সম্পাদকীয় (Nébíngké Lupénam)

 সম্পাদকীয় (Nébíngké Lupénam)

Ayang Í:rdí Pakuang (প্ৰেমৰ উৎসৱ ফাকুৱা)

   Pakua:dé Bhard mo:rumlok leke:lokkébo Hindu Yelam Tani:é moírbomnam aipé mé:bonam í:rdí ako. Pakuang a:yemílo appíng tani:lok asiné i:jíg i:jígla mé:po ménganouki aki:é bí:pagdag. Mé:po ménganki aki: bí:mílo ngolum angupé donam tí:namko lagimang.  Pakua:lo ngolu appíngéi mé:dír-mé:songém, mirém-opaném, ajjou-botténém aglíng-ge:língém sapka:mínsumapé mé:pouki akoné akoném lí:né gené i:jígné(ৰঙীন) pakuang yanyo:ém(আবিৰ) manggom yanyo(i:né) yonnusunam asi:ém pirrumka:mínsula moírnam ager tarungém ido. Lí:né gené i:né pakuang yonníkkamínsu:pala ngolukké  ang-amírésin mé:pola du:dag. Appíngé lékola mé:poki pakuang yonníkkamínsu:la, ngolu édém Yanyo(i:né) Í:rdí (ৰঙৰ উৎসৱ) manggom Mé:po Í:rdí (আনন্দৰ উৎসৱ) émna ludo.

     Pakuadém ngolu angu angu aminki sémpésin ludo - Ayang í:rdí(প্ৰেমৰ উৎসৱ), Kombong í:rdí(বসন্ত উৎসৱ), Yanyo(i:né) í:rdí(ৰঙৰ উৎসৱ), Mé:po í:rdí(আনন্দৰ উৎসৱ), Polgu í:rdí (ফল্গুৎসৱ), Bírdug í:rdí(ঋতু উৎসৱ) Doul í:rdí (দৌলোৎসৱ) manggom Doul Jattra (দৌল যাত্ৰা) atí atí.

     Doul í:rdídokké leke: lukéng do:yingé bojerungké kadung. Odo ara:ngí:do Krisho (কৃষ্ণ) ké la: Radha(ৰাধা) ké aro ayang agod do:yungé kadung. Krishoké lang Radha ké do:ying kímíloi ngolu ayang agod-é émna mé:do. Émpila pakua:sémsin isorké binam aro ayang í:rdí(প্ৰেমৰ উৎসৱ) émna moírdag.

    Doul dé isor Krishno (ভগৱান কৃষ্ণ) ké tetgéngé. Ginmur po:lo:lok kartang (ফাগুনৰ পূৰ্ণিমা) yumédo krishno mé doul do tedmogela Angkum ni:tom(ভক্তিমূলক গীত) mola mé:po ménganki moírnamdém ngolu doul í:rdí émdo. Odokké isor Krishno mé kumka:pé mondirdopé gínamdém doul jattrang émdo.

    Bharod mo:rumlok angu angu mimo:lo moírkampé ngolukké ohom mimo:so:sin í:r pongkírpé doul í:rdí moírnam ager tarungém ai kangkanpé moírdag.

   Ohom mimo:so Mahapurush Srimanta Sankardev (মহাপুৰুষ শ্ৰীমন্ত শঙ্কৰদেৱ) bí dítag 21 do doul í:rdí:ém molenpongka. Odok lédupé daktok ohomsok Borpeta Mo:dom(বৰপেটা জিলা) lo Mathuram Das Burha Ata (মথুৰাম দাস বুঢ়া আতা) bí doul í:rdí moírnam ager tarungém irobbomka. Édé molen ilen dokké leke: ilod gílodki silopé doul í:rdí moírnam ager tarungém itíbomna dung. Ngolu appíngéi kindag Pakuang émyemílo Hotro Lu:jar (সত্ৰ নগৰী) Barpeta(বৰপেটা) tani:é mé:po ménganki asin arang ara:bo í:r pongkírla ko:ka:lokké miné-míjíng(কেঁচুৱাৰ পৰা বুঢ়া-বুঢ়ীলৈ) lopé pakso: so:la du:dag. Doul dém aíké agomlok bulu deul (দেউল) émnasin ludag. Pakuang a:yemílo Barpeta mo:dumlo lí:né gené yanyo: la: Holi ni:tom-é (হোলী গীত) do:mír ésarlo sargo:la du:dag.

    Ginmur po:lo:lok kartang (ফাগুন মাহৰ পূৰ্ণিমা) lo doul í:rdí a:yemílo longé angngo:kopé moírnam ager tarungém idag. Édém ngolu ya:me doul (ডেকা দৌল) émdo. Odokké Gallíng po:lo:lok kartang (চ'ত মাহৰ পূৰ্ণিমা) lo a:yemílo longé aumkopé moírnam ager tarungém idag édém ngolu míjíng doul (বুঢ়া দৌল) émna ludo.

    A:poné longédém gundo jattra (গোন্ধ যাত্ৰা), annyiné longédém bor doul (ভৰ দৌল) dokké aumné longé dém (সুৱেৰি অৰ্থাৎ ফাকুৱা) pakuang émna ludo. Pakuang agom dém aba: ba:nyi agomoulok adamlamang. Ara:pé gasum agomé bojeko kadung. 

     Ékédag dékédag Pakua:sé aropakkpéi ngolukké mé:po í:rdíko manggom Ayang í:rdíko. Kapila:né odo longédo ngolu aí:kangkiném mépaggela appíngé lékola pakuangém yonníkka:mínsudo. Sé:koi akoném bojeko pakuang yanyo:ém (আবিৰ) yonnígdaggom aglí:sa:mapé yirra yirra yonka:mínsu:dag.

    Léddarpé Pakua:sok lí:né-gené, yasi:né-yakané yanyo:é kapé kangan ka:yumoudagji édémípé tani: asin kídísé:sin geyom geyomla kangkan ka:yumla, mé:po ménganna, léko lakkola du:téika émna mé:lígdung. Sa: Aipai.

     Tapan Lal

Nébíng (সম্পাদক)

Doksiri দকচিৰি