Nébíngké Lupénam

  সম্পাদকীয়….

Agomsok Légangé Léko Lakkopé Mimakko Mopérung Lagiye

    Toyon tosonsula tokamínsula du:mapé aiké ané agomsok légangé silo mimakko mopérung ikabong. Mising Agom Kébango:dém togélígla du:mapé appíngé silo dagruppérung lagiye. Su:paksin adí:é du:da émna mé:la du:mílo aropakpéi ngolukké lupo lujarné, tatpo tadanné mising ané agomsé mo:písokké yogmangodapé aíké mising tani:lokké yokpodanye. Mising Agom Kébangé agomsok légangé mimagém motíla dung édém mé:mo:pénam kamang. 

   Lulímanggoméi lupénampé idung Mising Ané Agomsém medium of instruction-pé pa:nam légangé MAK-é éddíko ang dígla ager tarungém gerra mimagém moduji édémpé ngolukké angu angu Opín Kébang kídídé mimagém jé:dum-gídumsumala silo aíké runggo ru:banglok pa:pénamlokké lédumokutsupé idung. Kajé ngolu lékola appíngé agomsok runggo ru:banglok pa:lanam aré:dém léko lakkopé je:lennai. 

    Opín ngasodé bojekoi du:daggom ngolum agomsém lagiru:poye. Ané agomsok légangé bérokpé mimakko Mopérung iye. Agomsé du:mamílo opíné turmaye. Opínsém turmonam légangéi agomsém turmo:pé lagiye. 

    NEP (National Education Policy) 2020 do bégrogo:pé lubitung aí aíké opínnok ané agomki klas 1 dokké klas 5 dopé pogolo ommangém pokailaye. Sukké anu academic year 2023 April dokké asom mimongésin NEP-ém implementation itobong émpigela silopé ngolukké mising du:téng pogolo Mising Poyirném ka:pama:pé idung. Asom mimongé ngolukké mising opínsok ané agomsém rajniti ara:la yedla lénggéla yampo yampo émna moyaddunéi édémsin réngamé kinsu:pé ikabong. Ngolu sé:komsin aimang émna lukolo gímang. Ngolukké aíké pa:pénamdém kapila okolai mépagyen ?

   NEP dok lukanpé silo asom mongésin NEP dém full implementation-nam légapé agerém gertíla dung. "Shiksha Setu" portal do poriné ko: ko:néng lok data ém update la dung. Update nam léga:dé sémpé- ko:konéng kídídok lukinnam-tatkinnam agomki porainam ager tarungém gerpayé. Bérokpé lukapé gímílo mising du:téng pogodo mising mastor, boro du:téng pogodo boro mastoré poraipé lagiye. Class 1 dokké class 5 dopé aíké ané agomki poraipérung lagiye émna NEP 2020 é lubitung. Kapilané aíké ané agomki pokaimílo ajjon ommangé lomdanna agomém kinnado. Édém NEP lok expert odokké pinnyo kané tani:ésin lugéla gítung.

   Bharot mo:rumé tolígnam NEP dok dungkampé silok longéso ngolukké ané agomsém poyirnéké anu:pé langangkandagaboi émpigela silopé asom mimongé édémpiné ager gernanko ka:pasumapé idung. Po:pé 230 kopé mising agom poyirné binam, medium of instruction légangé mimag monam, 8th schedule dok légapé mimag monam odokké NEP 2020 dok hubidang kídídém pa:nam légapé monam mimag kídídém atkolo gímílo bojeko ayriém lagiye.

   Ngo sokki aíké tani:kídíngém sémmo:pé kumpa:dung sé ayirsé agomképé airuné ainé ayirko émpila MAK-lok dumsu:ki appíngé kajé agomsé turyarra du:monam mimakko appíngé léko lakkopé molajé.

   Agomé kama:mílo opíné kamaye, opíné kama:mílo dírbí-dírlabé kamaye. Kajé réngama appí:dém ai kampo:pé du:monam légangé kínggíruné réngam mimakko molajé.

Tapan Lal

Nébíng

Doksiri দকচিৰি