SILOKÉ TANIYÉ MURKONG PAGBOÉ

Horish Dole:

     Sé mo:píso tani:ké turnamsé longngém longépé nérgidbomya:la gídung. Édémpé imonédé tani: béjéla gínamsé. Taniyé éddíko béjéla gídu:ji odogíngkíddíko akoné akoném asin-a:ng obosunamdé kama:pé ila gídung. Silo taniyé okodém aipé mé:yéji odokké okodé agerro a:yéji édémo ai-kangkanpé ka:sí:-mosí:dag. Tani:ké agerro a:ma:né takam atíé silo mo:písokké aso: aso:pé yoga:la gídung. Édémpila lékoném lukandag, Ru:nébí bík ru:namlok ru:murpagya:nam turné atídé tani:sé. Taniyépag Ru:néké sé gesi-geyomné mo:písém mopid-moriddung. Silo taniyé kinbo:sula aíéméi Ru:nékémpéi mé:sudung. Tani: ara:lo akoné akoném pagban-ya:nam légangé apke-mokemunsunané attarém molentíla dung. Odokké abmunsutíla dung. Appíngéi béjédém lagidag. Béjéko pa:nam légangé silo tanií:ngé tani: léga:pé amig takotpé idung. 

     Siloké adíso turné takamlok pagbanpagya:né émna taniém ludo. Émpidaggom édé pagban-ya:né tani:démsin so:moné atíko kadung. Édé tani: appíngké mé:bonam murko:dé. Siloké taniyé éddíkoi aíém pakkíné émna mé:sudaggom silok taniyé murkong pagbopé ibomdung. Bím pa:nam légangé aí-adin taniémsin kangkinmunsukuma:pé idung. Silok taniyé murkong kanédéméi péso-ménggédag. Émpige:la édé murkong kané tani:dé murko:dém kapé pa:tu:song édémsin méngka:la ka:ma. Sé:kai doppiyo:la manggom ammem yadla murkongko kadogom édémsin luko-lunyíngko luma:yé. Bí kapéi idogom murkongdé kamíloi aidag. Kapila émyémílo adíséi murkong adípé ikang . So murkongé kayémílo ayangésin réla:dag. Mé:bonamdém pa:la:dag. Édémpila Tanié silo éddíko pagdagji murkongém mé:bodag odokké tani :ké édé asindé aso: aso:pé béjéla gínamé tani:ké mé:lod-gílodésin longngém longépé angula gídung. Silo sé:kai aí tani:ko ngasoddung émdaggom murkong légangé iko-gíkolo kapé idun émna tadmunsunané adíkosin kama. Aro ayangé, adinsin omínsunamé aso: aso:pé yoga:la gídung. Kapila émyémílo aya:démya:m murko:dé longngém longépé aré kaya:la gídung. Pa:mílo murko:dém sé:komsin sé:kosin ménggékuma.

   Ka:mi:la ka:yémílo siloké taniyé kin-ya:la gídu:yé ma  aso: aso:pé murkong pagbopé idu:yé.? Aí tani: légang mé:sunamdém mége:la akon-asagé murkong légangé méngkolo aíké amírdémsinéi moyeksuma. Émyém aroru:péi silo taniyé murkong pagbopé ibomdung.