সম্পাদকীয়

Nébíngké Lupénam সম্পাদকীয়.... 

Mising Agomsém Mising Tani:íng Turmopayé

Agomsé opínlok kangkiné. Agomé yogmílo opíné yogdo. Lendo-a:dodokkébo ngolu tani opín kisapé aíém mising opín émna kangkinsunané bélamdé agomé. Sé ngolukké nappa:sok lenné na:nké agomsém kapésinéi yogmolamang. Na:nké otélígnam ané agomdé yogmílo turra du:daggom arré kamayé. Aíké agomki ngolu éddíko mé:po-mé:dír, mé:dug atíém lusarsuladagji odokíddíko angu agomlok asin agomém lusarsulamang. Ané agom lédulo mo:písok oko agomémsin luyisulamang. Sé mo:píso ané agomdémyang tatpoyané gomugé kamang. Dé tatpon agom gomugdém ngolu lutíla du:payé. Asin mé:bo:ém ngolu kapé lusarsula akon asakkélo lukansubidoji édémípé agomsém turra du:mo:pé lunam agom kídídém gomlab mo:pílo adgabla ménam tarungko aidopé la:pé iyé. Ékémam agomsé léko yogyé.

   Gomlab mo:pí:lo gomlab kosakki aíké agomsém paríng rí:mola du:momílo agomé to:dí to:dílo du:yardo odokké sí:rum akonlokké sí:rum akonlopésin léppíré paryonsudo. 

    Su:k anu adí:sé aigammang. Aíké agom do:yingém réngam ara:lo lusarsumamílo réngamé aré kama:n attarém mé:nyoksukanpé mé:nyoksudag. 

  Ngolukké édílopé mising i:yé du:yeji odolopé ngolu mising agomsém lutíla, attíla odokké lusartíla du:payé. Édé agerdém ngolu aíké opín tani:é gersuma:mílo angu opín taniyé gerbimang. Ngolu mising agom luné mising tani kisapé aíwé a:ng dígdanna mising agomsok léppírsém sé:kosin édílosin busanlígla:madopé agom léppíré a:né ke:kondokké a:né kesagdopé odokké aíké opínlokké angu opínlopé, mo:rumlokké mo:pí-mo:rumlopé parjerdopé gomlab alangki agom léppírdém pidyedla mé:mílo amme:sin agom arrém nampala ngoluk agomsém mé:bo:la lulíyé. Édéi ngolukképé mo:písok mising agom kangga:pé ila du:yé. Dépila no-ngo émkamínsuma:pé appíngé mising kisapé aíké ané agomsém lusarnam tarungko ru:payé.

Tapan Lal

Editor, Doksiri