MISING RÉNGAMLO SRIMONTO SONGKORDEBKÉ GERLAM

Juwel Pe:gu

Silokolokké 550 dítag po:pébo édé Ohom mo:tagdo némín-pamínki yonbutsula du:namlo du:jer-du:yerra, yélam (dhormo) yonjer, opín pínjer, moru-moyad, kíngabla:ma:nam ui-yotpong kumnam-inam, bamunki jogyo inam, símín mokelígla ui inam démbulumpiné yélam mé:mo, méngku mé:lodé mojerra du:dodo Ru:né-Píné Ru:tum kísapé Srimonto Songkordebbí badlenna (obotar) de:né-de:mang, ainé-aimang, pínta-pínme:n opíném lukanna takam tani ope: asé:nam léga:pé, appíng gomku-poku potinlok (bed, puan, uponikod) mullang agomém ‘Bhagobot’ potinlo kétinsula, opín-pí:nam sabma:pé, migang-mimé appíngké toríksukannam adí aro to:dílok yélam ‘Ekhoron Namdhormo’ kumjarra kumnenboto. Réngam létérma:namém lépagla légéné-lédu mokutsuné opín (jati-jonojati) lutégla bangkí bangkí ame:-bottan dunku amiki du:yedné lekek Ohom mo:léglok appíng ope:ké amiyém akam pangkam, akam dungkam pa:jí:mola, ‘Hotro-Namghor, Bhauna’émpin ru:lenki lérégné yí:tané yélam lottalo dungkumsumola, ako jartaru:né Ohomiya réngam ope:ko jarrenmoto. Aro agomlok lumílo ‘rajniti’éla ‘orthoniti’ki gomyedla:ma:nam mo:lung-mo:tag, dírbí-dírlab éla yélam appíng bédangéméi Songkordebké ‘Bosnob’ mimagdé:pag moyedla bottané Ohomiya réngamdém molennamdo ako to:dí tolennané tomsarne ésarém sarrenmoto. Odokké appíng kayí:suné réngamkolok laginam molab-gomlab, dungkí-du:lapki bi:punné dírbí ébarém bila gíkang.

