UROM GAGNAM

 UROM GAGNAM 

Nirmol Noro

     Tani sidorung. Sé mo:píso taniém Ru:né bí éddíko ru:tagji édé takam tani kídí:dei longékoném siyekurung. Tani kísapé turra du:dagdo ngolu akoném akoné kangkinmínsudag. Bí ngokké aí kamko- ta:to ya:yo,nan bab ,angé 

bíroko émla kangkinka:mínsudag. Édémí:pé se:kom kapé gogpénaméji,édémbulum gogla pala ayang abomínsula turra du:dag.

   Gasum dítagko léko lakkopé ayang abo ara:lo dojon- tí:jonsula, gíkol gíjonsula yubkol yubjonsula,tetkol tetjonsula dokké atí ager gerkolo gerjon mojon sugekula édé ara:dokké takamém mépagge:kula akon akoné uyu amo:pé gípagdakku.

   Supak,ngoluk lukan lupénam agomdé sémpé - Tanié sidé mo:písém mége:kula uyu amo:pé sila gídakku lédudo bulum ngolu urom po:sum émla ludoku. édé urom- posum kídí:dé do:yit ésarpé ila taniém gíríg orígsudakku. Lekelok lékopé turra du:dagdok ayang aboém bulu mé:pa:sudakku. Édémpila ro:rokom ayir,dupiriyang ayir manggom hondiyang ayirdo ajing ko:kang manggom botténé tani é oko okolai gíyemílo urom- po:sum édé uyu kídí:dé gagdag. Kapila urom gagdang émyemílo- sila gíkuné édé uyu kídí:dé okolai lamté pédu:lo doyit ésarpé ila lekelok aya:mínsula du:nam dagnam kídíngém édo ayang aboko bidagku émla ta:to,ya:yo,nan bab bulu lubitíla gídung. Édém uromé gagmílo tanidé kìnggípé mittub mudag,kínggípé akiém kimola tanidé batgom- batromsudag. Édémpé inamém anbeg ka:begmílo ukum írang tanié mé:na:pé uromko pitkítoka,urom pittoka,uromko pitmílo:ba ayyekuji émla uromém pitbidag.

   Uromém kapé piddon. Urom pitnamlok ili- 

1) Alag do ambín agakko 

2) Asi batiko 

3) Métbu méker asutko 

Urom piddagdo lagidag.

    Uromém sémpé piddag- ambìndém lagke alagdokki ajjo ajjoko pitlíg pitlìgla 

Sa ta:to kamesorno Yayo sutsele ,Bangino ba:no Godano,ba:boi buyan no,akí dé bura no ya:yo etokoni,gomiri,dulpeta no odokké okoi okoi mora mirtuk kídínga, taléng yipopé gíné kídínga,noluk aminém minla minamlamangké, Nolum ngolu díngke pakesumangké,okolai sé (amuka bím) amindém minla lamté- pédungko:lo do:yid ésarpé sarra gíríg oríg sutgagomsin, kili kinamko tukku kinamko,aki kinamko batgom batyoko tolígtagagomsin édé ambín ígínko bidungké,édém doge tíngge:la bangge da:ra da:rasula gíngapkangkulangka,supakké atté,supakké takkoné kinam ramnamsém ésar bi:bi mola ansig síríng moteikuka, sé asi pojug kosin bidunéké okolai nolu tí:líng kénona yeyagomsin édé tí:ra dora sula gomka:lasugsuge:kula bíkké kéra:sokké gípagamkulangka. Dok lédupé dorné mekel métbu tukbaglíg ge:la sémpé ludag- édé ,édé émé mekelé nolum díngke pakesumangké sé balek bontir gat jirai takibo nalage, ngengkut lakutsuma:pé bangge da:ra -da:rasula gípaggamdankangkulangka.

   Sé urom- po:sum ka:rég tatrég pa:nam uyu sé Mising réngam ara:sok aro mé:nam aro uyu korung émla ngolu lulado. Kapéné sémpé urom- po:sumém pitgab lugabbimílo kiné tani dé aso aso:péaidagku. Édé ili igabbinam urom gagnam manggom urom ka:rég tatrégnam uyudém lekelokké su:lo:pé Mising réngam ara:so ibomtíla dung. Édé aipag aropé kaboné Mising réngam sokké uyuko. Édé ili ikamdém ngolu édílo:sin mépagla:mang.