ANÉKÉ AGOMÉ ASIN ARA:BOK AGOMÉ

 

ANÉKÉ  AGOMÉ ASIN ARA:BOK  AGOMÉ

 

Bhaigeswar Pogag 

   Ané agomdé midum, réngam, dírbí, opín manggom mo:rumlok kangkinsunané. Ané agomki oko opínlok tani:éji édém bérokpé kangkinla:do. Aropé lumílo agomdé:sin bottané dírbíko. Sém agom dírbí émna lulado. Agom ara:lo mé:li: mé:lod,to:dí to:dílok yenam dagnamlok yelod daglodé du:té dag.Ané agomdé to:dí to:dílok bomgabla du:nam yeli:yekam, luli: lukam odokké dírbí dírlabém légo kísapé oríksudag. Kumríksudung, gogríksudung, toríksudung, dagríksudung, Krisno krisno, ba:bé, na:né, kaiyé, baiyé, ta:toé, ya:yoé, ma:moé émna amín minla manggom yammínki gognam kídardém ané agomki gogdo. Sémpé gomukki gogla akoné akoném asin mé:namdé lusatsudo.Alag pigapla manggom gomgabla gogma:pé gomukki gogladag. Édé agerdém anéké lubonam gomukki gogyemílo aipé tatpodag odokké mé:podag. Ané agomki gogyemílo asinangé omínsudag. Édémpé gognamdé bigyanik  lukéngésin kadag. Akonké lunam agomdém akoné tatkinma:mílo alaglok pégyab ga:yabla gokpé idag. Édémpé pégyab ga:yabla akoné akoném upkímílo akonké kinamé akonlo a:yonsulanggom ilado. Tatkinam gomukki gogmílo ogyab ga:yappé lagimang. Akonké bemaré akonkélo:pésin gíyonsumang. Po:pé okum bare:lo kumríksudung, welcome, swagotom émna adla lé:namémgom ka:pa:dungai. Sim sí:ro kukuror pora habodhan (Íki:ém ansulangka) éna adla lé:namém taon bojarlo du:né okum kídarlo ka:pa:dag. Édégom kinpénam agomé. Agomlokké gom du:téng dakténgé kasudag. Oko du:télok tani:é kapé kísapé ludoji, édémí:pé édé du:té:lok  tani: kídardé tatkin-mínsudag.Agomlok adíégom kasudag. Oko gompirdém oko adí lupé lagidagji, édém ka:la agomém ludo. Édé tatkin-mínsunam agomdém  buluké ané agomé émna lulado.Agomlokkésin  luli: lulamé  kasudag, oko  du:té:lo du:doji édé du:télok  ané agomlok alamé kasudag. Mibo amo:lo ngoluké ‘ainé rokom’ émna lunamdém  ‘good morning’ émdag.Aropé lupémílo ‘good morning’ dé ainé légapé lukanbonamko. No si:roké ro:sok Do:nyiém ka:pa:tolangka. Siloké longéso ainé agerko gertolangka émna kumlígnamko. Ané Do:nyi:mé rokompé gé:robla  ka:podanna ka:mílo adín amíré lardo, Asiné mé:podo  odokké Do:nyi:kémpé lo:dísém oktiém pa:do émna mé:do. Émpila Misingé Do:nyi Po:loké migmolo ayad agomém lu:mang. Atíko momur germur sumílo Ané Do:nyibí ka:langka,Abu Po:lobí ka:langka émna pelígdo. Édé asin ara:bok  ménga:la lunamdémgom ané agomki ludo.Tatkinma:nam agomlok pemílo aropé pelígdu:né kísapé mé:sumang. Édémí:pé  aíké ané agomki aima:dopé pela odokké tadguma:nam gompirém anéké lubonam agomki lula gali parimílopag asiné mé:podag. Ainé aima:né gompir kídardé:gom anéké lusi:bomnam ané agomé. Édémpiné gompir kídardémgom ngolu gompir kumsulo mosi:la lé:pénamé. Agom ako turra du:pé édé agomdém luné tani:é du:pa:ye. Luné tani:é kakuma:mílo édé agomdé aíé yokpaksuye. Luné tani:é kamamílo agomdém okopén? Agom kamamílo kapé kangkinsuyen? Agom ako yokpagmílo édé agomdém luné opíndok dírbí- dírlab,Lulod-Mé:lod, daglod-yelod odokké buluké réngamdok turlod kídardété yokpagmíndo. Émpila agomém turmola lé:pérung idag.Agom kama:né opíndém ami: opíné kangkin-la:mang. Ané agomdé appíngém-yang aiyané agomé. Kapila émyemílo ané agomdé poriné ko:ka:lokképé atmobissak odokké jugyotangém léngkansubodag.  Ané agomki poraimílo poriné ko:kang kídardé:lang porainé abu kídardok ara:do bérokpé kinbég bosudag odokké aroru:pé arang luké:dém  kinnadag.  Resarj mola odokké an-go ka:nggola du:né  agom  bigyanik kídardé    ko:kangém ané agomki poraimílo aiyadag émna ludung.Ko:kangé poropsa:dolo ané agomki porai ma:pé mibo agom ingrajiki poraimílo ko:kangé porikolo asin ara:bokké lenné gyandém bérokpé kinbégla:mang. Porainédégom bíkké mé:namdém mé:ngkampé lusadbila:ma:pé idag.  Aropé lumílo ko:kalo  Agom lang Gomlam  kídardém kinnamdé anéké olendokkébo odokké oté:lígnam kinnané émna ludo. Bulu gompir kídardok lukéng kídardém ané agomki lubomílo bérokpé  kinnadag.Bulu ame: ame:né gompirki rémagné gomlam kídardémgom kindag. Ko:kangém ané agomki kinnam gompir lang gomlam kídardém aiyompé lukaimílo mibo agomdémyang ané agomdém bérokpé kinnadag. Kinnam agom dokki lukaima:mílo poriné ko:kang kídardé kinkolo ngasodém pa:dag. Kinné pane abíng buluké lukampé okumdo lubomsula du:nam agomki poribegma:mílo ko:kangé bottané ngasodém pa:dag. Okumlo ané-abu, bíro-bírmé lédulo yirman so:man bosudolo lunam agomki ko:kangé poriko iskullo poraila:mílo atí ngasod kama:pé kinnadag.

