SOLUNG GÍ:DÍ

 

SOLUNG GÍ:DÍ

Bhaigesor Pogag

    Mo:píso turné ngané takamé olung olungpé du:do.Édé olung kídardé gíkumsumyemílo asé:do.Tani: lusuné símínsigom olung olungpé du:la aipé mé:do.Tani:é aipé dola tí:la du:né símíné.Émpila bulu angke ke:la arík ésingém idag.Aríg ésingém idolo sé:koté mo:mínsumang.Takamé aríg ésíngém adílo mosinggorpé émla mí:do.Émpila akoné akoném ríksunané adíém pa:mínsumang.Émpila bulu longékolo gíkumsula asé:la asin do:yingko kíbosula asé:ru:pé doman tí:manko ila gírík ka:ríksunamko mé:lendu:pé.Bulu édé longédo akoném akoné ríksumínsula yirman so:manko idopé molentopé.Édé longédo gíkumsula takamé gíríksula mé:dír mé:soém mitpansula asédopé.Édé gíríksula asé:ng aman domanko longédém gí:díé émna lutopé.

Mo:písok du:né tani: takamé gí:dí po:nungém nu:mando.Adi opín sé:gom angu opín kídarké kísapé gí:dí po:nungém nu:la aipé mé:né opínko.Adí: opínkésin bojeko gí:díé dung.Édé gí:dí kídardok Solung gí:dídé bottapagné gí:díko. Solung gí:dísém longngokopé lo:dumbomdung.Sim si:ro loumkopé lo:dumbomdopété ka:padung odokké édém kosagém baumkopé orpansudung.Édé bulu 1) So:pi -Yekpi 2)Binnyat lang 3) Ékop.

Solung gí:disimé Orunasol mimonglok Adi: opínké a:ng obomsunam gí:díko.Sé: gí:dísém dítak takamlok Septembor po:lolok a:po:pagné lo:níd ara:do lo:dumdung.Solung gí:dí ém aríg ésíng lang Éso Menjegém pu:po jarpo bonam légapé dítag takamém írga:rupé lo:dumbomdung. Solung gí:dísém amli: lígdag me:lampé odokké a:m arígém gatsing mosi:dag me:lamdo lo:dum dung.Sé Adi: opínké a:ng ara:boksin ara:bok asin obomsunam gí:díé. Solung gí:dísém longngokopé lo:dumbomdung.Sém soumkopé abégém békpansutung.Édé bulu sé- 1) So:pi-Yekpi 2) Binnyat lang 3) Ékop 4)Ékop Yaktér odokké 5) Miri yamlíkkunam

Solung gí:dídok kéradanpé igéla ipo:pagnam pébodém So:pi-Yekpi manggom Ardo-Ba:do émna ludung.Édé longédo E:g lang Éso ém odokké Pérogém Da:di Botémé tosagla ardo ba:do.Da:dí Botébí tani: amo:sok turla du:né kídarsim kinam ramnam kamoma:pé kasi mosiné. Bí asé:la du:mílo tani: takamésin asé:la du:dopé ka:si mosila du:dung.Émpila édé longédo bím tosagla éso e:gém ardo-ba:do.Édé longédo Da:di Boté mé:lang Ki:né Na:némé kumsudung odokké Solung gí:díém irobdung.

Solung gí:dílok annyi nané pébodém Binnyat binam émna ludung.Donam tí:nam lang aríg ési:lok ru:tum ané Ki:né na:nébím lutomla édé longédo kumsu dung.Ki:né –Na:nébí tani: amo:so tani: takamém donam tí:namém pírí pírag ma:dopé aríg ési:ngém ka:si: mosi: dung.Ki:né Na:nébí asé:la du:dopé Binyatsim idung.Ki:né Na:nébí asé:mílo amo:so tani: takamké aríg-ésing,E:g-Pérogé,Éso- Menjeg aila du:do.Ki:né na:némé asé:la du:dopé binyat néné po:nungém nu:la,Délong po:nungé nu:la írga:pé gí:díém noddung.

Solung gí:dílok léddarké longédém Ékop émna ludo.Ékop longédo Ékop a:bangém í:do.Gí:dí po:nung nu:tér yumédo Miri abué Ro:bo lang Nyi:bo manggom Abotani:ké do:yingém a:bangki í:bodo.

Solung gí:díém kapila modun odokkésin do:yingko dung-

Adi:ké néku boku buluké lubinamé do:yi:pé dung.Buluké lubinampé Do:ying Boté bí Ki:né Na:némé ka:la ka:bo mé:bokang.Odo Ki:né Na:né bím Totél Moné bí:lang Dubéng Moné émnam uyu annyidé gonnying ayingém ito.Édém Da:di Boté bí kinníkto.Bí ommang appundém uyupé ila la:yugla mopetto.Édé ommapé batpéné appundé betporla dé:jerkang.Édé dé:jersuné appun kídardok a:m pulié sa:ngkang.Édé sa:lenné a:m puli kídardém Ki:né Na:néké aki:lokké appuné émna kintoku.Édé do:yi:dém Ki:né-Na:nébí kinnangkula,Bí mé:ngkang mo:písok turra du:né tani: kídarké donam ngasodé dung.Émpila bí Iki:kokki a:m kídardém tani: kídardém bídopé mílíkto.Édé Ki:né Na:néké bilígnam a:m puli kídardém tani: kídarém lesi:dope bito.Édé longédokké Tani: opíné a:m arígém iropkang émna do:yingé dungkang.

 Solung gí:dílok lukéng-

Solung gí:dísém kapila ngolu lo:dumdoné ém-yemílo mélo konnoké ngoluké néku boku,ta:to ya:yo buluké lubikampé odokké buluké lubinamém mé:nggapkampé Do:ying Boté lang Ki:né –Na:né bínyim mé:po monam légapé amo:so mukkang pélang pédongpé gídumsudopé odokké bottarupé amo:ng arígém burmola asi arígé aidopé émna Solung gí:dísim idung. Solung gí:dísim iyemílo a:m arígé Éso-Menjegé,Éki-Pérogé tornampé pu:po jarpodo émna mé:do.Ta:to ya:yo buluké lubikampé Do:ying Boté bí:lang Ki:né-Na:nébí lékopé tani: amo:so gídumsumílo a:m arígé aipé aido.A:m arígé aipémílo tani: takamé mo:píso anpo mé:pola du:do.Émpila Solung gí:dísim dítag dítaglo írga:rupé lo:dumbomdo.

Sím sí:ro Solung gídíém Ohom-Orunasol mimong annyisok Adi Misingké dungko mo:lég takamlo léko lakkopé ibosudungku.Sikípé léko lakopé ibosunamsi Adi Misingké du:pansuné asiném du:pumsumokunamé.Sé ainé do:yingé.Yampo ro:yépété sikípé Adi Misingé gí:dísimé bomyarla du:lado:pé Do:nyi Po:lo é ayang biyar-langka émna Ru:né Pínékolo kumlígdung.

Doksiri দকচিৰি, ছেপ্টেম্বৰ, ২০২৩