Dumsíg Lí:mang
Dusyonto Noro
Sigela:sin turra du:né tani:é dung. Sikurdag lédudo:sin édé tani kídí:dok aminé mo:píso unjerra du:dag. Turdag adídok-ké buluké gernam ager kídí:dé mo:píso tani asin asinlo unna du:dag.Édé ager kídí:dém lo:dísém kumgésuge:la turnané bélamém síglennané légangé buluké dumsíg lí:mangém murkong bojeko pidlígla modag. Pinyo burné tani:lok dumsíg lí:mangém mola lé:namém kapa:dag. Émpige:la me:lampé dumsíg lí:mangém mosí:la lé:namém anpangkumang.Édémbulum mé:yemílo ngoluk asinang onamsé bagémpé si:lu lu:sa:né asidémpé idag.Asinang onamdém ngolu bulum kapé léngkansuyen? Buluk gerra gíkunam ager odokké gertung ager kídí:dém kémoné muksubé yi:tédma:dopé ngolu kínggí:pé agerém gerpa:ye. Buluk Dumsíg Lí:ma:dém naréng-napu:pé mosí:la lénamko ipa:ye. Bulum sékkai ané aki:lo bíla lékoda mo:píso ola pangkupé lagido émna buluké dumsíg líma:lo yumdí:-ro:dípé angunko romla takamé kumgésupé lagido. Buluké dumsíg lí:mang dung- ko lottado édílai Mitom kébang-ko, édílai lupo-lujar atí atí Mibang agerém gernamko ipé lagido. Édémpé imílo dumsíg lí:ma:lok lottadém ési-néngané buktidma:ye. Buluké dumsíg lí:mang kídí:dém kasí:-mosí:nam légangé angupé Mibang-ko du:pé lagido.Pinyo burné midum aminlok monam dumsig lí:mang kídí:dém naré:pé ka:sí-mosí:la:jé, ainé opínko émna léngkansula:jé.
Doksiri দকচিৰি, জানুৱাৰী, ২০২৪
No comments:
Post a Comment