TARSILA

Jati Ram Koman

  Tarsilabí dugdung. Ngasod ngayod danna dugdung. Bí mé:píngei sula:ma bí okolo:pé dugdu:ji. Okolo dungasuyesong bí kinsuma. Sé dugnamsém dugamla:ma:la bí dugyartíla dung. Dugla dugla dugdo dém bí amo: de:lumkolo lésutsula tungkuli: pa:li:pé oying ge:la ke:lat la birinang asumkolo okep sukang.Birina asumo:do okepsula kédlatla do:la bí kinggí:ru:pé ngala dongkang. Ngayi ngasa:la do:dodém bík botténé angké:dé go:yi: go:sa:la dung...tu:pag leddodém bosual galukdok koglíg sunam pi:nko opagla galukdé ayopko pídlenla angké:dé len-kang.Bodis galugo:dé bík botténé gakír anyidém takkapla:ma,bí éddíko ngadu:ji déddíko bík angkéng kekon kesagpé ka:bo kan-kanpé yudyi: yutsa:la dung. Bík sé bottén angké: sém ka:la ka:bo layem do:ludok bík yigo pékamné Ga:lí:bí sogabla yumgabge:la tani:dém ettabdangel pi:jang ara:do longélo:tu:pé bím roto ményingké ginmur po:lodo.

   Édé ayirdokké:boi Tarsilangké amírém lo:dípé bík yigo Ga:língbí gagla du:bo.Aso aso:pé Ga:lí:mé bí asiném bibomka:bo. Ga:líbí Tarsilang ké asiném dopso: pakto. Ga:límé bí longékosin ka:mapé du:latoma. Oko montrongéméi motosong Ga:lí:bí, bím du:la dagla:ma:pé moyatpakto! Tarsila:bí Tantari do:lu:lokké si:sa:né ommé. Bím atérém oge:la bík owé bí dí:tak anyi:ouko dungel bím mépagla uyu amo:lo ga:pagkang.

Asin onam do:yi:dém méngkin suma: doi oné anébí mepagla gíla bík ba:bu Dígínbí porok batkampé bím batsa:botak. Émpilangéi kapiyen, Dígínbí ka:niya:pé ikang. Ka:ni tí:ma:pé bí longékosin du:la:toma. Aríg amongém kopag ge:la ka:ni:pé tí:pagamto.Tarsila bí si:sang si:bugla língír língírla kangkano: sangkang. Míngmodé:sin minné bugoriémpé insurnpé lí:jokla kangkankang. Tarsilabí mímbír sa:dokké Dígínbí yummi do:mi a:toma. Dolu:ng si:sang ya:me: kídíngé bím pangke: rumkampé rumbomkang. Do:lung ya:mé kídí:dok Ruadmé Tarsila:bí appíngém pélang aipé mé:ya:dak.

    Ami kinmango:pé Tarsilabí Ruadmé asin asegém seglíkto. Émpidaggom

Tarsila:mé appi ang-ngoko do:lung ya:mé é yadné dungai. Ruadbí maya ka:la bím aglíng jirrí:la ge:yemílo Tarsilabí oi kapkampé kabla Ruadmé moyat dagai sémpé -

Sompa kolid akkongko

   Pakugo:dé ang-ngoko

   Ngokké mé:nam ang-ngoko

   Mé:bomsunam akkongko.

Ruadmé Tarsila:bí aipé mé:nam agomdém akon akonké:lok tatpa:suto Dígínbí. Ruadmé ajji:kosinéi mé:líksuma Dígínbí Tarsilangké:pé. Opan yakpan Ruadké:pé kapé Tarsilamé biyen Dígínbí? Aíéi opan ki:panla omésém pétta: batkampé batsa:botak. Omméké du:gém ka:rasula ma:bo....lékí lakkín ko daggom dopa: tí:pal doboné ko:lo:pak Tarsila mé biye. Lula lupémílo murkong arjila tí:bo dobol du:la:boné beitalo Tarsilamé Dígínbí biye. Rotké: do:lu:tok Dígínké alputi Magya:bí beitangko Tarsilag ké:pé ka:bika.Amíném Tampilangé émtag. Tampila:bí lebe: lagbe: daggom ajjo arron bepar komarko igo:la murkong gotila érangém dobo tí:bola dung. Dígínké alagdo murkong línko íying

ko laggablíg ge:la alputi Magya:bí ludung sémpé___Alputia, ko:dé dukan attarrém ila murkong kanéko.

    Alédé ajjouko léki lékí daggom méngab néko.Bí:pak ommé Tarsila:mé ménggabla dobo tí:boye. Sé

murkong língko íyíngko nom bilangka émla Tampila:bí biligtag. Bí yamnéko mala dung. Tarsila:mé ngoluk do:lung baunalo ka:begla bí aipé ka:lígsukang émdag. Dígínbí ka:ni tí:né amme, murkongdém gakpang ge:la alputi Magya:mé agomdém toríksula luto__Alputia,airu:pé ainé agomé. Kampo kangané taniém turboma.