Songkordebké adído Ohomso lutékkanné lérégné agom manggom yélamé kamangai. Sanggalo Sutia, Deori, Moran, Motok, Ahum, pékí:lo Noga, Kosari, pongkoglo Bhunya, Karbi, Tiwa, Dimasa, oa:lo Ku:sh, Kashi, Garu, péya:lo Mising, Adi, Galong édé dungku amikídí:dé du:lubla dungngai. Lukannam appíng dungku amikídí:dokké aí aíké réngam du:lod, lunam agom, ili-ikam, agin geryarbomnamém gerbomna dungai. Amír-a:ng kínggíngki mimag mopíd-rotpídla taniyé tani talé:lo símín-sikkempé momínsula mé:podungai. Ru:némé kumnam manggom aséng légangé migomlok kanggurki mo:tag mo:taglo ‘Deuthan’ molennammém idungai. Édé du:téngkídí:do adí adílo migomkídíngé mimaglo pagbannamki mé:po manggom angkíma:né kili-kikamlokké motursunam légangé bangkí bangkí ui kídarém kumyum ipé péjab, porog, parong, soben, menjéglokké lubomna tani:émsin mokela ui kumnam-monam ikamém ila dungngai. Oko ikamkídí:dé su:pésin réngamsokké aiyo:pé yogma:dan. 16 tagríng (hotika) do Songkordebbí ‘Bordua’do ‘Namghor’ molenna atég-agampé Ru:némé kumnamém ila du:dodo lo:dípé Ahum-Sutia mimag, Ahum-Kosari mimag, Ku:sh éla Bhunya lédulo Kosari mimagém motíla dungngai. Édémpila takam mo:taglo dígmín-pamíné míglu:l dungai. Kosari:kídí:dok ara:lo ‘Jogyo’ ui, símín mokelígnam ui ikamém mége:la Songkordebké ‘Namdhormo’ lenroppé ikang. ‘Norohorila: Purnanondo Nodiyal Bhokot’mé ‘Horon binam’ ige:la:sin ‘Gojola than’molennam agerdé Kosari:kídí:dém díkki-dígadmoto. Bulu Songkordebmé mokenam tarungém ru:to. Édémpiné du:soddok léga:pé Kosari:kídí:dok moa:nammém pésola ope: kumgurko gi:bomna ‘Hirumoni Borbhunya’ mimong ‘Bordua’ mépagla 1516/17 dítag kíramdo Songkordebbí Brohmoputro péyang rékampé gíla ‘Hingori’do du:rasuto. ‘Hingori:dokké Routa, Routa:dokké Bholukaguri, Bholukaguri:dokké Brohmoputro éla Borgang’ abung bidríksuko ‘Gangmou’ émnam motagdo dungko mola du:rasunamém ika. Édé adído Songkordebbí po:pék ‘Dorong’ mo:dumlok ‘Bihali mo:taglo ‘Gangmouthan Hotro’ molenka émna kinna:dung. Mé:jí:né adné Manik Sondro Dao Dole:bí édé ‘Hotro’do írmí Songkordebké ‘6 kuri (120) ‘bhokot-írso’ (hisso)lok’ lutékkannam Misingké ‘Pormanondo Ata’ké lédulo bínyikké gíríg-jonrrígmínso ila:do émna méngkíko mé:dung. Kapéné mité miro Songkordebké jonninnamlo ‘Poromanondo Miri’bí okolo, édílo kapé angka:n odok lujub-lutégém anpa:ma. ‘Gangmu’dé Ahum éla Ku:sh mimo:lok rísu-kamso. Ahum éla Ku:shkídí:dok ara:lo némín-ge:mín éla mimag momínsukandopé ka:la írmí Songkordebbí aíké moyag-mopid agomém mé:la édé du:té:dém mépagla gínam a:ngém mé:to. 1517 dítag kíramdo írso ‘Poromanondo Miri’mé ‘Gangmuthan Hotro’dém dunggabém imoge:l manggom togablígge:la írmí Songkordebbí bík ope:-kumjoném yadbola rígdumké ‘Dhuahat’ (Majuli) lo:pé gírobla gíto. Édémpé ‘Dhuahat’lo du:dom ‘Be:lguri Hotro’ molenna ‘Ekhoron Namdhormo’ manggom ‘Bosnob’ mimag molam larmonammém a:ngki ménga:bomto. “Édé ‘Dhuahat’lok kéréngké Miri (Mising), Sonowal, Kosari éla Deori:kídí:dé í:r-pongkíré, édé dungku amikídí:dok du:jonsukolo ‘Brahmon, Kayosto, Kolita édébulu angu dungku amilok dírbí-dírlabé néi-néngan ngansa:dung (Jakeri Nahike Upam-tamténg 211 do Ohomiya:pé atkantag).” Édé ‘Dhuahat’doi Ohomsok ‘Bosnob’ yélam bomjarrok lampunné lamkankídí:dé lenkang. ‘Be:lguri Hotro’do du:do ayirdo mité miro Madhobdebbí Srimonto Songkordebké jonríksunamlo angkang, édém ‘Monikanson Hongjug’ émna Ohomiya:pé ludung. Mitom-adné Khogeswor Pe:guké lukampé, “Édé Be:lguri Hotrodoi mé:yém Poromanondo Miri:ké írsopé inamki Bosnob yélam yí:jerrok ésaré Mising réngamlo:pésin píngangkang.” Dé adídok Ahum mimo:dém ‘Suhungmung Dihingia Migom’bí (1497-1536) tedgurra dungngai. Kapéné dé adído ‘rajonoitik, orthonoitik éla hanskritik’ kísapé takam dagdung Ohomlok Brohmoputro kéréngké kekon-kesagé Ahum migom gomyedlo yedgabnamdé ‘Bosnob’ yélam lamjerrok ésaré takam Brohmoputro kéré:lo:pé sarjernammém lukandag. Madhobdebmé jonsula írmí Songkordebbí yélam lujar-bomjar inamki Majuli mo:tagém lula Noga di:téng, Garu di:téng, Adi-Galong di:téng (suk Orunasol) pésin írmí Songkordebké mé:nu-gernu gerpuné punjernammém tatpa:dungai. Édém ka:la mirí (puruhit) ope:yé néropkang odokké Ahum Migomki néyud ru:som ru:ropkang. Mité miro annyidé 1546 dítagdo Migom ka:yodlo angkang, édémpila Songkordebké Jongai ‘Hori’mé ‘Saudang’é mittug papírra moketo. Édé gerlamdo mité miro Songkordebbí a:ng osodla Madhobdebmé gíjonna Majuli mépagla ollungki Brohmoputro togtogla Kamrup mimo:lo gía:to. Lédupé ménggénam ‘Ku:sh migom Noronarayon-Silarai’ké mimo:lo du:rasumonamki ‘Ekhoron Namdhormo’ lugong éla lujarnam ager geryarra turdagém mé:yar-gíyarlíkto.

