কবিবোৰ প্ৰেমৰ প্ৰযোজক
কল্পনা হাতীবৰুৱা
গোলাঘাট
কবিয়ে আশাৰ জোলোঙাত বিছাৰি ফুৰিছে
নষ্ট নোহোৱা এখন হৃদয়ৰ ঠিকনা
যুদ্ধ নোহোৱা এখন দেশ।
বিছাৰি ফুৰা নাই শোক-প্ৰস্তাব
বিলাব খোজা নাই অসৎ বাণী।
কবিবোৰ হ'ব বিছাৰে প্ৰেমৰ প্ৰযোজক
আশাক বিশাল আকাশ
ভাষাক কৰিব খোজে সহজবোধ্য।
বিদেশত থাকিও হ'ব বিচাৰে
স্বদেশৰেই নাগৰিক
দিনৰ পিছত আহিব ঘৰলৈ উভতি
হৃদয় ফলিত লিখি ৰাখিব
মাটি মানুহৰ ধান, গান, মান
চৰ-চাপৰিৰ মানুহৰ সৰু সৰু আশা।
কবিয়ে নিবিচাৰে ৰাজ অট্টালিকা
কবিৰ মনত নাই আকাশ চুৱাৰ হেঁপাহ।
Doksiri দকচিৰি, ডিচেম্বৰ, ২০২৩
No comments:
Post a Comment