo mising réngamé:sin yokpagye. Kapé émyémílo dírbí kama:mílo réngamsok turgo bélam kama:ye. Réngam turyarpé dírbí:é turyarla du:pa:ru:ye. Édémpila mising réngam ngo kumpa:dung réngam turnam léga:pé appíngé rélékpé méngkin-kangkinla appíng réngam dírbí agerém gergab-germosulai. Misng réngam írroi./missing dírbí írroi.