Kosari ara:lo ‘Norohori’la: ‘Purnanondo Nodiyal Bhokot,’ Mising ara:lo ‘Pormanondo Miri,’ Ahum ara:lo ‘Jogotanondo’la: ‘Ramrai,’ Noga ara:lo ‘Noruttom’ odokké Garu ara:lo ‘Gubindo’kokki mité miro Songkordebké gerlamé angkang émna tatpa:dag. Mising ara:lo Songkordebla: bík ‘Namdhormo’ yélamdok gerlamé édílokké angka:n aiyo:p lukanna sé:kosin lula:ma. Lupé luyém írmí Songkordebbí ‘Gangmouthan Hotro’ manggom lédupé ‘Be:lguri Hotro’ molendag adídokképag bík jonpongarnam írso ‘Poromanondo Miri Ata’kokki Mising réngamlo ‘Bosnob’ yélam lamjerrok ésaré sarangkang. Odokkéi Mising réngamlo aso aso:pé Songkordebké ka:yísukan (adorho) éla ‘Ekhoron Namdhormo’ ponjar-lu:jarkang émna lula:dag. Poromanondom mége:la:sin mité miro Songkordebké ‘Bhula Ata’la: ‘Tabalung Ata’ émnam Mising írso annyikolok aminém tatpa:dag. ‘Tabalung Ata’bí Murkongselek-Jonailo lekelokkébo du:né Dole: ope:-olu:lok Tokuai émna tatpa:dag. Su:sin Jonailok du:né Dole: ope:-olung amikídíngé Jonai Taonlok aninké Mohmora do:lu:lo lérékpé ‘Dole: Namghor’ molenna ‘Tabalung Ata’kolok pa:nam ili-ikamki iyarra gídung. Édémí:pé gerdí-to:dílo ‘Namkirton,’ dítag appi-angngolok pensam pensamlo ‘Borobah’ (borhobah)’moír-iírnammém ka:pa:dag. Mité miro Songkordebbí  Ohomsok appí:péi jarsa:nam éla lérégnam agomém mé:la adnamlo:sin Miri (Mising) dém attégla attung sémpé—

Kirato Kosari        Kasi Garu Miri

    Jobono kongko gualo

Ohom muluko        Dhubaye turuko

    Kuaso Mleso Sondalo. – (Bhagobot)

‘Srimonto Songkordeb Songgho’lok ager ajonkoné kinmokampé Dhokuakhonalok ‘Basudeb than Hotro’dém Mising tani:koné molen-ilenbotagai émna tadgénam mo:pun-adné, Oi appun Gonesh Pe:guké adnamlo adlentung. Odokkésin agomko lukannamdé aiyépéje mité miro Songkordebbí aídéi ‘Misi:lok onam auwo (Mirir gorbhojato hontan).’ Agomdém bojé dítag po:pébo Misi:lok Do:pín Migang Dr. Numol Sondro Pe:gubí Sibosagorlok Koiborto érangkolo ‘Tam Pholi’lo pa:to émna 1952/53 dítagdo:bo ‘Notun Ohomiya’ lutaddo adlenka émna tatpa:tagai. Édémpiné attékkídí:dok lenkíngém mago:mílo, Mising réngamséi lésíg sígla (gobekona) ka:té:pé batpagyé émna méngkíko mé:la:do. 

