সম্পাদকীয়

 

Pogolo Poyirnané Agom Kísapé Mising Agom éla: Réngamké Gerpénam

   Pogolo Poyirnané agom kisapé mising agomsém anupé su:pak bojeko lupénam kama:bo:. Mising du:téng pobug pogolo aíké ané agom misingki poyirla:dopé migomé tolíkpé lagidag émna 1979 dítagdokkébo Mising Agom Kébangé mimagém motíla dung. Su:lo:pé lupémílo kíkum 45 dítakkoi ikabong. 45 dítag lédulo Ohom mimongé mising agomsém 23 Pebruari 2024 longkílo “Medium of instruction” poyirnané agom kisapé mising agomsém Ohom Mimong kebinedé tolíkto.

   BJP migomlok Ru:tum mirung Dr. Himonto Biswa Sorma dokké Kin-go mirung Dr. Ronuj Pegu-ké ager tarung ara:lo mising agomsém mimong kebine:dlo tolígnamdé arorupéi do:pínlok tadgénam longéko émna lupé ido. Ané agomsém turyarra du:monam léga:pé monam mimag ako pa:pírto émna lugomsin lubatsunamé émna lugumang. 

   Mising ané agomsé sukké Anu kin-go dítag 2024 April po:lo:lokké migomé tolíkkampé pobug pogolo Poyirnané tarungém gerrubbomyebo:. Airupéi ainé agomé mising omma:lok nappa:lo ané agom misi:lok ponamém tadbegyekubo:. ABD… manggom A dokki A:ye, B dokki Ba:bu, D dokki Do:lung émna ponamém tadbeg/ka:begyekubo:. Airuné agomé NEP 2020 dok dungkampé ané agomki ko:kangém poyirnam tarungém Bharot mo:rum appí:soi irubyé.

    Pobug pogolo ané agomki pokainam tarungém la:dag lédupé mholukké Mising Agom Kébang, Mising opín kébang kídíng dokké mising réngamlokké gerpénam ageré bojeko kadung. Édé agerdok lupodanna lupémílo lupé iye longé longélo “English Medium School” la:lenna taru:dém. Siyum siro do:lung akolo Migom iskul ako du:mílo English iskul annyi aumko du:dag. Édé English iskul kídí:dém ngolu mopem morenbilamang édé arro. Émpigela ngolu English iskuldok ko:ko:néngém dítag akko:lo Mising migom iskuldopé la:lad ladukku. Dok léga:pé Mising agomlok poyirpémé Poyirné Abu/Ané kídí:dé aíké ommang émna méngkitsudanna a:ng dígla pokainam tarungém ipa:yé dokké po:lo:lo MAK manggom opín kébangé  SMC (School Management Committee)-ém dumsula darmosunam kébangém ba:pa:yé. Odo sé:kosin aíké ommangém murkong bila English medium iskullo ané abuyé mélígmayé. 

   Arodém lukapé gímílo Su:pakké migom iskullo aipé kinjo:né TET pa:sné MA, MCOM, MSC pa:sné kinjo:né Poyirné Abu/Anéyé dung. Bulum MAK igurki ainé Training-ko binam tarungkosin ipé lagiyé. Édémpiné dekko kin-go pe:le:lok ainé tarungé dung édémbulum takam misingéi tolíkpé lagiyé dokké leke:lok tani kisapé pogolo ommangém mélíggela okolai ka:ni tí:la du:nané adí katokumabong. Poyirné kídíngé aiyopé pokaima:mílo odokké bisarémsin la:namko kínggípé kapayé odopak mising du:téng pogolo ainé quality education-ko pa:layé.

Tapan Lal

Nébíng