YI:MANG

 

YI:MANG

Mg. Bhobo Dole:

       Ru:nébí kamang émna mé:yo ataya. Ngolu éddíko lé:si-léromla aiman ager gerduji édém ru:né-pí:nébí migladge:la ka:la dung. Longé komanggom longéko odok yi:mang pa:doku.

      Ataya, galug-gasor géma:do longédok agomém luyo. Ngo murkong bilang kuma:yém ru:né-pí:nébí mé:yingmang.Ngo migom ager gertomang? Bulu néng-milbongé gerdung. Ommangko kamang, sé:ko doyen? Émna Migombí lukang. 

     Ataya, émnai no murkong bikuma:pé du:yen? Dardé da:ré, bikunamdé aido.Nok magbodé:sin longko Kuli érang dodga:do ludagai- bík ajonlok murkong naying li:ying ko langge:la silopésin bikumang émna. Bí gergolo:péi gílíma:bo émna? Ataidém lubidung. 

       Ataya, bipa:yeku? Biyeku. Édílo bilayekisong lula:mang? 

Gua:tiké amo:bém kopagge:la bikupé émna mé:dung. Émpige:la aré béjéko pa:ma:dung. Émna ludolo ataidé lukang-Ataya, mipagdé ganggílo kumnígye émdag émna nok magbodém lubidagai émna ngom ludagai.Ségum pelígyém míjíng soi simang.Bík murko:dém ngo doma:da."Thika"ager geryem okolai geryogdagrung. Okolailok pa:yeku.Ngo turdoso biyerungku. 

      Magbo-baidé aipé luyirdung. Amik murkongém dopa:mang.Amme pelígdo, kumlígdo. Nokkolo pa:manggom omma:lo pa:do.Ru:né-pí:némé sé:kosin lé:silamang.

         Longékoném kabulilok la:binam murkong kodokuém bírokumsudé luka:mínsukang.Érang érang tani:é amik takotpé ikang.Lupo tauka:mínsuma:pé dungka. Anédok dodgang punam léga:pé abín kaidé gokkumsudung. Lékoma:la kapésin ila:ma:pé ila dung. Longékoném among orpansunam agomdém appí:dé ludíng.Abudé méngkamdémpéi orbitung. Akam bírrangém akampé orbimang. Lu:jar amongém Bakonno:mé  bitung. Odokké sin ainé amongémsin bayug bayugla bitung. Ngolum késung podírém bitung.Okolok donamko pa:yen? émna Migombí lukang. 

      Longékoném bírrang appí:dé among orsunam léga:pé gíkumsukaku.Abín omé-magbodé:sin gímíndungku. Míjí:dé tungkí tungkíla gímínge:la ludung. Ngo nolum otag. Ngok agomém tadlang. Sina-tuenapé íwa ba:lungdém odokké sé karmi abung ru:yi:ké among appí:sém lé:tung.Odokké okko among-mo:lung kígo:du:n? Míjí:dok agomé ílíng tubgodé. Lí:mang dinggodé.Sumnyopé gíge:la Mensaru:pé ao kídí:dé gílattoku. Odokké....? 

     Longékoném atér aodé ukumí:do yari: yarmanna dungngai. Oddar lí:né-kampon po:pírko appun alégdo déngangkang. Édém ka:pa:la ko:dé mé:pokang.Mé:pola bí po:pírdém edgappé émna  surug-sarag émma:pé rumíndung.Po:pírdé amí:dokké akon amí:pé dé:pagdung.Bí:sin déngko déngkodo:pé gímínna dé:pagdung.Léddarpé bí buluk ukum yabgodok molígnam yogír girildo po:pírdé dénggapkang. Édém mamínna Migomké aodé re:sa:mínna lakke: asongko yogír girildo yukepsuto. Bagpé po:pírdé appun aglékpé déngkangku. Bí édém ménpípé émna béryi:dokudo lake: asongko bersotsuto. Odokké.......... 

       Édém piyyang ajé:dém tatpa:sula ludung. Ataibí yi:mangém pa:to.

Doksiri দকচিৰি, জানুৱাৰী, ২০২৪