Léduké adílo mité miro Songkordebbí:la bík ru:tum tosonsubomné Madhobdebbí siríng sidag lédudokké yadyugné ope:yé aí aíké moyadém pa:yednam légangé mé:líng-ilíngkampéi lenropkang. Abakoné yélamém pa:po panga:nané pa:lampé bomna aíké pa:líng pa:lodém pa:rumkolo rumpakkang. Írmí Songkordebké kumgémínné manggom írso (hisso) kídíngésin gímgíg gípanna bíkké ‘Ekhoron Namdhormo’lok aikamma:né ager-gerlap gerbompé ikang. Mité miro Songkordebké mé:jarné mé:lod éla mé:yísukaném dé:míg monamo:ngém iropkang. Édé aíé lukansuné yélam írmíkídíngé angu angu dungku ami ope:ém odokké Mising réngamlok abaya:ng amiyém ‘Kalhonghoti Pontha’lo ‘horon’ bila, aí kísapé lekelokkébo ila gínam ili-ikam lédulo ‘Namdhormo’ém yonnusunamki ako anuné ikan-ikamko ilento. Odokkéi Mising do:lungkídí:d po:pélokkébo du:né Murong lédulo ‘Namghor éla Than’kídí:dé anupé lensetkang. Odok léga:pé Misingkídíngé ‘Horinam’ mopé dokké ‘Bhauna-Rah’ ipé ikaisuto. ‘Kirton’ ponamé Misi:lok yélam gerkanlok gerlépkopé ipakkang. ‘Ramayon-Mohabharot, Gita-Uponikod’é bulum o:rí:pakpé pargapto. Lupé luyém leke to:dílokkébo ila du:nam aí gerlam lamsetki attíné ‘Hindu’ dírbém gombomnammém ikaisuto.

