DO:NYI PO:LO YELAMÉLANG TALOM RUGBO

Horish Dole:

     Mo:píso béjéko yelamé kadung. Odog Do:nyi Po:lo yelamsé ako. Édé ara:do Do:nyi Po:lo émyémílo Talom Rugboké do:yi:dém kinpo:pa:yé. 

     Golgi Bo:té émna tadgésunam Talom Rugbomé 1938 dítagdok 1 Disembordo Orunasol mimo:lok Pa:sighat mo:dumlok Ba:lég mo:léglok Jiné do:lu:lo otag. Bík ané-abudok aminém Rukpiyang Rugbo odokké Odam Rugbo émtungai. Talom Rugbobí aíké opíném airu:pé aipé mé:nékai. Édémpila bí aí opínlok taniyém angu opínlok yelamlo a:namdém bí aipé mé:mangai. Édémpila bí aí yelamko la:lenpé émna béjéko mé:mi:la dungko ara:do bí édé adídok Orunasollok mimong ru:tum Ge:gong A:pangkolokké ila béjéko kinné-pa:né taniyém jonsuge:la yelam la:lennam agerém iropka.  Talom Rugbobí 1985 dítagdo  migomlok yelam aminlok murkong ajjouko pa:la ganggíng monam agerém Pa:sighat amo:lo ika. 

     Dítag 1986 dok 31 Disembordo Talom Rugboké igurki Do:nyi-Po:lo yelamém la:lento. Odokké murongém mopín-ge:la 1990 dítagdok 31 Disembordokké ganggínglo kumsunam agerém iropka. Bí "Do:nyi-Po:loism - A Religeon" émnamko atka. Bík édé adnamdém "International Association for Religious Freedom" ké Delhilok ba:nam kéba:do kébang nébíngdém biyangka. Édé Kéba:dé mo:písok yelamkídí:dém ka:síné kébangko. Bík ki:ni gergo ukumé Jarmani:lok "Frankfurt" lu:jarro dung. 

     Talom Rugboké biya:nam édé adnamdém nébíngdé bomge:kula potinpé la:lenka. Édé potindém "IARF" lok éddíko yelam du:ji édé takamdém orka. Édémpé Talom Rugbobí mo:píso Do:nyi-Po:lo émnam yelamkosin dung émna appíngém kinmoto.

     Rugbobí 1990 dítagdo Jarman lok "IARF" lok ba:nam kéba:do Tumpag E:téméla Osong I:ríngmé gíbola Do:nyi-Po:lo yelam do:yingém kíbola mo:písém kinmoka.

Doksiri দকচিৰি, জানুৱাৰী, ২০২৩