সম্পাদকীয়,

Nébíngké Lupénam সম্পাদকীয়…..

Ali A:yé Lígangé la: Mimong Bondong Lukermínsunam

(আলি আঃয়ে লৃগাং আৰু ৰাজ্যিক বন্ধ বিতৰ্ক)

 Lutad lusar odokké social media-lo supak airupé o:rípé luposula du:nam lutégdé okko:n émyémílo Ali A:ye Lígang longédo Migom bondong binam bima:nam lugé:dé. Ohom mimo:lok ansí-rékí-né émna amin gíné Mising mo:pínnok aipé mé:bomsunam opín manggom aríg í:rdí Ali A:yé Lígang longédém migom bondong binam bima:nam léga:dém aíké opín ara:lo lukermínsunammém aipé ka:padung.

Mising opíné lendo a:dolokkébo ali a:yé lígang í:rdísém aíké ilod gílotki ibomla dung. Po:pé ginmur po:lo:lok lígang longé:lo aíké imongkampé idungai odokké édílai édílai gallíng po:lo:lo:sin moírnam tarungém idungai émna mising opínnok pinnyo burné tani:é lugéla gídung. Émdaggom 1956 dítagdokké ginmur po:lo:lok a:pongarné lígang longédo moí:rnam tarungém runggitto. Mising opíné dítag dítaglo ali a:yé lígang í:rdí:ém moí:rdag. Ali a:yé lígang longédo takam misingé aríg ísíng inamém mépaggela longé lo:bu:ngko ali a:yé lígang í:rdí moí:rnam tarungém ige:la aí opíné aya:bosula donam tí:nam tarungémsin idag. Ajjo:né ko:ka:lokké miné-míjí:lo:pé lígang longédo rélékpé lenna moí:rnam tarungém idag.

Appíng tani: opínnok aíké opín í:rdí dungkampé mising opínlokkésin aíké opín í:rdí ali a:yé líga:dé dung. Édé ali a:yé líga:dém mising opíné édílosin mépaglamang. Ali a:yé lígang írdí:dé mising tani:lok adín amír i:lo bidmínna dung émdaggom émmurmang manggom édém luyitsunam émgumang kapilané ali a:yé lígang a:yemíloi ajjo:né ko:ka:lokké miné-míjí:lo:pé bulukké angkéng ara:dokké aíé gumrag, oi ni:tomé be:lensudag. Lígang longédo kénong menna doma: tí:ma:pé du:ladaggom dírbí mé:boné misingé dírbí tarungém ima:pé du:lamang.

Lígang paksong so:do:do misi:lok ilod gílod appí:dém paksongki songkanbidag. Lukanpé - aríg inam, rígu monam, ki:rug rugnam, dou ínam, ege: sumnam, mo:rang kénam atí atí appíng ager moimangém ka:po kangano:pé ya:mé mímbíré paksongki songkanbidag. Édé pakso: so:nam kídí:dém ka:yémílo aro:péi mo:píso kangkí:manam paksong so:nam émna lupé ido.

Ali a:yé lígang do:yi:dém bagémpé kíla kíngablamang, lula: lungablamang. Aríg ísíng ijonggela:sin dírbí dírlab dírjo:né misingé aíké opín í:rdí moí:r longédém Bharod mo:rumso bimanggom Ohom mimo:so annyi:né bojeyané mo:pín kísapé mimong bondongko bipé lagidag émna po:pélokké rélékpé mising opíné mimong migomém mimag motíla dung. Mising opíné rélékpé mimag mola ajéng jé:naméidaggom, migomé aya:lai bidaggom bojéko mising du:téng mo:dumlo motumnam bondongém (Restricted Holiday) bidungai. 

Rajnoitik légangéidaggom manggom ngoluk mising opínnok ake: tani: imurkokkiyeidaggom ménnying konnyingké dítagdo aíké mising du:téng mo:dumílo motumnam bondong lagidag émna ajéngém anupé jéngkupé ikang. Édébulu mising opínnokképé kinkurlamanam mé:mo:ko. Aro:dém lupémílo aíké dungko amongí:do aíké tani:ém péka:ma:namé émna lupé ido.

Ékédag dékédag mising mo:pínnok mimag gomugém ménggésula gíbídné 16 nobembor 2023 longkílo Ohom mimong migomé mising du:téng mo:dum Dhemaji, Lakhimpur, Sunitpur, Biswanath, Tinsukia, Dibrugarh, Sivsagar, Jorhat, Golaghat odokké Majuli-dém lutíla kíkum 10 kopé mising du:téng mo:dum ara:lo Ali a:yé lígang í:rdí:dém moí:rdopé aí-mo:lég bondong (Local Holiday) -ém Ohom Mimong Kebine:dé (mirung kébang) ru:sékto.

Ohom kebine:dé 10 kopé mising du:téng mo:dumlo ali a:yé lígang aí-mo:lég bondong ru:ségnam agomém lupa:bidag lédupé mising opín réngam ara:lo ali a:yé lugé:dém lugé:la aipé lukermínsunammém social media atí atí-lo ka:begdung. 

Akke: migom kebine:d runggidnam taru:dém aidag émna toríksudaggom bojeyang mising tani: dokké Ohomsok angu opínésin tolígma:pé iga:lok annyikopéi ope:é lenna lukermínsunamém supakpé ka:pa:tíla dung. Aíké mising arangí:do sémpé pamín ge:mínsunamdé airupé aimané agomé. Sé:komsin ngolu aidag aimang émmapé migom lédulo bérkpé ngolukké do:ri monamdém lupa:bimílo migomésin tatyépé émna mé:do. 

Opín kébang TMPK, MMK, TMMK -é Lutad biné kébang (Press Conference) -ém ba:la réngamém lupa:bidaggom réngamé bulukké agomkídídém mé:tinsulama:pé idung. Kapilané émyémílo Ohom mimongé balenna binam 10 kopé mo:dumo:lo mising tani:yé Ali a:yé lígang í:rdí moí:rnam tarungém ru:mang. Appíng Ohom mimong lukanpé Sodiyalokké Dhuburi-lopé takam misingé lígang í:rdíyém moí:rnam tarungém ru:dag. Dokkésin Bharod mo:rum ara:lok atí atí mimo:lo migom ager (Employees) gerra du:né odokké porila du:né takam mising réngamé bulukké dungko mimong ara:lo ali a:yé lígan í:rdí moí:rnam tarungém idag. 

Opín ako:lok opín í:rdí moí:r longédém mimong bindongko bimanamdé airupéi mé:dírpénam ngasotko. Mising réngamé migom lédu:lo aíké pangkamdok léga:pé mimag monamdé aimané agommang. Édé Réngam ka:si:sulamlok pangkamé (Democratic Rights).

Aí:émsinyang aipé asin mé:bomsunam opín í:rdí Ali a:yé lígang longédém appíng Ohom mimong tani réngamé Mimong bondongko bipé lagidag émna mé:dag. Aíké among ara:ngído aíké opín í:rdíko moírnam léga:pé longé ako appíngém í:r pongkírpé moí:rna:n pa:tékko binamdé aima:n agommang manggom édé réngamém monyognammang.

Silo rélékpé Ali A:yé Lígang longédém mimong bindongko bipé lagidag émna takam misingéí Ohom mimong migomém kumpa:dung. Émpigela migomé lédu: lamkupé oko tarungéméi ru:yésong édépak kanggappénampé iyé.

Tapan Lal