প্ৰেমে খানে বুকুৰ ভিতৰখন
ত্ৰিৰঞ্জন টাইড
প্ৰেমে খানে মোৰ বুকুৰ ভিতৰখন
প্ৰেমে খানে মোৰ বুকুৰ জগতখন
প্ৰেমে খানে মোৰ বুকুৰ ভিতৰেদি এটা বিস্তীৰ্ণ সুৰংগ পথ
অদৃশ্য পথ
আহ যাহ কৰে
ৰঙা নীলা হালধীয়া শব্দ
প্ৰেমে খানে মোৰ বুকুৰ ভিতৰখন।
প্ৰেমৰ বাবেই ফুলি উঠে হালধীয়া গাভৰু হৈ
মোৰ বুকুৰ অৰণ্য
প্ৰেমৰ বাবেই ফুলি উঠে গোলপীয়া গাভৰু হৈ মোৰ বুকুৰ বনাঞ্চল।
জানাই নহয়
প্ৰেমৰ ভোক আছে
ভোক আছে বাবেই প্ৰেমে খানে মোৰ বুকুৰ ভিতৰখন
প্ৰেমৰ ভোক আছে বাবেই
ভোকত পকি উঠে মোৰ বুকুত দুপৰীয়াটো পকা সুমথিৰা টেঙাৰ দৰে,
প্ৰেমৰ ভোক আছে বাবেই
পিয়াহত শুকাই ক্ষীণাই পৰে মোৰ বুকুত জলোৎসৱ নদীবোৰ।।
এৰা !
প্ৰেমৰ বাবেই
মোৰ বুকুত নুফুলা ফুলবোৰো ফুলিব শিকিলে হালধীয়া গাভৰু হৈ
নবলা বতাহবোৰো বলিব শিকিলে চেঙেলীয়া ডেকা ডেকেৰী হৈ।
তাতোতকৈ এটা ডাঙৰ কথা
প্ৰেমত পৰি
মোৰ বুকুৰ অজলা পাহাৰবোৰেও বগাব শিকিলে তোমাৰ বুকুৰ পাহাৰ
মোৰ বুকুৰ অজলা নদীবোৰেও খহাব শিকিলে তোমাৰ বুকুৰ উচ্চ পাহাৰ।
Doksiri দকচিৰি, জানুৱাৰী, ২০২৪
No comments:
Post a Comment