সম্পাদকীয়

 Nébíngké Lupénam সম্পাদকীয়…..

Pu:mu Asi:lok Ngasod odokké  Ngasodlok moyinla:nam

  Ohom mimo:so Pu:mu assé dítag dítaglo tani réngamém pu:yudbomnamdé émmum agompé idubong. Anguru:pé a:né ru:yilo du:né Mising réngmém pu:mu assé aipé ngasodmodag. Ngasod arangílo du:pénampé idag. Mo:lung gonggo-sigo pu:mu asi:lokké Ohom mimong manggom mising réngamé silopé édémarpé kabokanné du:pítsula:nam tarungko ru:lenna:mada. 

    A:né ru:yilo du:la ko:ka:dokkébo asiémbulum bangkinna aíké turyingém mopítsula:daggom turla du:nané dunggéng ukum, aríg-ísíng, among atíém motumsulamang. Dítag dítaglo pu:mu assé bida:la mising du:téng amongém rago ko:pagbomgalok amongé ajji:tíla gídung. Rago ko:manam among kídí:dosin pu:mu assé sulliém bidrumlígla assé téyi:dakkugom aríg atíém ikupé kabokuma:pé ila aríg iné mising réngamé dítag dítaglo ngasod miksém dípénampé idung. Édébulu bottaruné ngasodé.

   Mo:lung gonggo-sigo ngasotkídí:dém mégélasin milennam gonggo-sigo ngasodéi bojeko kadung. Arodém lupémílo síddí longéko migom manggom réngam igé-gígéboné mé:tinsunam tanié ngasodlo ngasarsunam tarungém bojeko ru:bodaggom ngasodé yogma:pé idung.

    1931 dítagdobo Pu:mu asi:sém airupé pésokannam mo:lung gonggo-sigo ngasotko émna lukanbitung. Ju:n Julai po:lo ara:lo pédongé obadla “Yangtze River” a:nélokké bidlenné pu:mu asi:é Si:n mo:rumém bidyudmomnamdém mo:písok pésongaryangkannam pu:mu asi:é émna bérokpé lukanbitung. 

  Tébí:la bidné pu:mu asi:sém émmumpé mé:namdé aimané agomé. Pu:mu assé tani:ém bitkegelasin turra du:né tanilok among atíém rago ko:pagbomla aríg ila turné tani:ém kogola domonam lukané bojeko dung.

  Gíné dítag kídíngídémpé su:kké 2024 dítaksosin Ju:n-Julai po:lo ara:lo takam Ohomso pu:mu asié pu:yudla tani réngamlokké dungko dakko gagéma:pé idung. Mising du:téng Majuli, Dhemaji, Lakhimpur, Dibrugarh atí atí mo:dumlosin pédong onam aba:la assé tésa:dung. Brohmoputro a:né assé tébadla tani dungko do:lu réngamém bitpen-budrendung. Ukum, aríg, lamté-péduémbulum lumbu:dung. Pu:mu assé réngamém pu:yudbomdung. Amig migyabo:lo okumém bitpendung, so:bo menjég odokké okumlo o:nam simín atíé dungko dakko kagéma:pé inam kídí:dé arorupé bojeko mé:dírpénam ngasodé. 

   Lo:dém sémpiné mo:lung gonggo-sigo ngasod lédulo pamínsunamémpé du:namsém migomésin aipé ka:simanggalok réngamé ngasodla dung. Pu:mu assé dítag dítaglo pu:yudnamsé mo:lung gonggo-sigo:mang, so ara:so Tani réngamkésin imuré bojeko kadung. Aí turyingodém mé:sula ísíng atí tékkudla odokké ka:mi tadmima:pé olo tolo jajja:d industry atíém molígnamkídí:désin gonggo-sigoém pílenmonam légangko.

  Tani réngamé mo:lungém aya:ma:mílo mo:lungésin tani réngamém aya:ma:ye. Ngolu mo:lu:sém ka:si:ru:pé lagiyé dok léga:pé gené mo:píko ngolu molenpérung lagiyé. Déma:lío migomé, tani réngamé pu:mu assé a:ma:yépé émna motauri atíém among ílíng gétumdaggomsin ngolu gétumpísulama:yé.

   Pu:mu asi:lokké ngasod kama:pé du:pémílo do:lu: réngam tani:éla migomé aiyopé luposugela kinbég togé:sukankanpé ngasokídí:dém moyinsunam tarungko ru:payé. Odopag Ohom mimosok tani réngamé pu:mu assé pu:daggom mé:pola du:laye.

Tapan Lal

Doksiri দকচিৰি, জুলাই, ২০২৪