MISING AGOM KÉBANG BA:LEN DO:PÍN

 MISING AGOM KÉBANG BA:LEN DO:PÍN

Dusyonto Noro 

   Po:pé Mising abíg kama:dolo Ohomiyang manggom Roman abíglok asin ara:bok mé:nam agomém atkansudungai. Ohom amo:lo:pé ko:rad mokapé  odokké  yelam atí atíém bomjarnam légangé gíné Ingraj Migom kídí:dé Mising agpmém Roman abíglok atkandungai.Odídok Ingraj Midum-lok adnam Potin ékké-

1) Miri Grammar, W. Robinson, 1849 dítag.

2) Outline Grammar of the Shaiyang Miri Language, J.F Needam,1886 dítag.

3) A Dictionary of the Abor-Miri Language,, J .H Lorrain, 1907 dítag.

Odok lédupé Ohomiyang agomlok adlennam Mising Potin amin ékké-

1) Miri Duwan, Sonaram Miri Mohori, 1915 dítag

2) Miri Duwan, Dhormanodo Tamuli, 1917 dítag.

Tayéngké atkannam Potin kídí:té Roman manggom Ohomiyang abíglok Mising agpmém adnam yabgoém odoboi morobito émna lula:do.Odo adído Mising agomsém lékkoné alamlok adnané ili:-ikamko kamangai.1968 dítagdo Gua:ti amo:lo Gua:ti Mising Kébang émna ba:lenka. Odo Kéba:dok du:pongarné midum kídí:dok yammin kídí:dé-

Taburam Taíd-  Abu

Bhrigumoni Kagyung-  Abu Oi

Nahendro Pa:dun- Nébíng

Bhobo Kt. Dole: - Nébíng Ame:

Phukon Pe:gu- Goggurné

Ajon Kídí:dé-

Susen Dole:, Rounsingh Sayengia, Debeswar Pe:gu, Sunadhor Dole:, Bolin Kuli,Noren Dole:, Binud Pe:gu, Tomburam  Dole:, Jugeswar Dole: Tepuram Taíd, Banesor Mili, Kulodhor Kutum, Mohesor Pangging, Uken Pe:gu, Debesor Noro, Bormota Oyengia, Girish Dole:, Madhob Pe:gu, Jogot Ba:sing. 

 Gua:ti Mising Kéba:dém ba:lendokkéi Mising abíg bíglennam do:pín agomdé aipé kínggí:la gíkang. Gua:ti Kébangé Mising abíg-pé okodém tomílo aiyen dok léga:pé Ohomiyang, Dewangiri odokké Roman abígdém anka:la ka:nam ager tarungém langka. Édé taru:do la:pongardanna Nahendro Pa:dun-bí Ohomiyang abíglok Mising Bhasar Lipi- Ek Porikiyamulok Asoni émnam Potinko la:lenka. Édé Potin-dé Mising agomsém adnané abíg-ko lagiruyé émna mé:namko takam-ké asinlo a:moto. Odok lédudo Nahendro Pa:dun-bí Ohomiyang abíglok Mising agom luyir émnam potinko lékoda la:lenka. Dewangiri abígdé Mising gombe:lo lékoma:la édé abígdok anka:nam agerém itomang. Ohomiya:dok lédulo Roman abígdém anka:la kangka. Dok léga:pé 1970 dítagdo Roman abíglok Mising agom ayyir émnam potindém Taburam Taíd bí:lang Nahendro Pa:dun bínnye la:lenka. Gua:ti Kébangé atérpé Mising abígdém bíglenla:ma:ye émna mé:la 1971 dítagdo Jonai amo:lo abíg agomdém rusuka. Odok lédupé Sibsagar Disagmukh-lo:sin 1972 dítaglok 17 éla: 18 Eprildo takam réngamé gíkumsula lonnyiko Mising abíg bíglennam légangé ru:suka. Odo Mising abígdém tolennam légangopé Mising Agom Kébangém ba:lento. Édé ba:lenponam Mising Agom Kéba:lo du:né midum kídí:dé-

Taburam Taíd- Abu

Durgeswar Dole:- Abu Oi

Nahendro Pa:dun- Nébíng

Di:ram Kumbang- 

         )- Nébíng Ame: Kumsu

Bibhison Pe:gu- 

Dembi Bori- Murko: Ru:tum

Durga Regon- Ajon

Rotnesor Pérme - Ajon

Bikramsingh Yein- Ajon

Torun Sondro Pa:me:gam

Bhupen Pe:gu-  Ajon

Bolin Kuli- - Ajon

Bhrigumoni Kagyung-Ajon

Boksiram Morang- Ajon

Horisoron Pe:gu- Ajon

Indesor Pe:gu- Ajon

Durga Mili- Ajon.

     Mising abíg tolenamdé Mising Agom Kéba:lokké gerpongarnam agerpé ikang. Disagmukhlo ba:nam Kéba:do dítag aum ara:lo Mising abíg tolennam agomdok lujardém  Kéba:lo biangkupé lagido émna Mising Agom Kébangém tolíkto. 1974 dítagdo Dhemaji Kolejlo Mising Agom Kéba: lokké ba:pongardannam Mirum Kéba:dém bangka. MAK-lok Kéba: Nébíng Nahendro Pa:dun-bí dítag annyi lédulo Mising abíg tolennamlok lujar agomdém odo Kéba:do takamé ru:suka. Édé Kéba:do Mising abígdok tayé:pé lo:nnyiko ru:su namém ika. Odo Kéba:do:sin ru:segla:ma:la Mising abíg tolennam légangé “Ru:seg Kébangko” ba:lento. Édé Ru:seg Kéba:do du:né midum kídí:dé-

Taburam Taíd- Abu, MAK

Ajon Kídí:dé- 

1) Nahendro Pa:dun 2) Durgeswar Dole: 

3) Rotneswar Pérme 4) Gubin Médog

5) Puspo Pe:gu 6) Bibhison Pe:gu

7) Indesor Pe:gu 8) Anondo Pe:gu

9) Dimbeswar Dole: 10) Di:ram Kumbang

Édé Kéba:dé Po:lo aum ara:lo Mising abíg tolennam lujar agomdém bia:langku émna ru:sekto. 

  1975 dítaglok 28 Eprildo Lokhimpur mo:dumlok Bamun Dolonilok ba:nam Ru:seg Kéba:do Roman abígdém tolíkto. 1978 dítaglok 5 Nobembordo  Dhemaji Kolej-lo ba:nam annyiné Mirum Kéba:do édé Ru:seg Kéba:dok runggiddém tolíkto. MAK-lok édé annyiné Mirum Kéba:do Roman abígdém Mising abig-pé tolento. Mising abíg tolendag  lédudolo 1979 dítagdo Gogamukh lo ba:nam MAK-lok aumné  Mirum Kéba:do BAK ba:lennam agomdém ru:sekto. Odogarké mo:tag mo:taglo MAK-é BAK ba:lennam ager taru:dém tolento.

Doksiri দকচিৰি, মে, ২০২৪