ABUKÉ LE:NÉ MIKSI
Krishno Dole:
Majuli
Oji:pé olen-danna
Ngok alag so:nyi sokki
Borig sutagai asin sok
Aya:nam ojing ko:dém
Silo ngok kéra:so katokumang.
Ngok kéra:so lo:dém amig pinyi sokki
Ka:beksunam atér aobí
Silo ronggam pésamé
Atér aobí kéra:so kama:la
Yupko soraisé kémo ru:ru-é.
Ngo sé: ya:né tupta géné
Abubí édílosin ao-ommang
Migmok ka:pa:ma:bong
Ngo oko imurém ila
Ru:nébí ngom sémpé ngasodé bidun ?
Turra du:dakso ao-ommangko
Léko:da ka:beg yékulang
Sé:kom ngo mé:bom sutaga:ji
Édé mé:bom sunam atér aobí
Sé: ruwadné mo:písokké
Uyu a:mopé ngolum mé:ge:la gíkangku:
Ru:nébí ngom abupé idopé
Édílosin ru:lig toma:
Ngok ya:né tupta:sé atpé:mang
Ao migmoko ka:pa:dopé
Okum érang mé:podopé.
Ngok mé:dírsém bí:pak kindag
Sé:ko ngokkémpé ao-ommangko kamaji
Ru:nébí ommang dumsíko
Kapila lo:tung ayang bimoton ?
Ru:nébí petupé ao-ommang
Dumsík migmoko ka:pa:ma:dopé.
Ngo silo aipé asinsé médírdung
Amiké ao ommang aya:nam ka:la
Lékopé mé:pola du:namdém
Ngom édémpin tuptako
Ru:nébí-é ru:lig-geitomang
Kéra:so ommang aya:nan angko.
Doksiri দকচিৰি, ডিচেম্বৰ, ২০২৩
No comments:
Post a Comment