TURNAM

Horish Dole:

     Kíngí:-ta:rí:pé pédong oge:la mukkang kané do:míré yí:rongge:la gené do:míré lenna idokudodo Mékolbí po:ro apo:dém  pamnam ongodokki yonjedge:la apo:dém léko yonjeddém léko ila tí:la do:la dungkodo abí:ya:né bík bíro Mé:jupké do:yingkídí:dém mé:pangkang. 

     Mé:jubbí ame:dokkébo poriyém aipé kindagai. Bík légangé ané abubí ami pagbo gídanna poriyém pongabmoto. Édémí:pé bí migom ager pa:la ukum ríngngongém mépagge:la, do:lu-simongém mikpan-ge:la lu:jarro kumda:-da:la dungkang. Silo bí mité- mirémé, do:mír íkpí:né ukum talé:lo dung. Né:ngé, omma:ngé migom ager gernamé pí:ram émnamé okkosin kama. Lupé lumílo amo:lo  léppomsin tujedma. Rémné Mé:jubbí   amír adin aila du:dodo bím oko do:lungém bérka:la:sin ka:tokuma. Silo míjíngé jíngangkunamé do:lungém mé:pa:la sagíém gídag. Aí légango: turra du:lí:né Mé:jubbí silo atéré. Okodoksin pí:rammangko ara:do do:lí:-tí:língko dobegma:pé atéro:ngé ki:bo iki:démpé kérra du:pa:dung. Kapé émna tatkínékosin kama. 

     Tíngadla lé:nam apo:dém léko medroblo medamge:la Mékolbí asino:dokki mé:to, "Mé:jupké turnamdémsin-yé turnamé émdon? "