DI.SI MIGOM

Bhaigeswor Pogag

Pangkombí lékor íyíngdém dibhijon la;la kampopé pa:stubo.Bí ko;kalokkébo porinamé aigamdagai.Bíro angé bojela bí kostodé okkoson kangkítomang.Appíngké ayang angkéng ara:lok sí:sangkang.Bí buluké do:lu:dok poripo:pagné.Kumrí: do:lung kídardokké poriné bojeko du:ng. Émdaggom  buluké do:lu:dokké metrikgém pa:spo:né ko: ko:néngé kamada.Émpila do:lung ko: ko:néng kídaré bím aipé ménggé tadgésudag.Pangkom buluké bíro angé angngoko.Odok bí ra:dangé.Bíkké bíro angé kídardok asutko angugamdag.Bí porinamlok aipé radné ko:ko émna éra:dok appíngé aya:dungai.Bím ané abudé:té aipé aya:dungai odokké aipé méngké:sudungai.Bí yampo roye bottané sakoriko gerra okum érangém aiboyepé odokké do:lung réngamém la:ng opínsok jo:po pila réngam agerém gerboyepé émna takamé mé:tinsudungai.Do:lung ko ko:néng kídardé kede: sulli yonsula sí:sane.Pangkombí ko:kalokkéboi édémbulum mé:bomang.Bí bottapé  porila migom dokíyerung émna amme tauyemílo lusudungai.Porinamémsin édémí:pé pori dungai.

Adíé silo silo émna yampo yampo émna  gítíkang.Bí:gom porila lékoré:sin bottéla gítíkang.Longé kolo bí lékor 12 démgom dibhijon pa:la aipé pa:sto.Bíkké porinam aidag.Bí Shillong bok ainé kole:jkolo poriye émna lula  okum érangété abar murkong gídaggom bíkké méngkampéi poridopé émna tolíkto.Shillongí:bo kole:jdém porito.Kole:jdo botta bottané mirém éra:lok ajon arum kídarém ríksula bí mirém ajon jonsula do:lung yelod daglodém mitpansutokubo.Bí okum éra:lok abar murkongém kotém kobarla mirém yekampé yemínkang.Do:lulo du:dagém longé dodungai, yu:méko gabdungai.Kamanggom ané abu bíro bírmé kídaré Pangkombím Do:nyi Po:lo ém ka:lo momangai.Pédong ésaré sarkat momapé porimola lé:tungai.Píram attungém do:lung réngamé bidum ka:dumsudungai.

Mibo amo:lo gíla poridung émna Pangkomké yelod daglodété angukangku.Lekelo Pangkom bí do:lung a:yekumílo do:lung ko: ko:néng kídarém porinam do:yingém lubodungai. Silo mélo bí do:lu:pété a:pattokuma:bo.Do:lung yeli: yekamém aipé mé:tokuma:bo.Lu:jarlo du:la lu:jarlok yeli: yekamém mé:bola lu:jarlok ajon arum buluké yekampé yemínkang.Do:lulok e:g porok,so:bo menjég yesi taye kídardém ka:pa:suyemílo tayum bélumdag.Do:lu:lok apong tí:la ru:ru se:se:namém tallíng ka:lítokumang.Émpila do:lu:pété sa:língkumang.

Pangkom bí Bi.E démgom aipé first class first division kokki pa:sto.Okum érangé édé lutaddém tatpa:la aipé aséngkang.Pangkomké abu anédé mé:pola kamanggom do:lung réngamém tomkumsula yeksokko ba:la amanko doboto.Do:lungégom Pangkombí gísangkumílo érkokki  yamríksupé émna toka:la du:ng.Émlai kapiyen popéké do:lung ayang kídardém Pangkombí mitpantokubo. Bí supak lu:jarlok ajon pa:langkula do:lung ajon arum bulum mitpantokubo.Mirém ajon arum kalangkula do:lung sí:jon ajon bulum mitpantokubo.Bí do:lulok ni:tom ba:ri rí:namém kintokuma:bo.Botta bottané hotello gíla inglis ni:tom gogla party mola aipé mé:dag.Mising agom lunamdém bí do:lung ngemonné émna mé:sudag.

