MANGMONNÉ TATÍG

 MANGMONNÉ TATÍG

Krishno Dole:

Nolduwar, Majuli

     Namsing pa:tang kéré kérélo pirme:né Tatígbí odokké pi:yang a:né ru:yi: ru:yi:do pirtané Tatígbí ke:kon kesakpé do:lung rumbo:sula dungai. Namsing pa:ta:dok du:né pirme:né Tatígbí aipé téngor kadagai. Pi:yang a:nédok du:né pirtané Tatígbí aipé aín murkong kadagai. Émpila sé:komsin ajjoukosumangai. Odokké sé:komsin ka:titka:ro kosunangai. Émdaggom pirtané Tatígbí mangmon gamdai.

       Longékoném namsing pa:tang kongko:la pirme:né Tatígbí pi:yang a:né mo:dum ara:lo a:né ru:yi: ru:yi:do gígo:sula gíddom pumi: asílo siné so:bo simangko pu:bomnam ka:beksuto. Édé siné so:bo:dém kangge:la pirme:né Tatígbí pi:yang a:né ru:yi:ké do:ludok du:né ru:tum pirtané Tatíg bulukkolopé gí:yato. Pirtané Tatígbí gí:tu: tayé:lo tedla du:ngai. Odo pirme:né Tatígbí pirtané tatígmé ké:radopé gíyangge:la sémpé tauto . R:utum tedlai dun? Odo pi:yang a:nédok pirtané Tatígbí lulad suto, Élo tedlanging dung. No mitra aidune, Kapé bagémpé lenkan Odo tettok émna pirtané Tatígbí luto. Odokké pirme:n Tatígbí kungke:do teddag. Odok lédído pirtané Tatígbí pirme:né Tatígmé tauto. Mitra kapé ngolum mé:pangkan? Odo pirme:né Tatígbí sémpé luto "ru:tum no ngolum mitpandaggom ngolu nolum mitpanmang. Odokké ru:tum ngo silo gainé dortané so:bo adorko a:né ru:yik arigdo ka:bekto. So:bo:dé ngok alag so:nyi araikampé dortadag. Ngo édélosin édémpin dortané so:bom kangkímang. Pirme:né Tatígbí pirtané tatígmé siné so:bodok agomdém luyodla édémpé lubito. 

       Édémpé lubidag lédído pirtané Tatígbí mé:mi:suge:la sémpé luto, ''Édénu: oko bottané agomén Ngosin ngok aki:sém botta:moladag émna luge:la bík aki:dém botta:pé mutbor suto". Odo pirme:né Tatígbí lékoda sémpé lutoku, " Ru:tum édémya:sin botta:yadagai". Odo pirtané Tatígbí pirme:né Tatíkké lunamdoki aru édémya:sin atjouko aki:dém botta moto. Pirtané Tatígbí aki:dém mutbor dagdo aipé kidungai. Émdaggomsin lubat-mé:batsula pirme:né Tatíkké lunamaki mutbortíla dungai. Édé agomdém pirme:né tatígbí aiyopé kindagai. Pirtané Tatíkmé simonam légangé lékoda pirme:né Tatígbí luto, "ru:tum édémyasin ajjouko bottayadagai émna". Édémpé pirme:n Tatíkké agom tadla tadla atjou atjoupé mutbor mutborra muddom lédído pirtané tatígdok aki:dé bukporra sipakkang .

            Pirme:né Tatígké agom tadla pirtané Tatígké aki:dé bukporra sipakkang. Émdodo do:lung ba:ni:dok pirme:n Tatígbí migom ru:tumpé ikangkung.

            Luké:dé sémpé :- Aín murkong kadaggom sé:kaimé mé:tidla édépé gerra:manamé gerpé mé:mílo lé:dí lamkupé ngasodé a:do émna lukandag.