AYANG ABO

 AYANG  ABO

Krishno Dole:

   Majuli Nolduwar do:lulo Takar odokké Karbug émnam bíro kumsuko lékopé okum bomna dungai. Pu:mi asi bidyudla bulukké donam tí:nam bojérungko ngasod angkang. Émdaggomsin odo ara:ngído bínyik omangkí:dí:dém do:ludé pobug poko iskul kama:la taonno lé:dag. Takarké omé ako odokké Karbukké ao ako.Takarké omé amin punsang odokké Karbukké ao amin miro migom. Bínyi taonno pola du:dag. Longékoné Takarké omé Punsabí kolejlo bik ba:buké ajon Migomké ao Bikasmé kangkinsula aipé mé:mínsudag. po:lo pu:m Lédílo Punsabí kolejlok kentindo bik ajonkídílok Lédílo sa: tíngkapé gídag. Odo tídagdo Bikas kéla bík ba:buké potudém news pepardo ka:beg sudag. Punsabí ka:beg sugela mé:motsula gídakkung. Odokkéi aso asopé Bikaské kéra:dopé gítokumang. Bikasbí mala ma:ram suge:la longékoném Punsamé Bikasbí ríksula taddag odo Bikasbí taudag " Punsang no kapila ngom duksu:dun? Okkom méyingkan? " Odo Punsa:bí ludag Bikas nok do:lu okolon no kinsudan? Bikasbí ludag Ma: ngo kinmang . Punsa:bí ludag no nolduwar do:ludokké, no réngamsok murkong kané Migom Dole:ké ao Bikasbí. Nok ba:bubíla ngok ba:bubí ajjo dokké ajonai. Longékoném pu:mi assé bidyudla do:lung réngamé ngasod angkang. Do:ludok nok ba:bo la ngok ba:bubí do:lung réngam ainam légangé néng so:bo 50 kopé tortungai. Odokké do:lung tani:kídíngé bík farmdo 20 kopé ager gerra okum bomna dola dungai. Longékoném Jomidké partié gige:la so:bo okumdém ummém ruligla so:bo odo 20 kopé tani:sin sidag. Jomidbí pulis goge:la  nok ba:bom makanalo lé:modag. 10 dítak Lédílo Makanalokké gílenge:kula nok ba:bubí do:lulokké gípakkang. Odokké silopé nok ba:bumé do:lung réngamé kangkeimang. Émpila silo kolokké ngom riksupé émna mé:yobong. Nok du:téng angudag ngok du:téng angudag. Émge:la Punsabí gídakkung. Kíníd longé me:lampé Bikasbí nolduwar do:ludok Takarké okumdopé gídag. Bikasbí aro agom lubisumapé okai research mokapé gídung émna lula du:dag. Longékoném Takarké kéra:do do:lung tani: aum appíko gíge:la ludag Takara ngoluk iskuldé openkang émdag ma:lang kapé iyén? Odo Takarbí mé:dírra ludag Kapé iyané Do:lung tani: ako luyépé a:m kumsung kéyigdoi pomolai. Buluk lukamunsu:namdém tadgela bikasbí Takarmé odokké do:lung réngamé gokkum sugela pobug poko iskulko anupé bikasbí mobidag. Odok Lédído Punsabí ponam pongabge:la okumpé gídakkung. Punsabí okum gílakkung Lédído Takar taudag O punsabí no gínampé gíngku:bone lékoda gíladyékune? Odo Punsa:bí luyépé ba:bu ngo gílatkuma:bong, ngo do:lungíso ajon aron goksuge:la réngam kampon agerko gerpé émna mé:dung. Émpigela ngo gídakku:do:do ka:toném do:lusé aipé naré-péséla aila du:je. Odo Takarbí luyépé Do:lung ngasod ka:la ru:nébí aya:sula ko: ako méligbitag. Bík kokki sé: do:lusé émpé naré-péséla kangkan kangkung. Odo ayirdo Bikasbí ru:m  ara:dokké gílendag. Odokké punsabí ka:la asoritdag. Takarbí Bikasmé gogdag Bikas ko so:pé gítog. ( Bikasbí kéradopé gídag) sé ngok omé Punsabí odokké omé sé: bikasbí ngoje: nom lubikané. (Takarbí édémpé lugela gípagdakku) 

Punsang Bikas no kapila sé: do:lusopé gídun? 

Bikasbí luyépé Ngok do:lungém ngo kasí-mosí sukolo gídung. Punsa:bí luyépé O mélo-konno:pé aíké do:lungém kinsuma:né tani:dé édílokké nok do:lu:pé ikan? Ne: ngok légangé ngok okum érang tani:kí:dí:sém moyatkolo gídun?  Aiyopé lubidung supaksin ayir dung lomna sokké gíkangkung, ngo édémpin koné:mang dei .(Édémpé lugela punsabí gípagdakkung. Longkon ro:do takarbí a:lém gíla du:yépé, odo ayirdo Takarké bíro Karbugbí kéra:do gíge:la luyépé) Bottan kai méyum Miro migombí gídungkung, Ngom na nok yígnémé taonpé gíboyékung émdag. Arro agomdém lumílo ngo nolum mége:la kapésin gílímang. Noi nok yígnémé luyirkítei. Takarbí (Médírra luyépé) Karbuga no ngok aya:nam bírro. Ngonyi ané akko:lokké lendung. Nom ngo luyir la:dag, nok né:dém kapé ngo luyiryén? Odokké miro migombí gíboyékung émdag édé ainé agomé. Gígom okolopé gíyén? Taonpémíné gíboyékuné. (Kablí sa:la odokké takarbí gípagyupé. Longkon ro:do gípébong émna lenna du:dag. Karbug bíla né:dé ge:mun lumun sula du:dag. Odo ayirdo bikasbí gíyala luyépé nolu asopé du:potok. Ai nani:ya no taonpé gíyé gíkang ngokké lupénam okkosin kamang. Émpigela agom ako tadgapto, taon gíla no bottané okum, bottané gari, Ac ru:mno du:payé. Émpigela noluk siddí longéko lékopé dungge:la ayang bimínsunamsé lékoda pangkuma:bong. Yampo taonnokké asinang ola léko kangka:kupé émna gíyékupé odo no minompépag iyékupé noluk leke aya:kí:dí:dém édílosin pangkumabong. Odokké bíro anyidok ayang rí:bídém binsod moyog émge:la Miro migomké kéra:pé gíge:la luyépé " miro migom no taonno nok ou-ba:bumé du:bo kupé émnamdém ngo aipé tadlík sudung . Émdaggom bulum gíboku:mapé do:lungíso murkongko bila ka:mílo aimayéné? Odokké Takar, nom ngo tatta:gai do:lulokké sékai gípag yémíloi no bus stationpé gímín gímína luyirdungai émna. Silo nok Bírodémei luyirsulang yampo kapé do:lung tani:yém luyiryén? Amme okko émna tadyén? Ngo okai lumur daggom ngo méyin subilang émna lugela bikasbí gipagdakkung. Odokké taon gímapé Takarbí la Karbugbí aginké dungkamí:pé lékopé du:dakkung. Odokké Takarbí luyépé Bikas nom ngolu asin asé:ligdung silo bínti:né rí:bídém lékoda paksed sutokung. Punsa:bí luyépé bikas ngoluk okum érang appíngém léko moga:lok asé:ligdung. Odokké Bikas méla Punsa:mé Mising yelam ilod gílotki da:ro midang mobila bidag. Odokké popéké ajon Migom bíla Takarbí ríksulangkula kédan mitur modakkung.

Doksiri দকচিৰি, আগষ্ট, ২০২৪