ধানৰ থোকৰ দৰে
গায়ত্ৰী দেৱী বৰঠাকুৰ
পিতাইৰ পথৰুৱা দেহত
জীৱনৰঙী এটি গোন্ধ
গোন্ধটোৰ সতে
মোৰ এই একাত্মতা আজিৰ নহয়
আইৰ হালধীয়া কথাবোৰ
সেউজীয়ী আশাবোৰ
আঘোণৰ পথাৰৰ দৰেই গৰ্ভৱতী
এই ৰঙবোৰৰ সতে মোৰ সহৃদয়তা
হয়তো পুৰণি মোতকৈও
আই
পিতাইৰ শাওণৰ পথাৰখনতো চোন
তই ৰুই থোৱা এবুকু ভৰুণ উশাহ
যি হালধীয়া কৰিব খুজিছে মোকো
আচলতে কি জান আই
ধানৰ থোকৰ দৰেই জীৱনো
এদিন সেউজীয়াৰ দৰে গজি
ক্ৰমাৎ মোট সলায়
সীমাহীন চম্পাৱতী হালধীয়া
শেহত গুঁজি যায়
Doksiri দকচিৰি, জুন, ২০২৪
No comments:
Post a Comment