ROKPO KÉ:LANG MENSARUNGKÉ DO:YING

Bhaigeswor Pogag

Changlang, Arunachal Pradesh

Lekelo do:lungkolo rokpo porokko dungai.Édé rokpo pérogdé aipé ardanékkai.Bí ro: lokkébo aíké donam légapé ardapé ager gerdungai.Bí do:nyi migmo lí:sama:dapébong  gé:robdungai.Odokké angke ke:la ager gerdungai.Bí rokomlo ki:ki:ri kogla do:lung tani: kídarém ro:dípé urrobdungai.Bíkké édé tatponé aduddé kumrí do:ríém urrobdungai.Bíkké adudém talla kumrí: do:rílok takamésin gé:robla agerém ardapé gerkolo lendungai.

Longékolo rokpodé píndído  dungai.Oddar okolailokké Mensarung adorko lenkang.Bí porogdém ka:pa:la nappadokké i:sore rébég rébékpé díkang. Bí séuko mé:lensuto.Bí kapéi idogom porogdém píndídokké gog-ying ge:la dopaye émna mé:to.Bí porogdém ka:la lukang-‘Ai ajona,  rokpoa,no aipé ka:yumdag.No aipé larnéko.Nokk migmo lépangé mo:yo:ngo:dag.Nokké ya:lí:né dundidé aropé migomlok dunlupkísadag. Nokké rokom ni:tom gognamdé:gom airupé tatpodag.Ngo nom lo:dí:pé ajon jonsupé mé:dung.’Odo  Porogdé ki:ki:ri kiri émna gogla lukang-‘ Mesarungém séko ajon jondon.Mesarungém kapésin aropé mé:lamang.No ngom dopé émnaye ajon jon-ye émna goksudun?’Odo Mensaru:dé lukang –‘Ma, ngo ayadém yadmang.No ngom mé:murdung.Ngom sorgotokké amosok du:né kídarém lutatko lubidopé Isorbí mé:líktag.Silo kídar  mo:písok péi péttang é:lang símín sili takamé léko lakkopé du:pa:ye.Émpila ngo nom ngokké ajonpé jonsupé émna gídung.No amo:so:pé gíyi:langka.Asin do:ying kíbosulapé ajona.’ Odo porogdé lukang-‘Ki: ki:ri kiri,aiye , aiye, ngom asutko mé:la ka:po:motei.’Porogdé  asin asinki tausukang. Aro agomdé okkon émna mé:ngkang.Ma, bí ngom yadgabla dopé mé:du:pé.Aiye, ngokké angu ajon kídardém goglíg biye, no bulum ajonpé jonpo langka.Odokké lédupé ngo nom ajonpé jonsupé.’ Odo Mensaru:dé mé:ngkang odokké taukang-‘Édé nokké ajondé sé:kon?’Odo Porogdé lukang-‘Ngokké aipagné ajondé do:lu:sok i:ki kídardé.Bulu gíddoipébong.Bulu gípímílloi ngolu aro ajonpé jonsula:pé dei.’ Mensarudé i:ki kídardok amindém taddannai pésokang odokké sumrob sumrobla ngengkutsuma:pé  dukkangku.

I:ki: dok amin taddannai dukkunamdém ka:la porogdé lukang-‘Ajona kapila dugdungkun? Du:potok ajon bulu gídobo.’Ma, ma, ajona ngo apta gíné i:ki lédulo  ajonpé jonsula:ma:ye.’ Porogdé lukang-‘ no:íson ajona, ludagan sorgotokké lutatko bomna gítung.silo kídar péi péttangé:lang símín sili:  mo:píso lékolakkopé du:pa:ye émna.Supak kapila no dukpagdungkun?’ Mensaru:dé dugla dugla lukang-‘Ajona, ngo lutaddém tadlaksuto.Appíng símín sili:élang péi péttangé angu angupé du:pé lagidag émna isorbí lulígdagai.Kapila émyemílo angu angupé du:mílo lumín momíné kamang.Édé i:ki kídardémgom lubilangka,angu símín lédulo du:mínma:péka émna.’ Porogdé Mensaru:dok dukkunamdém ka:la aipé aséngkang.

Doksiri দকচিৰি, জানুৱাৰী, ২০২৩