Orunasol Mising-ké Ngasod

Bhaigeswor Pogag

Mo:péso éddíko tani takamé  du:ji appíngé aséla odokké ré:balla ainé tani:pé ilídag. Émpila lo:dí:pé pori unila rébadnam do:yingém mé:do.Bharot mo:rumso:gom bojeko opíné du:ng. Édé opín kídarém rébadbonam légapé migomé ST,SC,OBC odokké general émna kosak sakpansutung.Bulum mimong kídardok yenam dagnamé ka:la kosaksakpansutung.Lédu mokutsula du:né opín kídarém angu unnotiné opín kídarké akampé dakor korpínam légapé rijarbeson nitiko bharot migomé asoniyém la:tung.Odok Uttor-purbansol sok du:né opín kídarsé bojeyapé ledumukutsuné opíné du:yabandung.Édé ledumokutsuné opín aradok Mising opínsigom ako.Mising opínsé Ohom mimongso:lang orunasol mimong annyi:so to:dí to:dílokkébo dubomla dung.Ohom mimosok du:né Mising kídaré Bharot migomké binam S.T dém pa:la dung.Émpigela Orunasol mimolok du:né Mising kídaré édé Bharot sorkarké binam S.T. dém pa:mang.

 Mising lang Adi kídaré lendo a:do dokkébo opín akkonglokké lenné émna do:yilo dung. Odokké takamé lusudo.Adi lang Mising lokké agom ,yelod daglod,yelam kumli,dungko dakko takamé lékodag.To:dí to:dí lokkébo Mising lang Adi:yé akamdag émna lubosula dung.Émpigela mimat alamlo Orunasol Mising kídarém nérkula lé:paktung.

Adi:yé lang Misingé bírrangé émna do:nyi po:lo ka:poné abí:yané miku kídaré lubodo.Sé agomsé arro.Adi lang Mising lékopé lendogom adí dakor korkampé Misingé adí lédulo korra ainé asi amongko mala,Momín - ga:mínsumapé ansipé du:nam légapé aying amo:pé akke doyarto.Akke adi: amo:loi du:pakkang.Émdaggom agom do:ying lunam,du:lod daglod,gélod bomlod ,dolod tí:lod appídé supagom akammínsutíla dung.Émpila de:ksé sadín dok 1947 dítagdo Pasigaddo Adi-Mising porin ko ko:néng kídaré aipé yebo dagbosula dope porin  kébangko ba:lenka.Édé porin kéba:dok aminém Adi-Mising studentunion émtungai.Édé kéba:dém ba:lenboné kídardéDr.Daying Ering,Matin Dai,Osong Ering,Talom Rugbo,Obang Dai,Tajum Koyu,Susen Pao,Toi Dai odokké yonggam Légo bulu.Sunador Pa:tír bí:gom édé kéba:dok migurkai.Odolo supakké Orunasol mimosém NEFA émdungai.Émpila me:lampé NEFA student unionpé mintoku.Odok po:pé Orunasol amo:so porin kébangé kamangai.Me:lampé édé kéba:dém “All Arunachal Pradesh Student Union” émna mintoku.Po:pé lokkébo Adi-Misingé opín atérkonémpé lusula dung.Mé:pénam agomdé mimat alalmé ope pé:ngula Orunasol sok du:né Mising kídarém lé:paktung.Orunasol amo:so Misingé East Siang,Dibang Valley lang Namsai District ba:umso bojeko dung.

Mising kídarsé Assam bo Scheduled Tribe pé ila dung, émpila bulu Orunasol amo: S.T pé bilamang émna Orunasol migomé ludag.Odokké Orunasol Mising kídarém S.T pé bimapé lé:tung.Odok légapé Orunasol sok du:né Mising kídaré migom lottalo mimagém moyarbomna dung émdaggom migomé buluké mimag arrém tatmang.Orunasol amo:so Mising kídarém non-Tribal émna ludung.

 Mising kídaré migom lottalo kabbisutínam légangki gíné 27/10/1998 do Cabinet committee ko ba:lento.Édé kéba:dok kébang abupé Orunasol mimong dok Ru:mi ru:tum Narmí Gegong Apang mé tolíktungai.Bí aroru:pé Orunasol mimong arasok du:né Khamyang kídarém Khamtipé,Somuwang Mising kídarém Adi Sub-Tribe pé tola bulum S.T binamko ito.Émdaggom Mising kídarém S.T bimapé Misingpéi lé:pakto.

