সম্পাদকীয়,

Nébíngké Lupénam সম্পাদকীয়….

 ÉKÉR (স্বাস্থ্য)

Ékér émyémílo ésang édula kima: ramma:pé du:namo:dé émna émumné taniyé mé:dag. Arorupé lupémílo édémong ékér émna lumang. Ékérlok lukéngé bojeko dung. Amír aso ésa:la, mittunglok ékér ésa:la, mé:dug kisapé ainé, réngam du:lod kisa:pé ésang édula du:namdém ékéré émdo. Tani:lok lagiyapagnam atta:rdé ékéré. Ékéré aila du:ma:mílo taniyé édílosin mé:pola du:lamang taniyé aiyopé oko agerkosin gerrra:mang. Mé:po:la du:namdé ékér aila du:namlok bottayapagné kusereulyé. Dépíla ngolu lo:dém mé:po:la du:yírsupén ido. 

Mé:po:dé okolokké a:don émna tauyémílo ngolu lupé ido mé:po:dé ainé mé:lodlokké a:do. Ainé mé:lod, ainé ager gerlod, adílok agerém adílo gerbídnam odokké a:ng ara:bo sé:komsin méngkeb-mé:rebla mé:ma:pé, méngkín-mé:míném mé:ma:pé mé:po:la du:mílo tani ékéré aipé írga:pé nganna du:do. 

Ékérém aila du:monam léga:pé ngolu rokompéla: yumdéng ayirpé míryirsunam agerém gerpénampé idag. Su:k anu adí:so murkong lédulo taniyé dugmínna aíké ékér agomémsin ka:si:supénamém mitpansudung. Édébulu airupé aimané agomé. Ngolu bojerungko mo:ma:pé du:daggom rokompéla yumdéng ayirpé ada: gonta manggom ek gonta:ko míryirsupé ipérung lagiyé. Lo:dém míryirsunam, yoga, saikel dugnam, lamté gínam atí atí agerém gerné tani:lokké kinam ramnam a:mang émna medical science-é ludung. 

Amír, Asin odokké Ayid édé aumdém ngolu kampo:n kagojémpé lo:dém narépé kampola du:mo lagiye. Odopag ngolukké ainé ékérko dung émna lusulayé. Mo:pí:so oko atta:rém réla pa:la:maji édéméi ékér émdo. Ékérém réla pa:la:yamílo mirémné taniyongngé silo turra du:yai. Émpigela mirémné tani:ílo kinam a:namém ka:pa:yadag. Kapilané bulu íddí keloriko do:nam tí:namém dodag-tí:dagji odokkídíko agerém germang. Ager germa:rubong dok tayépé lamté:kosin gímang. Édé tani:kídí:dé kinamé a:ma:n, sékkélo a:don. Aipé ménggappénam agomko - “Ngolu mirémdaggom, opan tani:lok do:lod-tí:lo:dém dopayé, édé ékér aila du:monamlok kusereyé.”

Ngolu aíké ékérsém ésang édula du:monam léga:pé lo:dém rokompéla: yumdéng ayirpé amír míryirsunam, yoga, lamté gínam tarungko ipa:ru:yé. Dokkésin Ékér ésa:la du:monam léga:pé ají:moné donam tí:nam, Doger donam odokké yubmi pí:dopé yuppé lagiyé. Ékérém sé:kosin mosi:bilamang manggom rélígbilamang. Aíwé kinsula ka:la tadla donam tí:namém dopayé dokké ayirém la:lenna míryirsunamém ipayé.

A³ (Amír, Asin odokké Ayid) kídí:dém aila du:mo:lané tani:kídí:dém kínggíné ékér ainé taniyé émdo. Édé aumdém aimonam kuseredé sémpé -

Amír:  Amír aila du:mo:nam léga:péblo:dém míryirsunamém ipayé.

Asin:  Asin aila du:monam léga:pé lo:dém mé:po:sakpola du:payé. Turnamsé lo:nyio:ngko, po:péké manggom a:péné agomém mé:la méngkín-mé:mín mé:ma:pé yadag adí:sém mé:po:la dungkinpé lagiyé. Dok léga: ainé potin, ainé ajoném jonpé lagiyé.

Ayid:  tani:lok amír, asinko dung-gela:sin ayitko du:do. Okodém ngolu sidag lédu:pésin tani:ko dungngai émna mé:tinsudo:ji édém ayidé émdo. Ayidém ansí-reki:la du:monam léga:pé taniyé kumnam tarungém idag. Kumnam émyémílo ru:né-píné:mé kumnamoudém lumang. Arorupé asin jinga:danna kumyémílo ngolukké tani ayidé aipé ansí-reki:la mé:po-méngandag. Édé mé:po-méngandé ngolukké anu bélam siglanna ager gerrímoné kínggíné a:ngé.

Ékér ésa:mola du:mopémílo ngolu lo:dém ager gertíla du:pa:yé dokké mé:po-mé:nganna ajon lédulo yírma:n-so:manna du:payé.

Tapan Lal

Editor

Doksiri দকচিৰি, ফেব্ৰুৱাৰী, ২০২৪