সম্পাদকীয়

 (Nébíngké Lupénam) সম্পাদকীয়.....

Sí:sang Ope:ém Ainé Lamté Léngkannamdé Abín kídí:dok Ageré 

(যুৱ প্ৰজন্মক সু পথ দেখুওৱাটো জ্যেষ্ঠসকলৰ কর্তব্য)

   Ngolu appíngéi aí aí:ké ager atu:lo mo:ma:pé agerém gerra du:pénampé idag. Lekkem aíké agerém, aíké mé:lodém méngge:lasin réngam léga:pé, akon asakké ainam légangé ainé ainé mé:lotki abíné ope:é luyirém lula, ainé ager-lamtém léngkanna:n ayirko:sin pa:dungai. Je:rang petke:mínsul du:daggom kumrí do:ríé léko:la ngasodlo ka:dum modumsudungai. Su: édébulu ajjouko yoga:dunémpé idag. Po:pé sémpin tani:ésin dungai - o:kai ngasodé a:yem aíké agerém mégela amiké léga:pé i:ém bidungai. Édé tani:kídídém ru:né píné:mésin ayyaru:né tani:é émdungai.

    Ka:dum idumsunamdé ainé tani:lok agodé. Sikí-silí:la du:daggom sékkai ngasod agomko tatpa:yem édé tani:kídí tedla du:rasulamang. Édílopé ngasodné tani:dé ngasarsuma:ji odolo:pé bík asindo mé:po a:mang. Ngasodné tani:dok mé:podéi ainé tani:kídídok mé:po:é. Ammem ka:dumsuyém ru:né píné-bí sin édé tani:dém ka:dumsudag émna appíng tani:éi ludag. Appíng tani: lunamdéi ru:néké lunamé. Ru:né pínébí tani: asin ara:lo du:dag émna pinnyo kané bottané tani:ésin lugéla gíkang.

   Su:k adí:sé po:pékémyang bojerungko angukangku:bong. Ayir lédulo dugmínna gíkolo tani:kídísé sé:kosin sé:komsin bérratsula nge:latsunané ka:tokumabong. Aíwongké légang méngkolo aíké ojonsunam bíro bírmangémsin ka:dumsukuma:nam aiman adí:kosin su: a:dung. Édé okum éra:lokképé aimaru:né virus-é. Ka:dum idumsunamlok su:paksin amiké ope:émyang ngoluk mising ope:sé ayya:la dung. Édém édílosin yogmopé lagima:ye. Appíngképé ayirsé lékko:dag. Kinné pa:nékídí:dé aíké ager arangí:do réngam agerko, sé:kaimé ka:dum idumsunam agerko idag. Édém ikolo ngolukké angupé okkosin murpagmang manggom angupé ayirko lagimang. Asindé narémíloi appíng agerém gerra:dag.

   Anu-aku adí:sok angumínsu:namkídíngém su:k sí:sané ope:é ayyopé kanggabla dakorém korríkkinma:pé idung. Édé réngamképé, a:péné longékídí:dok léga:pé aimaru:né agompé iye. Émpila abín ope:kídíngé aíké aré kané ayirdok ajjoukodaggom la:lengela sí:sang ope:yém luyirmílo ngolu a:péné longékídí:do ainé anu mo:píko pa:ye.

Tapan Lal

Nébíng, Doksiri