MÉ:DÍR MIKSI

Horish Dole:

                                 

     Lígangé émna appíngéi yírman-so:mandung. Ka:nam tani:dokké mé:potéré kama. Bértupsukodé ni:tom maksongé. Édé ara:do  Nambírbí:sin ojíng ko:dém bíge:la ni:tom mola dung. Bík milbong Ka:lombí amme mibo gogdag émna motorsaikeldém duglenbomna gíkang. 

    Yumdéng a:la síksík-mígmígdagbo. Ajon lédulo gígo:mínné Nambírké yígné Yapoli:bí aborpé jénga:la gídoku. Kaibí sikang, kaibí sikang, kaimé ga:ri dukpetto émna. Mibo ékké apong tí:bopé émna apong tonnígla du:né Nambírbí ukum ara:dokké otab-oyabla duglendo. Odolo:pé bík milbo:dok sima:dém lottado iyyé gérgérdopé jo:pagla métag. Nambírkolokké ila buluk érang tani: appí:dé ure ure émna aborpé jé:la  kaptag-ri:takkang. Do:lung taniésin dukkumsula ka:dung. Nambírké angkéng pisu  pisula milbo:dok sima:dém gonggabge:la kabnamdém ka:la appíngé ka:ra:sula:ma:pé idung. Déuoi aropésin pí:ri-pe:re ommangkídí:dém okolo kapé iyya:kun? Ayo tumbodé:lang  tumboné yaméng kumsudé  kapé ukumsém kumya:kun? Mé:la mé:satsukko kama. 

  Tatpa:nédé lígang mé:pom mépagge:la kangkolo gídung. Nambírké kabnamdém sé:kosin rotumla:ma:pé idung. Kabla kabngaksula lénnyi-léumko asi píturkunam idagbo. Tani:déi taniyémpé ima:bo. Édé appí:dém ka:la dítag appí:ko iné aodé kabdíko kabmín-ge:la ukum tunggé:do aso:pé ayangongkandopé tedla dung. Bím ka:la ka:nédéi murkong ékké bidung. Édém pa:la bí biskut rénaném béjéko pa:tung émnaisong mé:dírko ara:do koyémna yírdung. A:péné adíolok pa:pénam ngasoddém kinpí:-mé:pí:ma:né édé ko:dok angupé édé yumédo sé:kosin mé:po émnamdé katoma. Karpunpuli do:lu:dé lígang mé:pomsin pola:toma.