সম্ভৱতঃ
ইলামণি শইকীয়া
সম্ভৱতঃ ক’ৰবাত আকৌ এদিন আমি লগ হ’ম৷
জীৱনৰ চাকনৈয়াত উটি ভাহি ইজনে সিজনৰ কাষ পাম
দুচকুত অপাৰ বিস্ময় লৈ
ইজনে সিজনক চাই থাকিম৷
শতিকা পুৰণি পেৰাৰ পৰা উলিয়াই অনা মুখৰ কিছু সময়ে আমাক দুখী কৰি তুলিব, সুখী কৰি তুলিব৷
অথবা
সম্ভৱতঃ এদিন
আৰ্ট গেলাৰীৰ ওচৰা ওচৰিকৈ থকা দুখন ছবি হ’ম
একেখন নাটকৰ দুটি চৰিত্ৰ হ’ম৷
সম্ভৱতঃ বিখ্যাত এজন ঔপন্যাসিকৰ শেহতীয়া উপন্যাসখনৰ আমি নায়ক নায়িকা হ’ম৷
ক’ৰবাত এদিন হয়তো আমি আকৌ লগ হ’ম
সিদিনা প্ৰেয়সীৰ সৈতে তোমাৰ অহেতুক ব্যস্ততা নাথাকিব
মোৰো নাথাকিব উশাহ সলাব নোৱাৰা দায়িত্বৰ মেটমৰা ভঁৰাল৷
সম্ভৱতঃ
জীৱনৰ শেষ প্ৰান্তত
দুকুৰা চিতা জুই হৈ আমি একেলগে জ্বলি উঠিম
একেলগে ধোঁৱা হৈ উৰিম৷
আমি আমাত মিলি যাম
সম্ভৱতঃ এদিন…
Doksiri দকচিৰি, এপ্ৰিল, ২০২৩
No comments:
Post a Comment