Lékoda  18/02/1992 longkído Mising kídarém S.T pé binam légapé migom okumlokké do:jik aborko la:lenka.Do:jik NO.POL.80/72(VOL.IV) AND ST-5/92 dated 17/03/1995 dokki Orunasol Mising kídarém S.T binamko ru:suka.Édé ru:sudo 1947 dítagdokkébo du:né Mising kídarém Orunsol mimodok S.T pé bipé aido émna ru:sekka.Édé ru:sunamdégom  aso: aso:pé yokpakkangku.

Lékoda gíné 2001 dítagdo Adi Wealfare society,Itanagar lang Mising lok migur gígurboné kídaré migom okumlok botta bottané migom kídaré lékopé du:pumsula Hotel Chandini,Naharlogun lo kébangko Bangka.Édé kéba:dogom S.T ngasoddém ru:sékla:tomang.Édé kéba:do mimodok ministeré lang speaker kídarété dungka.Édé kéba:do Adi Bogum Bokang Kébang,Apexbody of Adi society lo ru:sudopé tolíkto.Édé ngasoddé ngasodpilai du:pakang.

Lékoda po:péké Orunasol mimo:lok Migang Mukut Miti bí ru:mi ru:tum pila du:dom,Arunachal Central Ali A:ye Lígang ém 24/02/2003 do East Siang Jilalok me:r do:lulo Migang Miti mé mité minompé goklíka.Édé longédo migang Mitibí Orunasol mimolok Mising kídarém lomdanna APST pé igorbiye émna togésuka.Odok légapé lomdanna cabinet meeting ko gíné 02/07/2004 do ru:suko ika.Édé ru:sunamdokki Orunasol mimo:so du:né Mising kídarém Adi Sub tribe ila ST pé binamko ru:suto.odok légapé Orunasol Mising kídarém balenamko ru:suto.Édé ru:sudégom aso asopé yokpakang.

Lékoda po:péké ru:mi ru:tum narmí Gegong Apang bí Orunasol Misingém balenam légapé  expert committee ko tolento.Édé kéba:do ru:mi ru:trumdé aíé abupé dusuka.

Odok me:lado secretary society welfare department  é Orunasol prodes ara:sok Mising dungko mongke takamlo:pé DC(Di.Si) kídarém  do:jikko bika.Édé do:jigdo Orunasol Mising Kídarém APST certificate ém issue langka émna lutungai.Orunasol Mising kídarém Adi sub-Tribe pé bidopé lutungai.do:jik Videcircular No.ST-2/2004 dated 25/07/2006.Édé do:jigdém Galo Student Union lang AAPSU é ka:pala Mising kídarémAPST pé bipé lagimang émna  26/10/2006 longédo migom lottalo “Dhorna” bila jé:tumto.Odok me:lalo aso asopé yogangkangku.Édé ngasoddokki Supaksin Mising kídaré APST pé bimapé lé:tung.

Odok me:lamlo Adi Ba:né Kébangé Orunasol Misingém APST pé binam légapé mimongsok  kébang takamlo luposutílang dung.Émdaggom supakpé ngasoddé ngasotpitíla dung.ABK lok migur gígurboné  abu miku bulu gíné 20/03/2016 longédogom Orunasol Mising kídarém APST pé bidopé Mimongsok Deputy Chief Minister Chow Na Mein ríksula kumnam do:jikko bika.

Sémpé dítak dítagém Orunasol Mising kídarém yampo yampo roye roye émna Orunsol migomé samtítla lé:tung.Aru éddíkoda sémpé Orunasol Mising kídarsé duyedan? Kinné pané MBK,AMBK,MMK,TMPK odokké Mising world lusuné kídínga asutko ludum ka:dumsulamanei?Kapé sémpé bíro angé kídarsém jíngamola kémo ru:ruppé du:moyen?Appíngé léko mé:la kangkítoka.

Adnam pangko

1.The Echo Of Arunachal 25/02/2003

2.The Arunachaltimes 20/03/2016

3.TMPK Arunachal Bangke.

Doksiri দকচিৰি, আগষ্ট, ২০২৩