সম্পাদকীয়

 

Nébíngké Lupénam সম্পাদকীয়…..

Digital Mé:lod (ডিজিটেল চিন্তা)

     Silo ngok méngkamardémpé agerdé kabotomang. Ngo supag kapé iya:n ? Ager ako:dog léga:ngé Mé:mi: mé:mila mé:motsuna:n ayiré su: katokumabong. Po:pé tani:é tani:ém asin omínsu:la gíka:mínsu:la asin do:yingém kíbosudungai. Ngasod-ngarod do:yingém kímínsula aipéi asin obosu:nam a:ngko dunggai. Supak ka:yemílo édémpiné ang kané tani:dém aimang émnapag lurobbomdubong. Kapila:né, leke kémpé su:k anu adí:so agom ako:dok légangé mé:mila mé:motsula du:namdé aíké turyingém le:pé le:pé simonammé.

   Ngolu édílo:sin mé:pí:lígmanam ngasotko a:daggom supak odok ngasarsuko bélamdém dídémpé digital media lo pa:la:dag. Bojerungko science and technology advance la: gído ayirso:sin akke émpigela leke mé:lod angki mé:pinsula edílai tatkí: kangkí:man aiman do:yingém tadbegmodag. Édé mé:loddém ngolu mépagdanpa:ye. Tani:é adí:lok pagbo:é édém ngolu appíngéi kindag. Adí:sé éddík angukangku:bon édém ngolu digital media ara:lo durala ka:míloi kinna:dung. 

    Po:pé abar barnyi:ko murkong pa:nam léga:ngé dígdanla ko:rédém mopa:dungngai. Supak adí:é angula digital media lokki tetko:ídokki ko:rédém morobbomdung. Digital media lok basic knowledge kinné pa:né ope:é su:k adí:so dungko okumí:dokké ko:rédém mola lak lak ko murko:ngém income dung. Bulu:pak édémpiné agerém gerra dung sé:kobulu angkir biddanla ayir lédulo dugmínna aíké mé:loddém digital mé:lod ki mé:du:ji. 

    Lekkem aríglo ayirém bojeko bidungai dokké arígí:dok  ngasodlok ngasarsu:nan arédém pa:lendungai. Supak édé aríg ikodé nokké ngokké bomla du:nam smartphone sé. Aríg ikampé sé:ko laptop, mobile- lo digital agerém gerbomla du:ji bulu arré:m pa:dung. Lukanpé - YouTube Channel kulila, blog website agerém gerra, dokké Facebook atí ati digital platform-lo ager gerra murkongém pa:ladung. Odo arangído bojerungko digital do:yingém kinpé:nammé dung émpila ngolu siyum siro digital mé:lotki mé:namém mé:robbommílo ngolusin lékoném aíké ang dígla gernam agerdok aré:dém pa:ye.

      

Tapan Lal

Nébíng Doksiri