সম্পাদকীয়

 

Laginam Attarlok Aré Bojé:nam Léga:dé Ngolu Aíwíngé

(মূল্যবৃদ্ধিৰ মূল কাৰণ আমি নিজেই)

Okkardéma:mílo tani:é doma-tí:ma:pé du:la:man édémpiné attar arré longé longédo bojébomla gímílo tani: réngamé kapé turra du:yén ? Édémpiné tébégjét émnam taunamko po:pé:bo aíwém tausuyamílo silo attar arré bojémayai. 

    Agerém germa:pé murkongo:ki réla dopé émna édí to:dílopé mé:yéji odolopé tani:é kénong menna menka:sula siyé. Ngoluk tani: réngamsé kinge:la:sin imurém ila:dung. Ko:ka:lokkébo su: lukainammém ka:pa:dung aríg ila: bottané tani:pé badmang, migom agerko germa:mílo a:péné longé kídí:do donam gabla kénong menna sipéké. Sé luyirnamsé luladma:pé kurradla ka:míloi agomdé lenpagdag. Alag annyi:k du:né tani:ém alag akko:lok agerém gerkaipé lagimang. Sakorié la: Aríg édé annyi:pagdok arang agomém ngolu poné ko:kangém luyirpé lagiyé. Murkéng pokéng angkin kama:lo su:k anu adíso turpé aipé ngasoddag. Oko attardém lagipodagji édém ngolu kinpa:ruyé. Odokké molennam atta:rkídí:dém okolokkém molendang dokké molennam aré agomkídí:démsin kinpé lagiyé odopak su:k anu mo:píso lékor korpí:mínna turpí:mínnayé.

  Aré bojénam légangé ngolu Migomongngém ajeng jé:la du:namdé aimang. Aré bojémona:n bélamém ngolu aíwépak la:lensudung. Tani:é bojéya:la gídung émpigela donam tí:nam atta:rém molennammé ame:ya:la gídung. Kapilané siyum síro sakori-ko pa:míloi aríg ísíng inamém mépé mépagdag. Aríg ísíng ima:pé ngolu ma murkong kadagéigom donam tí:nam atta:rém okolok réla doyén. Édé ajjo:né agomkídí:dém kinsuyépé émna Migom ka:si:nékídíngésin édílai édílai atta:r arrém bojémodag émpigela ngoluk tani: réngamé kinsuma:pé migom tani:ém ajeng jé:la du:dag.

Tapan Lal

Doksiri দকচিৰি, আগষ্ট, ২০২৩