Nébíngké Lupénam (সম্পাদকীয়)

Ager Gerném Aya:mané Oko Mo:rumésin Mirém Rémlamang

( শ্ৰমিকক শ্ৰদ্ধা নকৰা কোনো এখন দেশেই উন্নত নহয় )

   Appíngéi mé:dag gerpénam agerém bérokpé adí:ém ka:la gerbídnamdé airuné ageré. Sékké okum éra:lo ager gerjo pajoné du:doji buluk okum érangé mirém rémla du:do. Kinné kinmané appíng tani:ké nappa:lo ngolu lo:dísém tadbektílai du:dag opan mirém do:yingém. Bulu mirémé ngolu opané, ngolu ajjouné taniyé. No:sin édémpé mé:la du:mílo airupéi mé:míurdung. Opan mirémdé ngolukké otélígnammang édém angupé lubipénam kamang. Opan mirémdé ngolukké gernamlok ager arré:pag. Sé:ko ménggabla agerém gerdído gerdoji bí mirémdo bí mé:po méngando. Adíém ka:la ager gerné tani:é édílosin opan ki:panmang, sé:ko lo:si lo:bagdagji, gerpén agerém germa:pé du:modsula du:dagji bí:pag tukunang pétolok émdo. Ngolu appíngéi mé:do ammemyang ajjoukodaggom aíwé ai kangkanoupé du:yapé, génam-bomnam, donam-tí:nam, ma: murko:lopé dokkésin se:ra: pati:lopé ammemyang istayilo:ko moyapé. Ka:né tadné ka:bo mé:bodopé. Édé appíng ménamdéméi ngolu ila:dag émpigel édé atéro:lok agermang. Nok lamku kérapé, kekon kesakpé gerdum ka:dumsunédok ager gerné tani:dok ayang arré:pag. Ngo okkom lupé mé:duji édém nolu kindungéibopé - aipé aila mí:po sakpola du:pé ngolum ménggésunam tani:lok aro ayangko lagirudag. Édé ménggésunam tani:dé bottaru:né officer tok manggom ajjouno, longé-yumé donamdok légangé ager gerrasuné tani:tok. Ngolu bím mikjém daggom ménggésunamko kapa:ye, mé:tinsunamko kapaye. Édé ménggésunamdé okolokké a:yen ? Bík gernam ager tarung, agom lulod, du:lod daglod atí atí ainé agerkídídé mé:tinsunam tani:lok aí kangkin kangga:é. Édémpiné ainé asin géné tani:dém ngolu aya:ru:payé, mé:tinrusu:paye. Kapilané bulu ammem néla pala ayirém mopid moridmang, aíké gerpénam agerém gerdí:do gersudag. Émpila édémpin tani:kídídém mo:písok mirémyapagné tani:é émna ludo. Bulu ngasodlok mé:dír-mé:songémsin medlígla mé:pola yirra du:ladag.

       Opan mirém, mé:po mé:dír; ager atung do:yingém lula du:dagdo ngokké aro lupénam do:yidé du:pagéidung. Min-gé aminsém ka:la kindungéibo aya:lokké éddíko aré:é du:ji. Ngolu appíngéi kindag Bharod mo:rumsé rémsa:né mo:rumé émna. Rémsa:né mo:rumlok ngasotkídídé - appíng tani:kídídok aték murpangkídídé ajjo:nam, tani: bojenam, ager pa:mané atí atí. Ékédag dékédag bharod mo:rumsok bottaruné ngastko "Brain Drain" misi:pé bérokpé lumílo Aíké Pínnyo kopaksu:nam émnasin lulado. Kapila:né ma murkongém murpaggela aidopé bottapé poriné kídíngém bulukké ager arrém bilama:la bulu aíké ijo:mojosu:nam ager aré:dém mala angu mo:rumlopé gípagdag. Ngoluk bharod mo:rumsé mirémné mo:rumlokkémyang appíng ager atu:lo pagya:né kinné pa:né bojerungkoi dung émpigela bulum buluk ager aré:ém bimanamkokkí bulu amiké mirém mo:rumlopé gípakpénampé idag. Édé ngolukképé aima:runé agomé. Arodém lukapé gímílo ngoluk bharod mo:rumsé supaglopé opanna du:nam léga:dok édé bottaru:né légangko.

    Ager gerné émyemílo ngolu longédok gerrasuné aré:dém murko:pé la:né kídídém mé:dag. Édé ngolukké mé:muré. Édémoung ngolu ager gerné émmang. Mo:rum akolok ru:tum lukanpé "Prime Minister dé:sin ager gernédok tani: ako. Ake: tani:ém ngolu ménggésukampé ager aré:ém bila aya:dag dokké akedém édílosin aya:ma, édílosin méngésumang. Bulum luyom lupola ti:né ku:né bila bala du:dag. Su:sin ngoluk Bharod mo:rumsoggí:kémpin rémsa:né mo:rumé ager gernédok aro ager aré dokké aya:la ménggésunamko kamala silopé édé mo;rum kídídé opanna dung. Édílopé ngolu aío:ké légangoupé mé:suma:pé ajjouné rikshaw dugné, tela ní:né, kuyab tagné tani:kídídémsin bottan ager gerné tani:kídíngídokkémpé ménggésula aya:mayeji odolopé ngoluk bharod mo:rumsé mirém rémlamang. Kai agerrok ajjo botté sapka:mínsumapé appíngé ayangka:mínsula léko lakkopé du:lai.

     Léddarpé Mo:pí Ager Longé(আন্তৰ্জাতিক শ্ৰমিকদিৱস) sok ager gerrín ang asinki appíng gerné ope:ém asin aséngko asélígdung. Sa: édébo:

Tapan Lal