      Ngo ye:líg solíg daggom ngok ommém murkong jo:nélo:pag biye émla lugel ru:namém ru:segla alputi Magya:mé mélíktoku.

  Okumpé gílat ge:kula Dígínbí Tarsila:mé tetmoge:la luyirdung__Omma,Tarsilanga,télé Rotke: do:lu:tok ainé mirémné ko:ko nok légangé ka:bitag. Ko:dé bepar komar moné kanési:né ommangé. Bí:pagé nom aiyo:pé dobo tí:bol ukum kumla du:bo la:yepé. Ngo:nu kibid rambitsuné tani:sé éddíko turyen? Nom Tampilangké:pé bipagyebo. Po:lo akonso ru:segtagbo. Kumsu jo:sula nom bipagyebo.

  Tarsila:bí abudok lunamdém tadla yeru:dé ru:be ka:némpé ikang. Mittupdé píta pakka: némpé ikang.

Amigdé so:so mo:mong kang. Tuktadé po:pe gurinémpé ila dada:pé bí dagrasuto. Yumékoném Tarsilabí ami kenmango:pé Ruadmé goglíkto ukum kok do:pé. Appíng do:yi:dém kabla kabla lubisuge:la Ruadmé alagdém sogabge:la luto__Ruada, no ngom sé lo:nyi longumsoi dugpagbotéi. Ngo Tampilang ké:pé gíma:rung. Ngom la:péné tani kídí:dé gípíngo: ma:dapé no ngom dugbotoi émla Ruadmé kab émla Tarsila:bí sogabto. Ruadbí Tarsilangké alag dém la:pag suge:la sagí gíla ludung__Tarsila:no kendagéibo ngo aipé opan ommangé. Nom ngo tígémpé lomla la:la okkom dobo tí:boyen? Génam bomnamko rébila:ma:pé kapé nom la:layen?

     Ngo nom su la:po:la:ma.Ngom toyala du:lamílo duto. Su:pagar nom ngo dugbo la:ma.....Tarsila:bí Ruadké agomdém tatla aglíng kablíngé sangkang.Aglí: sa:la bí:gom lulatsutoku__No la:la ma:mílo kapila no ngom aipé méngkan? Ngok asin sém kapila no betke betye moton?

No oi kabla lukaman___

    Ré:lé dukpé mé:domí:l

    Junai galid éddíkon

    Oino gípé mé:domí:l

   Boseregdé éddíkon?

Odokké no  sémpésin lula ngom luyatka.....

      Go:ru a:ldém lagima:

      Menjek a:ldém lagima

      Mé:nam oinom pa:yemíl

       Kuyab tagla doboye....Édé lunam

agom kídíd kapikan? Su:pag la:dí

ayirso ngedyuk ngetsug sudungkun kapila?

  __Ruadbí luríksudung sémpé__

Édé bulu oi kabnam agomé. turgot sigot do:yi:lo édé agom kídí:dé milimangé oiya émla luge:la Ruadbí gípakdokudém Tarsila:bí je:la lunampé luto__Nokkémpiné néng asin géné milbo:lo gítayelíngém lebe: lagbe: dag-gom Tampilangké:

pé gínamdé airu:péi ayyadag......

tupo:ka nokkémpiné maksin kama:néya:mé é émge:la Tarsila:bí yapgo sikkap sutoku.

      Tarsila:bím bikur dí:tag akondéméi Dígínbí sikang. Abudok sikurdo Tampila:méi milbongé:lang abbompé mé:bomsula dungai Tarsila:bí. Tampilang kélang Tarsilangké ao aumko du:bo. Abín anyidé iskul gíla kensuoka:bo. Ajjaupéami ukum gíla Tarsila:bí suong anupé mémbír sa:du némpé idag.

Ga:lí:bí amodém luman lumanla aso aso:pé amo Tarsila: kélok akoidém la:pagto. Léko longékoném aríg togni:do se:koté kama:dodém binyik anyio du:bo sudodém asin agomém Tarsilangkélok yeglento maksik. Írma:né Ga:língbí. Odokké bínyi anyíké piriti:dé solibomkang.

   Tampila:bí Ga:lí:mé ajjouné bíroko émla aya:dagai. Dukan attarémgom du:modowai léko léko. Opan ko:daggom aíké obosunam bíro émpé aya:doai.Tarsila Ga:língké luman mínsunamdém amo yigo luman mínsunammé émla éddíko méngkit la mé:mangai.

    Tampila:bí bojeko mola:ma:bo. Míjíng jinga:du:bo. Émpige:la Tarsila:bí mémbíro sa:dung anupé. Ga:língbí gomjed dokké:bo Tarsila:bí bík arídém mela:toma. Yummém Tampila:bí bím bojeko do:bo sula:ma. Íllam sangéla ngapí:ngasodla Tampila:bí amírdokké olet dodém Tarsila:bí atéré ogo bango:la ngetkut ngetlatla alé alag jinna du:pa:dag...Tampila:bí bík mé:namko bila:ma. Ga:líbí simyo gamkampé Tarsila:mé gambomdag. Édé ayirdo simyo gamkampé gamnamdéméi aipé mé:ya:dag Tarsila:bí. Dumsigpé

ka:nam Tarsilangké Simyodé Ga:lí: bí:pag....

