SIBE: BUTSIÉ KAPILA LÍNGKAN?

                       Horish Dole:  

      Abutani:bí:la sibe:kídí:ngé ainé ajonai. Bulu ongo sagabnamlokké ila apí-a:yé matanamlo:pé lékopé idungai. Tani:méyam sibe:kídí:ngé épug abnamém pagya:dungai. Buluk iy:-épugdém abung ru:yi:dok sungkenkolo mésí:dungai. Longékoném Tani:kéla sibe:kídí:dok ara:lo aglí:munsunamko lenkang. Tani:bí lomdanna dugla sibe:kídí:dok iy:-épukkídí:dém tíkumsuge:la ríbíkokki rakpumsuto. Odokké bí bík iy:-épugdém la:sangge:la sibe:kídí:dém ako akopé abbomkang. Odo sibe:kídí:dé:gom appé émna idodo buluk iy:-épukkídí:dém po:pébo okpumsula lé:tung. Édémpikodo, aogamné sibe:koné yumrang sungkenkolo lé:sula dungge:la Tani:mé albiya:dok apto. Édémpé abgésuge:la sibe: aodé odokké dukpakkang. Édé sibe: aodé be:nékai. Bí lédudo atéro:pakkang odokké béttékang. Longékoném bí ésarkokki ao gékang.  Odokké aoko oto. Odokké lensedla aso: aso:pé longékoném béjéko ommangé lenkang. 

     Béjé dítag lédupé Tani:bí sibe:kídí:dém longékoné ríksuto. Odo bí ísíng nala dungngai. Bí sibe:kídí:dém bagémpé ka:pangge:la méngabla:toma. Odokké bí édémbulum lékoda akosin kama:dopé mokekupé émna mé:mi:to. Alíg líglí:nam asindokki Tani:bí bétténé arungko ngunto. Édé arung taye:do sibe:kídí:dok mé:bopagya:nam a:yékídí:dém mébito. Édém ka:la sibe:kídí:dé dolíngki gíninsukang. Odokké Tani:bí sibe:kídí:dém luto,  noluk tapongkídí:dém ésar mudla lí:moyé manggom aldiya:moyé. Odo sibe: appí:dé arungdo gíkumsukang. Tani:bí odo tayé:dokké bagémpé ímídém rompaglíkto. Sibe:kídí:dé ímí gunamdokki du:la:ma:la arung ara:do jé:tag-kutaksangkang. Lédudo appí:dé sipagamkang. Émpidaggomsin odosin ajjouné arungko pa:la sibe: aokoné dukpítsukang. Bí lékoda ommang olangkula sibeyé béjéla gíkangku. Émdaggom Tani:ké édémpé romlígdodokké sibe: butsi língkang, aipé kaptíla dungkang odokké migmodé ímí ugnamémpé ikang.