Mo:pun-adné, Oi Appun Gonesh Pe:guké lukampé—“Songkordebké molennam ‘Katonipar Hotro’lok ‘Keboloya’ írmí ‘Sri Sri Biswanath Ata’kolo 1856/57 dítagdo ‘Ko:líng Deka Ga:m Pe:gula: Matkong Bor Ga:m Dole:bínyi Mibu (deudhai) ikam mépagge:la ‘Keboliya Hindu’ yélamlo a:pongarné midumai.”odokkéboi su:lo:pé imur-ikanné ‘Keboliya’ bíbílílíné yélamém Mising réngamso ila dung. Tadgénam Agom Migang Taburam Taídké lukampé—“Édé Hindu yélamdé bíbílílí daggom ‘Kristan Misonari’ kídíngé bulum yélam lamyod (dhormantorkoron) mola:ma:namdok ako lukanpé aropésinéi bulu po:pébo anga:nam édé Hindu yélamdéia:pé.” Ka:miyém ka:begdagje Boru, Rabha manggom angu angu di:té:lok lédu mokutsuné ope:lo tíyí:suyém Mising lédu mokutsuné ope:lo ‘Kristan’ yélam yébomnélok amme airu:pé ajjouko, kamang émnangéi lula:dag. ‘Keboliya manggom Kalhonghoti’ gílamlo anga:nam ila du:do ayírdo luyém Mising réngamlokké a:pongarra Majuli Jengraimukhlok tadgénam ‘Mogua Bor Ga:m Dole:’bí ‘Bhagoboti Pontha’lo angka émna mé:nomla:do. Bík ope:-olu:lok osed ope:ésin gíyonna ‘Bhagoboti Pontha’ iyonna dung. Ngoluk méngkampé Ohomsok lédu mokutsuné-dungku ami ope:dok ara:lok lekelokkébo ibom-dobomnam ongo-adin, apongém mépagge:la Songkordebké ‘Namdhormo’lok ongo-adin doma:nam (niramikbhuji) odokké símín-ngané attar mokepa:ma:nam (jibo hotya mohapa:p) ilodém iya:lígla yélam alamém lamlígnamdém pagma:yépé émna mé:dungai. Édémpila mikuné ‘Keboliya Bhokot’kídíngé lukampé Songkordebké léduk gíbomné kídaré, lukanpé— Katonipar, Sesasoliha, Budbori, Bareghor, Korotipar, Dohghoriya édé ‘Hotro’lok ‘Hotradhikar’kídíngé ‘Namdhormo’lok ‘Horon’ binamo:dém iya:lígge:l akedém dungku amikídí:dok ikansunam toku-toyukolokkébo ibomnam ilod-ikamí:ngém (asar nitike) aso:pé lé:sula ilamki (gupon poddhotire) iyarmoto. Édémpila, édé yonnusuné yélam alamdé su:pésin Ohom-Orunasollo du:né 70% Mising ara:lo ikanna dung. Su:sin Misi:lok mikuné midumkídaré ‘Horonasarjyo’lo ‘Horon’ la:la ‘Bhokot, Hadhu, Hatula’pé ila Urom Apin (husi), Dodgang (sardho), yélam ui (dhormiyo hokam) édémbulum ige:la:sin ‘Kirton ponam, Grohoduk khondhon’ édémbulumsin idag. Lupé luyém Ngannéla: Ngama:né (jibo aru joro) annyi uiyéméi lékko:pé ipong-isedlíkdakku. Yélam ui ibínbinam aminno Mising ‘Bhokot-Hadu’kídíngé odokké ‘Debodukh, Grohodukh’ émbulum ipu:binam aminno ‘Brahmon’kídaré Aín-murkong, Amér-anír (toka-poisa) lokké ibomna Bédu-gasor, So:bo-soben, Péjab-poroglo:pé ‘Da:n-dokina’pé la:la réngamséméi yélam lammurmonam ige:la:sin tokulokké akon tokulo:pé yadgíd-dogídnam miyatkané alamko lamyarmola lé:to. Songkordeb Songgho ajon Jona Kumbangké lukampé— “Yakan So:bo annéla: dok gakírdé brahmon légango:ngé émna mé:yedmola ukum éra:dok atér so:bo anédémsin ‘da:n’ binam aminno yadyug-la:yugnam agerdé buluk yatkag-mokagnam éla dobud-tí:budnam gerkamo:ngém léngkansudag. Írsokídí:dok yélam mé:jíngé jarsa:la:ma:dopé, buluk yadyumnammém írsokídí:dé ankinma:dopé odokké aíké émmumpéi opín bottap mé:sunammé aginpé-appí:lo aibanna du:namdok léga:pé lédu mokutsuné odokké kéyígné ope:kídí:dém ‘horon’ bidag lédulo:sin ‘hotro’lo gía:nam ila ‘hastro’ porinam motumém idungai. Édé appí:déi ‘Namdhormo’lok ‘Kalhonghoti’ gílamlok ibompénam ikamé émna kinjí:ma:né-pojí:ma:né lédu mokutsuné odokké Misingkídíngém aropé mé:yatsumodungai.”