Pangkombí AI.E.ES(IAS) migompé poripé émna méngkang.Okum érangém do:jikki édé agomdém lubisuto.Okum érangété ainé do:yingé émna tolígla abar murkongém makumsula lé:bito. Bím abar murkongém abudé édílo:gom pí:ram momangai.Pí:ram attungém akon annyilok nargong kogo daggom laginamém bidungai.Bí ingraji agomkokki honarsém la:la porila ingraji agomdém tépang bukkampé bérokpé lu:ladag.Mising agomdém bérokpé lukintokumang.Mising agom ludogom tokí tokí:la ko:kang lukampé ludag.Boje:ya:dém ingraji agomki ludag.

Longéko AI.E.ES anka:dém bigekula do:lu:pé gítoku.Buluké do:lu:dok yeli: yelod kídardém bí angu angupé anpa:toku. Bíkké mibo amo:lo porila du:dagdo do:lung ommangé bojeko poriné lenkangku.Bíkkémpé ingraji agom lukinné poriné ommangé do:lu:do ako annyiko lenka:bo.Buluké do:ludokké Bi.E porinété bojeko lensetsukangkubo.Do:lung poriné kídaré bíkké ingraji agom lunamdém talla bím asutko ménggé:o:sudag.Bí angu ko: ko:néng kídardok porinamdém porinampéi mé:mang.Bí:pak aipé poriné émna mé:sudungai.Bulu Ohomiya agomki poriné.Bíkkémpé ingraji agomém kinmang émna mé:dag.Bí do:lu:dok popéké ajon arum kídardémgom kangkinma:némpé mosula bulugom ajon jonsutokumang.Do:lu:do ajon arum jonsuné kakuma:la bí bojeko do:lu:do du:la tokumang.Bí Guwahatipé gítokkang.Bolo bíkké porijon ajonko du:dag.Ajondém bíkké AI.E.ES yí:mange lendokudopé du:mínpopé émna luto.Ajondé:gom aiye émna lula bíkkéí:do dumínkang.

Longékolo AI.E.ES yí:mange lenkangku.Pangkombí:gom aipé pa:stung.Bíkké lutaddém tatpa:la abudé aipé aséngkang.Do:lungém tomkumsula bottané e:g adorko amanpé doboto.Akon akoné gíkumsula aséng agomém Pangkommé bidung.Abudé mé:poki miksém dí:dung.Maik bé:nam tatpa:la kumrídok do:lu:ng kídarégom gíka:la ka:dung.Do:lung tani: kídardé Pangkombím aníndokké ringka:la ka:lí:dung.Abudém réngamé léko goksa:lígdokupé ludung.Abudé aiye longékolo goksalígyeku émna réngam kumna lubidung.

Adíé gítíkang.Longékolo bím migom kungkedém migomé tolíkto.Bí Di.Si migompé ila migom agerém gerra dung.Migompé ikunamé do:lung a:ngkupégom adíém pangkumang.Migom okum ager okumdokké bí migom binam okumo:do:pé yumé ro:pé gípénampé idag.Yumé ro:pé ophisdok kakot kídardém pérkut pérrabla sain bila alagé lakpe: gédag. Okolo do:lu:ng gílangkula ané abu bíro bímé ka:díko pa:yen?Bí mé:tagai migom ager pa:mílo yirman so:manna asé:la yepé émna.Migom ager pa:ngkunamé bérkutsula ka:díésin kamang.Migom kébang kídardo dunggela bojeko tarungém ru:supé idag.Migom pa:dag me:lamdokké lékoté do:lung gísangkíkumang.Gíkupé émna mé:daggom silo kes ako.Yampo kes ako.Édémí:pé ngasod kídardé len-yonsudak.

Abudé asinang obadla longékolo Pangkombím kangkolo gíto.Bí ajjau:dagém okkom mé:bodagaji,okkom do:lí: dungaji édém bulum bombila gíto.Ko:ka:lo Pangkombí Ngertag ongo,Kinggong ongo,Magur ongo,Purang apin,Amkel ambín,Namsing,Nékung oying,Sompa oying,Dérmi-Gurban oying kídardém aipé mé:bodungai.Émpila abudé  édé appí:dém bombitung.Menjeg gakírém di:bang otu:lo doipé mola  bombitung.Anédé asin odanna akun akunpé kunpansula bilíktung.Ngomuk ngosan,dínsanémgom bilíktung.Olagbí ao:dok migompé inamém appíngém lubisudag.Ngo:mín migom ao:ko ola:dag émna yigo magbo kídardém lula ngedmandag.Silo ngo migom ko:bím kangkolo gídag émna lamté lamtédo appíngém lubisula gídung.Yumé ga:rilo sa:la bí Pangkommé kangkolo bí atéré gídung.Minédé amírdé molama:la  gíbotomang.

