T M P K

Horish Dole:

      Ka:da ka:danammé Mising opínké írso kébang T M P K é kinso:ma:pé aín bí:ríg dítagém gíbattobo. Siloké adíso Mising opínképé T M P K sé:sin mé:tinsuya:pagnam kébang akoné. Émpige:la bík lentíng do:yingém béjéko taniyé kinma:né kadung.

     1971 dítagdok 16 éla 17 Oktubordé Mising opínképé ainé longékai. Odo longédo Jonai amo:lok du:né Jonai Hayar Sekendari lo Ohom Nepha Mising Satro Honta émnam kébang ko ba:lenka. Odo kéba:do  Medini Muhon Dole:mé kébang abu Duneswor Mo:di:mé kébang abu oi odokké Sunadhor Pa:tírmé kéba: nébíngpé tolíkka. Édé kéba:dé lédupé Dhemaji amo:lok Sisimukhlo mirum kébangém 1974 dítagdok 25, 26 éla 27 Marsh lo bangka. Odo kéba:do po:péké ba:lennam kébang amindém mintenlangkula Ohom-Orunasol Mising Satro Honta émna mintentoku. Odok lédupé 1978 dítagdok 22, 23 éla  24 longkílo édé kéba:dé Ohomlok Dergau amo:lo milíg kébangko bangka. Odosin lékoda kébangé  kérangké amindém mintenlangkula Hodou Mising Satro Honta émna mintentoku. 

     Léddarpé édé kébangí:dé aí opíném aí agom-dírbíém mé:bo-ka:bola ami amindémya:m  ai amin min-yéku émna Majuli amo:lok Jengraimukhlo ba:nam mirum kéba:do T M P K  émna aminém mintentoku odokké édé kéba:dokké silopé édé amindéi du:yartíla dung. 

     Sé mo:píso taniyé béjéko kébangém ba:lendag. Émpige:la pongkoglokké édémpinné kébangé béjéko yokpagdag. Édémpiko ara:do Misingémpinné lédumokutsuné opín ara:lo kébang akoné aín bí:rígémpinné adíko gíbadla:namdé kéba:dok kénggí:nam arang do:yingém lukandag. Siloké adíso Ohom amo:lok tadgésuya:pagnam kéba:lok kébang akoné T M P K sé. Émyém aí opín légangé silopé T M P K sé béjéko agrém gertu:bo odokké gerra:sin dung. Émdaggom édé gernamo:dé opín akolok légangé pí:dag émna mé:la:ma. Silo aí tani: arangí:lo T M P K ém opín légang asinang kidanna ager germa:pé aí aki: légango:ngé agerém gerdag émna lugé génamém tatpa:dag. Silo aropésin T M P K  é"No Six Shedule No Rest", émna opíném jé:botokuma, migomé Mising du:téng ara:lok angu opínésin among réla du:la:yé émna Anu runggoém ru:la:sin édémpé iyoka émna jé:tokuma. Mising taniyé béjéko aí ilod-gíloddém mége:la ami ilod-gíloddém imínla:sin odokké aí agom-dírbíém mége:la ami agom-dírbíém lumín-imínla:sin T M P K é okoloimanggom okoloi mé:lo-ka:lonam agerém gerra dung émna kinné ope:ké lubosunamém appíngéi tattíla dung.

     Ka:nam tani:dokké ka:nam mé:namé. Émdaggom édé arangí:do Mising opínsok ménggésuya:pagnam kébang akoné T M P K sé. Émpila a:péné adílo opínsém aí kangkinki sé mo:píso lo:dípé turyarmonam mimagdém opín légangé motíbola du:boyépé émna mé:bonamdé lo:dípé du:yaryé.