Írmí Songkordebké siríng sidag lédu adílo Ohomso bangkí bangkí lédu mokutsunnéla: Misingkídíngésin bík yélam yéjubdok lédulo kabopagdopé kangkinsunamko ipé ijupko pa:toma. Dítag tagríng tagríngko ibomna munggíd-dogídnam éla aro angun bédangko léngkanla:ma:né ‘Hotriya’ írmíké jonnyudlo Ohomsok réngam turténgé turlung-molu:pakkang. Aipé díguppé, 1920 dokké porinamlok píangém pa:né Mising ami ope:koné édé adídok ‘Majuli Gormur Hotro’lok ‘Hotradhikar’ tani:képé mé:né-mé:jarné midum Sri Sri Pitambor Deb Gussami:ké jon-gablo a:to. Édé adídokképag aso aso:pé Songkordebké yélam lamyírsukan éla ‘Namdhormo’lok kabopagné gomrangém Misingkídíngé méngkinpé iropkang. Ménggappénamko, Misingkídí:dok asin arai éla írmí ménggénam a:ng odokké ‘Hotradhikar Sri Sri Pitambor Deb Gussami’ké tani:képé mé:né mé:pun mé:lusunamki 1924 dítagdo Mising réngamlo ba:lenarpo:nam Miku mibang ‘Mising Ba:né Kébang’ ba:len léga:pé gíkum longédok kéba:dém ‘Hotradhikar Sri Sri Pitambor Deb Gussami’bí kébang kungkeém dunggurka.

1930 dítagdo ‘Srimonto Songkordeb Songho’ ba:lendag lédudokké du:téng mé:bo éla ésar sarténg anpolok írmí Songkordebbí ilennam ‘Ekhoron Namdhormo’dé díguppédaggom anu alamki mimo:sok dungku tani:kídíngém ríkpumsuné ríbíki rín-gappé inamém iyartíla dung. Odok mé:punki Bharot sadhin pa:dag íyíng dítag lédudokké ‘Srimonto Songkordeb Songgho’dok jonjednamki Sunitpur mo:dum ara:lok Baumari, Senija:n, Dondi, Baligaon, Raunamukh, Soraibari, édébulu daktoglok du:né Mising do:lu:lo:pé a:yonna ‘Ekhoron Namdhormo’dé ponjarroppé ikang. ‘Songkordeb Songgho’ké lédulo 1964 dítagdo jon-gabmínsula mé:jí:-lují:dag lédupé Ghopurlok ‘Bonomali Dole:’ké gígébonamki 8/9 né ope:ko 1968 dítagdo ‘Srimonto Songkordeb Songgho’lok ‘horon’ bila:né (horonasarjyo) ‘Holiram Bhagoboti’ké kéra:lo ‘Horon’ langka. Léduké ape:do ako akopé ‘Ohom Kumar Nobobyokti, Madhob Bhagoboti, Ilaram Das, Sunaram Sutiya, Muhonlal Upaidhai’ édé ‘Songkordeb Songgho’lok ‘Horon’ bila:né ajonlo Mising kídíngé ‘Horon-Bhojon’ la:robbomkang. ‘Basudeb Bhagoboti’ émnam ‘Hotriya’ írmídé dagdu:lo Jonai-Gali do:lu:lok ‘Romanondo Kardong’mé ‘Horon’ bika. Romanondo Kardongké kene:pé geryarnamki Jonai-Sodiya lukkanna Orunasollok East Siang, Dibang valley éla Luhit-Namsai Mo:dumlok Mising, Adi Somua du:téng mo:taglo 8,000 kíramkopé Bhagobot kummínném (bhokto) lenbola:dungai. Su:sin édé mo:takkídí:do ‘Bhagobot éla Keboliya’ ikamé léngkansul dung. Anguru:pé Mising réngamlo ‘Songkordeb Songgho’lok kéyíglo ‘Namghor’ mopongarka Gohpur Soraiba:ri ataglo. 1970 dítaglo:pé édé ‘Namghor’ du:léglo ‘Songkordeb Songgho’lok kéyíglo ‘Horon’ la:né ukum-érangé 120 kíramko dungai. ‘Songkordeb Songgho’lok kéyíglo ‘Gunindro Kuli’ (po:pé Gohpur, su Jonai Telamlo du:né) bí 1978 dítagdo ‘Horonasarjyo’ (horon bila:né) kungke:lo du:pongarka. Bík lédudo gíné tagrí: dítag gíngapkíramdo Lokhimpur Gunasuti-Baghmora do:lu:lok ‘Roma Kanto Taíd’bí 1999 dítagdo ‘Horonasarjyo’ kungke:lo dungangka. ‘Horon bila:né ajon annyidok ager addé su:sin du:yarra dung.