     Tarsilabí pi:jang asumdokké darabéi la:tokuma...Dugla dugla dukpele:suto.Konyum yumédo Ga:lí:bí bím rola do:dodém Tampila:bí sogabla rínto.Bisar sarpé émla do:lung kébangém lutadto Tampila:bí. Si:lo kébang longéai. Anyi:la rokompé porok kogma:dapé ukum lokké dugpagla dugla Tarsila:bí sé yumra:so:pé dugpí:to. Bím né:pé la:la dubo génam, ronam do:yi:dém do:lung takamé apong tí:nadung, apin donadung. Lamté lamté:lo Tarsila:ké do:yingém kídung… Agebké yameng ajon kídíngé bím takir sukkatdung...

    Tarsila:bí mé:la mé:pit sula:toma. Oko momurém bí moton? Tampilang kémpiné ayang biné milbo:dém bí turpé turpé yokmoko domotonéi! Ommang kídíngo:dé:gom kinsu ka:bo.Kapé anéko émla bulum ka:ríg suyekun? Notini, bonori, beisa, sibe: be:né bado:moya éki néngé émla do:lung yaméng lunamém bí tarrasula:ma! Turra du:ma:nam déi ayyayepémala Tarsila:bí mé:sukang!

   Moru kenné Gadumi é:jodo bí:lang Ga:lí:bí gíka kusere: langkapé, Tampila:mé bila bikadopé. Kusere: do:yi:dém Gadumi é:jodé (minédé) lubidagai sémpé....Ko anyiya, sé kusere: sé aipag danné tani: mokenan kusereí. Sém modopé ka:ni:ko, bang ajjoko, bíram tabí tukkuko dokké yumrang némingko lagidag. Appí:dém ímígla íla yolbusuge:la marbol gutiodémpé alum alumpé lumla médo. Alumo:ko dolíg yémíloi yubté:lokké tani:dé berpagdag. Émpiné kusere:ko Gadumi é:jodé Tarsila:mé bitagai. Ga:lí:bí lutíla dungai yokmodém lomla Tampila:mé bidopé. Tarsila:bí mé:rít sula síddí dí:ném bima:pé dungai.

    Bí ege: pongkebdo seglíksula payegla bomla metagai Tampilam bipénam yokmodém. Tarsila:bí ege: seg-gab sunamdok aso:pé seglensuto kusere: payegdém. Alumpé lumnam kusere:dém nappa: dém koka ge:la alag dokki alí:do:pé éla:sulígto. Ajjauko do:do lédudo yummi: a:dag némpé ikang. Yummi: yum-ngag rísondo télé adi: tolo:pé miksa:la ka:dodém bík na:n ba:bubí bím ogyapla so gítoka émla gogdag. Bí aso aso:pé dé:sa:dung bík owé ba:buk dungkoto:pé! Kéíkpé ka:lat sukunammé bík milbong Tampila:bí: lang ao aumdé kula kula ouwé ouwé du:po:to,no okolo:pé dé:la gídun? Tarsila:bí bík ané abu dungkodo:pé dé:píngka:bo. Dé:pí:la ka:toném oinu mo:di:ko ka:pato. Ka:tokkunamé okkomsin ka:begtokuma. Bík na:n bab bí bím ri:yit ringkot la aya:dung uyu amo:to!

     So:bo kang-gabné ko:ko Tarsilangké sima:dém kabegla pésola je:la dugla do:lung ammém lubitoku. Do:lung tanié pulisém lutadla bík sima:dém somjaito. Pulis kídí:dé Tarsilangké sima:dém dugbomkangku post mortem monam légangé. Post mortém gel érang tanié Tarsila:ké sima:dém lange:kula yutoku.Yukur ge:la do:lung tanié Tampila:mé péga: mendung. Tarsila: bí kusere: dokesula le:pe le:pe sila Tampila:mé pega: ménpénampé ikang.

    Opta lédulo kébang dungkum suge:la Ga:lí:mé do:lu: dokké ménpagto. Ga:lí:bí adi: arang durangkang émdag. Dítag íyingkoi ika:bo, Ga:lí: bí okol du:song se:koté kinma.

  Tampila:bí míjing jinga: ka:bo.. Ao aumdé yamné la:la okum kumla du:bo. Abín ao:dok opo:pagnam omé:dé Tarsilangar kémpé ka:dag. Do:lu réngamé ludag- sé omésé bík ya:yo Tarsilangar kémpé sol Ka:dang? Tarsila:méi otagkunémpé idagé réngama!

Doksiri দকচিৰি, জানুৱাৰী, ২০২৩