Nébíngké Lubinam (সম্পাদকীয়)

 Nébíngké Lubinam (সম্পাদকীয়)

Pu:mi Asi Élang Réngam Ngasod 

(বানপানী আৰু ৰাইজৰ সমস্যা)

Ngasdloksin ngasodé ngala ngasarsulama:nam ngasod ako asom sok pu:mi asi ngasoddé. Téyi tésa:la téla gíné asi:dé kinma:ngoupé bojérungko agomém amigdo ka:begmola yeru ruyido lupadla gíbidag tani:yé tani:ém ka:dumsupé lagidag, lo:nyio:ko turdoso aya:mínsula du:pé lagidag. Tani:yém ayangí:kampé mo:lungémsin aya:la du:bomílo mo:lung Gonggo-Sigo:lokké tani:yé anpo:pé du:lado. Mo:lungé aglí sa:mílo migyabo:lo mo:písém momík mosígla:dag.

 Me: (May) dokké Agosto (August) do:pé pédong asi lédulo réngamé pamínsu:la du:pénampé idag. Amdangém lelígyemílo pu:mi asi:é lumpagla dopadag. Amdangé ya:pagad dokké lékoda lekupénampé idag. Édémpiné ngasoddém aríg iné tani:démyang séko kin-ya:yen. Miksi:ém titsu: titsu:la kotiyang parige:la lékoda lekunamdé ajjouno sikí-silíng (কষ্ট) ager mang. Guni a:m gaddí:do minné a:m kídí:dém asi:é dopaktoka tani:é okkom dola turyen. Kumsu:do jo:sa:líkpénam a:mdém pu:mi asi:yé bidyudbomto:ka tani réngamé kapé turyen ? 

   Dítag dítaglo asomso pu:mi asi:é tani réngamsém airu:pé ngasodém a:modung. Édílai doma tí:mapé du:pénampé idung. Migom (চৰকাৰ) é léko lénnyiko ngasoddo ka:dumsunamo:dé éddíkonu ngasarsu:la du:modang.

 

  Díyu bírdugé tani amírém gusi guyagmola le:né angkirém bidlenmo:la pédong bírdug adí:ém lukanbidag Pédong bírdugé a:dung dungko dakko, lamté-pédu:ém ai kampo:pé mosisuto ngasodlokké ngasarsu:la mé:po sakpo:la du:tok. Lutadnobinamdé mo:lungké ayangé. Mo:lungé édílosin tani:ém néla pala mokelebnam do:yungém mé:mang. Tani:ém ansu-kinsu:monam légangé dítaglo léko manggom édílai édílai mo:lungé mo:pí:sém lukanbidung Édílai pédongki, édílai ésarki; édílai pu:mi asi:ki dokké édílai taromo:tonki. Mo:pí:sé la: mo:lungsé anguru:né atta:rmang. Akondé akonké turjoné, akondé akonké ajoné. Odo ara:do aíké turyingo:dok légang mé:suné turné ope:lok kinyangarné émna tonam tani: ope:dé aíké dungko dakko kagéma:la lo:dím mo:lu:sém mopen morenbomna gídung. Lukanpé ísíngém téksodla, adi:ém banpenna dungko okumém mopénampé idung. Migom ope:ésin adi ílíngém démpor démyorla botta botta:né industry-ém mobomdung. Aí légangé mo:lu:sém mopenpé mé:namdé aropakpéi ngolukké bottaru:né mé:muré.

   

   Ngolukké aíké imur gímurki silo millenam pu:mo (কৃত্ৰিম বানপানী) é bottaru:né ngasodém a:modung. Ngolukké aíké imurnam agerkírí:dok arrém silo pa:sudungku. akon asakké imurnamki silo ngasod ara:lo turra du:pénampé idung. Pu:mi asi (বানপানী), Mo:yag(ভূমিস্খলন) émpiné atí atí mo:lung Gonggo-Sigo:é (প্ৰাকৃতিক দুৰ্যোগ) a:yemílo tani: réngamé bojérungko ngasoddag. Édémpiné mo:lung Gonggo-Sigo:lo édílai tani:ésin sila aipé mé:dír ngasodém a:modag. 

   Dítag dídaglo ngolukké asom so pu:mi asi:é rago: ko:yagbomna tani:lokké dungko dakko kagéma:pé idung. Dungko okumém bitpen bidrenna bidyudbomdung. Aríg inam amongém rago ko:yudbomdung. Longé longé:do among ísíng yogabomna gídung. Dítag dítaglo pu:mi asi: bidnamém ka:pang-gela:sin asom migomé (অসম চৰকাৰে) silopé ngasodok ngasarsuko tarungko ru:lennama:namdé airu:pé mé:dírpénam do:yingko.

 

    Siyum siro mo:lung Gonggo-Sigo:émyang millenam pu:mo asi:ém pésoyapénampé idung. Guwahati bomje Lu:jarlo (গুৱাহাটী মহানগৰ) millenam pu:mo (কৃত্ৰিম বানপানী) é aipé tani: réngamém sikí-silí: (কষ্ট) la doma tí:mapé du:nam moimangém ngolu news, kakod atí atí lo ka:begdung. Ngolukké réngam ara:sokké kinné pa:né lusuné tani:kídíngé:dé aíké yekéng kídí:dém aimang aiman dorug tí:ruk plastigémpin atta:r (প্লাষ্টিক জাতীয়) kídí:dém yobjer yobyernamdokki yekéng kídí:dé leterapa:gdag. Amo lédulo ya:mínman atta:r kírí:dé édémí:pé du:pagdag. Édílai yirrípé:sin méngkandag édé agerkídí:dém kinné pa:né (শিক্ষিত লোক) kídíngí:dé gerdag. Édílai bojeko pédong obadmíloi (প্ৰচুৰ পৰিমাণে বৰ্ষাপাত হলেই) guwahati bomje lu:sarso pédong asi:dé millenam pu:mo pé idag. Odo:dan migomém ge:nam (চৰকাৰক গালি শপনি পাৰা) dém ka:labongka. Odogmílo migom tani:kídíngí:dé yekéngkídí:dém ya:jer dopé du:lang émna lutungarnampé.

   

      Ngolu migom ope:ém appíng agerém ní:jemlígma:pé aíwésin ngasotkídí:dém ngasarsunan ager tarungko ru:lennayenéi édém mé:pé lagiyepé. Odopak ngolukké ngasoddé yogyé. Migomé aíké gerpénam agerém gerbomsudung. Pu:mi asi a:yemílo ka:dum-bidumsu:dung (সাহায্য). Émdaggomsin mé:dírpénam agomko dung. Migomé silolo:pé pu:mi asi ngasoddok ngasarsuko bélamko la:lennama:namdé migomé aíwém molama émna léngkansunamé ( আজি পৰ্যন্ত বানপানী সমস্যাৰ স্থায়ী সমাধান উলিয়াব নোৱাৰাটো চৰকাৰৰ এক দুৰ্বলতা). Ngasod a:yemílo ka:dumsunamo:dém ainé ager émmang. A:péné longé kídí:dok ainé bélam léngkannamdé:pak ainé ageré.

Tapan Lal