মিংমাঙলৈ কেতিয়া আহিবা
ৰীতে ৰিদম
মিংমাঙলৈ কেতিয়া আহিবা
তোমাৰ বাবে পাৰি থৈছোঁ
সেউজীয়া দলিছা
মই পাহাৰ হ’ম
তুমি নদী হ’বা
মিংমাঙলৈ কেতিয়া আহিবা
তোমাৰ বাবে উদযাপন কৰিম
পাহাৰৰ সেউজীয়া উৎসৱ
মই ছাঁ দিম
তুমি তাত সেউজীয়া ঘাঁহ হৈ গজিবা
মিংমাঙৰ বতাহ বৰষুণ আৰু শিশিৰৰ টোপালত
যৌৱনমতী হওঁক তোমাৰ দেহা
মিংমাঙৰ নিৰিবিলি ছাঁত
তোমাৰ স’তে যাপন কৰিম মোৰ ভালপোৱা
পাহাৰে কোনোদিন অহংকাৰ
আৰু অভিমান নকৰে
সাগৰৰ দৰে বহল
আকাশৰ দৰে বিশাল এখন হৃদয় আছে
সেয়ে সকলো সুখ আৰু দুখৰ
সতে বিনিময় কৰিব পাৰে
সেয়ে মই পাহাৰ হওঁ
তুমি নদী হোৱা
চিৰদিন চিৰকাল
মোৰ বুকুৱেদি বৈ থাকিবা…
Doksiri দকচিৰি, আগষ্ট, ২০২৪
No comments:
Post a Comment