PO:SUM LONGÉ

 

PO:SUM LONGÉ

Dusyonto Noro 

    Tani:lok sinané longédém Po:sum longé émna ludag.Tani:é sidag lédulo bík yalodé uyu amo:pé gídakku émna lunam agomko dung.Édé agomdé éddí:ko arodag édém sé:kosinéi lupí:sula:mang.Sidag lédulo tani:é okolo:péi gídakkusong édém kinbég kinyinné tani:ésin sé:kosinéi lupí:la:mang.Sinamlok ajji:-botté kamang.Sé:koi sipo:yesong édém sé: kosinéi lupí:sula:mang.Sinam adílokki ngolu tani:lok turyingém kíla:mang. Gernam atí atí agerlokpag tani:lok turyingém kídag.Tani:loksin tani:ko  turge:la sinéko sige:la turnéko dung.Tani:loksin tani:ko aíé atéré tursunéko, aí tusuge:la:sin réngamém turboné tani:ko dung.Aíé atèrpé tursuné tani:dém turdaggom siné tani:ko émna lula:do. Aíé tursuge:la:sin réngamém turboné tani:dém sidag lédulo:sin bím turné tani:ko émna lula:do.Songkordeb , Bhupen Da, Tabu Taíd bulu sidu:lang ? Bulu lo:dísém ngoluk ara:lo turtí:la dung, kapila ?  Édé agomdém  mé:mila ka:míloi turdag adído ngolu okkom kapé ipénamé édé agomdém bérogo:pé pa:la:ye.

          Agom Migang Taburam Taíd-bí 2019 dítaglok 17 Agosto longédo sikang.Bík adín-amírdé ngoluk ara:lo kamanggom bíkké bílennam Mising Agom Kébang, bíglennam Mising abíg, adlennam Gompir Kumsung , Gomlam atí atí potin kídí:dé lo:dísém bím ngoluk ara:lo turyartí:la du:moye.Odokki Taburam Taíd buluké kísané tani:ém sige:la:sin turra du:né tani:é émna ludo.Longédoksin longéko ménggépénam longéko du:dag.Longédoksin longéko kumgésupénam longéko kadag.Agom Migang Taburam Taíd-ké sinané longédém takamlokkéi kumgésupénam longéko.Pinyo burné tani:lok onané manggom sinané longédém moí:rtíla du:pénamé.Édémpé moí:rra du:mílo sí:sa:né op:é buluk agomém o:rí:pé kinla:ye. Buluk agomém kinna du:molopagé sí:sa:né ope:é turdag adílok dakorém kormursuma:ye.

      Sinané longé émna lumílo appíngképéi  anguru:pé médírko a:dag.Dokki sinané longé émma:pé  po:sum longé émna lumílo kapé ?  Kapilané  Agom Migang Taburam Taíd-ké sinané longédém Mising Agom Ki:ni Mibangé po:sum longé émna moí:rra gidung.Akon-asag BAK-ésin Ki:ni Miba:lok kísapé po:sum longé émna moí:rra gídung. Édé agomdém takamé ru:segmílo appíngé lékkopé Agom Migang Taburam Taíd-ké sinané longédém Po:sum longé émna moí:rla:ye.

Songkordeb-ké lang Madhodeb bínnyéké sinané longédém dítag dítaglo Songkordeb Tithi manggom Madhodeb Tithi émna moí:rra gídung.Édémí:pé Agom Migang Taburam Taíd-ké sinané longédémsin Po:sum longé émma takamé moí:rmílo aiye.Ngo po:péboi luka longédoksin longéko kumgésupénam longéko kadag.Agom Migang Taburam Taíd-ké sinané longédé atégné longéko, édé longédé to:dí to:dílo kumgésupénam longéko.Kajé Agom Migang -ké sinané longédém Po:sum longé émna lékkopé moí:rla:jé .Bík bige:la gíkunam agom amli:dém asin lotta lottalo gesi geyomla jarmola:je.

Doksiri দকচিৰি, নৱেম্বৰ, ২০২৩