     Ko:kangém ané agomki kin-go kinmonam odokké poraipé lagidag émna tolíkla Amerikabokké mibo montiri Hileri Klington bí bíkké Bharot mo:rumso:pé gídolo luka, sok légapé Amerikabo supaksin lukermínsula dung.  Hileribí,Jebhiyor Kole:j lok poriné ko: kídarké lédulo lupo-tauko inamlo bísin gídumsuka. Kin-go mediam  légapé  Hileri Klington bí  ané agomki poraila:mí aidag émna mé:dag.Niuyork taon ara:dok bojeyang iskulé Spenis, Sainis, Rasian agomlok poraidag. Bojeyang réngamlok tani:é ko:kangém ané agomki poraipé aido. Ngasoddé Niuyork taon ara:so bangkí bangkí agom kinné porainé tani:ém bojeko pa:lamang. Amerika bok kin-go ngasodém Hileri bí luka Amerika so kin-go légapé bojeko murkongém piddag, émpigelasin  ko:kang kídarké légapé ngolu atíkosin mola:ma:pé idung. Ikunamé, ko:kang kídardé lédula du:pakpé idag.Amerikabolo poriné ko:kang kídardé  bojeko akammínsumang.Bí lukang-Bharot mo:rumsé technology education lo mo:písok aiyabandag.

Rumaniya,Denmark, Misor démpiné ledu mokutsuné mo:rum kídardé:gom bulu aíké ané agomki porainamdé aíké mo:rumlok aiyané émna mé:sudag.Spen lang Latin Amerika bok bojeyang mo:rumé Spenis agom ki poraidag.Japan lang Jarmani démpiné ame ame:né mo:rum kídardé:gom aíké agomki bulu porainamém idag. Bulu Technolgy odokké non-technology takamloi mo:písok tadgéla du:nam mo:rumé. Si:n, Rus, Phrans mo:rum kídarégom hayar idukesonémgom ané agomki idag. Bulu aíké ané agomki porila buluké mo:rumém mo:píso tadgébola dung. Anu anu abiskarémgom  mobomna dung. Émpigela mo:písok giyan-bigyan, Gonit, Yuga, Adhyamik  gyan bila jogot guru émsuné mo:rumsok guni gyani émsuné tani: kídardé mibo agom porila bottané émna lusuné kídardé anu atíko molenéi la:ma:bo,Kalidaské mosi:la lé:binam Songskrit agomdéméi yokpagmopé idu:bo.Asom mimo so:sin Asomiya agomém Uttor-Purbansol so yokmopé idu:bo.Ame: ame:né agom kídardémgom mibo agom kídardé metpakpé idu:bo.Sém bulum ka:yemílo adí du:dakso Mising agomsémgom mosi:ma:mílo mo:písokké lomdanna yokpagma émna lulamang.

Mo:písok mo:rum takamé aíké ané agomki pori unila aíké mo:rumém unnoti bodung,émpigela Bharot odokké Asom mimosa kapila ilaman?Mo:rumsok sí:sané yame: miyum kídarém buluké ané agomki higher technology,bigyan lang medical science mo:rumsé sadíndokké silolo:pé ilatomang odokké ilaboye émnasin lulamang.Supakké anu education policy 2020 dítaksok molennam ayonki Mising agomsém mosi:la:ma:mílo édílo:sin mosi:lama:ye.Émpila asin dígdanna Mising réngamé agomsém 2023 dítak ara:so Mising dungko do:lung iskul kídardo poraimodo ipaye.Mising agomsokki alo mírsi réla doné, Okum érangém turbola du:né Mising mastor kídar agomsok légapé asin odanna daglenboma:mílo Ané ké agomsém ko:yadé yattíd-yebong.

Doksiri দকচিৰি, মে, ২০২৪