Rokondo Olagbí ao:dok  migom binam okumdo:pé pí:to.Bí bíkké do:yingém ge:ddo du:né sokidardém lubisuto.Olagmé ka:la ge:ddok dagbomné puli:jdé gía:la tauto.Odo olagbí Pangkom migomké abué émna lubisuto. Puli:jdé du:potok émna lugela Pangkommé tausuto.Olagmé ka:la migomdok abupé ka:mang.Kapila émyém génam bomna kídardém ka:yem sékkai aluwang kísapé ka:dag.Po:pé ge:ddok sokidardé thela riksa ní:nggonéko émna mé:to.Do:yi:dém puli:jdé migomdém lubitoku.Olagbí do:lu:ng tani:lok bédu gasor gékampéi gébomtak.Édém ka:la Pangkombí bíkké abué émna lubisupé anyi:sudung.

Pangkomké Di.Si ajonékké ager légapé kébangko lubosula dungai.Olagbí puli:jdém gíamo:dopé lutí:la Pangkombí gíamotoka émna lula gíamoto.Olakké ongo adín,oying oge pa:yek kídardém ka:la migom ajon kídardé Pangkommé tauto.Odo Pangkombí lukang –“ He is the servant of our  native house.’’Odo migom ajon kídardé bím angupé du:po motoka émna Olagmé ka:la lukang.Olagbí “ Servant our house’’ sé gompir aumdém ni:tom modunémpé asin ara:bo ménggapto.Bí tatkinma:nam gompir kídardé okkan émna ménggabdanné lé:to.Ao:dok ingraji agom lujo:dag émla yigo magbo kídardém lubikupé émna.

Leke tani: kídaré do:ying a:bangém aipé ménggabla lé:jo:dag. Olagbígom ngi:tom do:yingém aipé ménggabjo:dag.Porinam kamanggom bí bojeko leke do:yingém kindag.Otén omum bulum tatpo tatponé leke do:yingém kíbodag. Pangkom bí abu:dém angu so:yarkolo du:moto.Abu:dém do:ying do:mokosin lupo-taupé adí kamang.Kébang kadung émna lenpakkang.Olagbí ao:dé ainé migom okumdo du:modaggom édé gompir aumdok luké:dém kinnila dung.Bíkké asin obomsula bombinam attar kídardém ager gerbiné kídardém lulígla dasbindo yoppagmoto.Édém ka:la Olagké asindé aipé mé:dírkang.Asin obomsula bombinam attar kídardok arédém ao:dé kinbitomang.Bíkké atugdo muglíngko ogaptonémpé mé:sukang.Bí médírra ao:dok kamango:pé yu:dém ga:rido sa:lattoku.Ao:dok do:ying appí:dém anédém lubidungku.Ané asin asinki  kapsudung.Amme kinmílo luka:péké émna namsing pamkampé do:yi:dém pamla lé:tung.Olagbí otén kídardém taudungku-“ Otén bulla,Servant our house émnamdé okkon?Ngom nokké migom ba:boi bí buluké migom ajon kídardém ngom ka:nggela dépéna lutoné.” Odo otén kídardé atodém ngetmanna lukang-“ Ta:to nom ba:boi bí ngoluké okum éra:lok pagboko émna luto.” Otén kídardok lubinamdém talla aglíngé mittupto:pé sangkang.Ngok onam ao:pagdé ngom ami: tatkolo pagboko émna lupénédé! Odo Olagbí bíkké ugondém pella pekík kírígdanna peto.Silo kídar Pangkom bí ngokké onam ao:mang.Do:nyi:é tallangka ,Po:lo:é ka:langka.Bíkké édílo:sin ésang anpoé kapémang.Oné abuké mé:dír miksiko dílígla sagí gílígnamsi édí Do:nyi:lo:sin pínpémang.Oné abusim bí ami: tatkolo Pagbo émna lukítoné.

Abudok pekam pekamípé po:lo píkeng me:lampé Pangkomké bottané kinamko a:to.Bottané medikello ka:sunamé bí i: kensarpé idung émna daktordé lukang.Édém tatpa:sulangkula abu:dé kapsula dungku.Ngo aglíng sa:badla pemursuto.Ngo amo:so turra du:pamang.Ngo aro abupé ilatomang.Ngo turra du:ma:pé sinamdéi aiyaye émna lugela go: go:gaila kapkang.Kapkoí:dokké Olagbí ngapinsula sipakkang.