Silo-mélok Ohomsok Mising réngam ara:lo 20% kíramkopé tani:yé ‘Ekhoron Namdhormo’lo a:la dung émna lula:dag. 75% kíramkopé tani:yé ‘kalhonghoti’ gílamlok ‘keboliya’ ikamki ila dung émdogom édé 75% dok pojí:né-larjí:né, réngam mé:jí:né ope:dé gíné tagrí: dítag gíngapkíram 1986 lédudokké aí ikampé lendo adídokkébo ibomna gínam aí kísané kídí:dém ipu:la ijubla ilenkunam ‘Do;nyi Po:lo’ gílamki gíbomna dung. Angu 5% kopag bangkí bangkí yélam béda:lo gíla du:namém ka:pa:dung. Édémpidoso ‘Srimonto Songkordeb Songgho’ odokké Songkori dírbílok bírsangko ‘hotro’ kídíngésin réngam mopu:nam légango:ngé luyír lula manggom mité miro Songkordebké gernam ainamo:ngém lula du:mílo kaboma:yé. Su:pakké adíso mimo:so ‘hamajik, rajonoitik, hanskritik éla dhormiyo’ kísapésin ko:yagbompé émna idung. Siloké moyadné (bissayon) to:díso anu alam lukanna dírjégné dírbé atakolokké réngam-tuténgém yadyudbomdung. Tani:kídíngé pa:rokpé amér (toka-poisa) panga:nam éla du:po-dungano:lo du:luppagdung. Yélam-dírbé silo amérki mojardung. ‘Kristan éla Islam’ yélamlo:sin amér alamki lukansuma:pé ankí-annyaré ila dung. Ohomsok takam tani:yé lenpumsuge:la:sin ‘hotro’lok ‘Hotradhikar,’‘Hotro Mohahobha’ odokké ‘Srimonto Songkordeb Songgho’lok gebom-ibomné kídíngé ‘Ekhoron Namdhormo’ lugong éla luyar-bomyar léga:pé bangkí bangkí bírsa:né, gertomkanné ager takamém ru:lenpa:yé. Édé tarung kídí:dokki Ohomsok ame:-bottané dungku amikídí:dok kéra:pé ojubné asinki gía:pa:yé. Aíké rémkuné dungku ikamém ige:la:sin kapé mité miro Songkordebké yélam lampun bédangém tayé:pé tu:sa:mola:yén, édém lukéng kadopé lusarla:pa:yé. Édé gerkando ‘Songkordeb Songgho’ lédulo ‘Hotro’kídí:loksin gejub-gerkan éla lujar-bomjarlok atég gertégé kappa:yé. Aro agomki lumílo ngoluk do:lu:lok lédu mokutsuné, ngetted-ajuka:né du:té:lo du:né réngam lottalo manggom ‘Namghor’ro gíla tani:lok asiném ankinnammém iyarpa:yé. Ékíma:mílo silo ‘rajniti’ gílamki gípansupé iné ayirso Mising réngam odokké angu réngamloksin abaya:ng amiyé yélam gílamkísin Ohomsok opín jarpum-jarsa:lok rítsom gíbadla gípagnam mé:modém kapésinéi lupagla:ma:yé.

(Mé:tinsunam Mitom-Adné Juwel Pe:guké agin du:téngé Jonailo. Su:pakké du:téngé Guwahati:lo. Bí 30 dítakkopé ibomna Mising Kébang-kélung, Agom-gomlab, Yélam-dírbílo ager gerge:la:sin Mising-Mipag agomlok Adnam-lunamémsin iyarra dung. Ohom mimo:lok Irrigation department, Guwahati:lo migom ager gerné Migang Pe:guké Mobile-WhatsApp No: 9954728268. e-mail: juwelpegu@gmail.com)

Doksiri দকচিৰি, মাৰ্চ, ২০২৩