KARBUG TAKARKAI NO
Tuladoi Pa:yeng Taíd
Dungai nok asindo takar karné do:mírko
Dungai nok amírdo po:lo lolad ladnéko
Do:mumné do:mírém ga:lo:la lolad ladnéko
Agom migang ba:bubí miki miki midumé darmoto amik darmoto
Noggíng unné Agom gomlab aríng rí:boné
Noggíng bétténé amíngé ké:né paríng rí:tané
Noggíng ngolukké ménggé mé:tinsula kumgésukko
Nok onané nok sinané longé adílo takamé kumtom kumye
Dungai nok amír adinlo unjigla unnéko karpun pulipé inko
Dungai nok ara:lo Mising réngamlok dírbí dírlapko
Ainé dírbí bélamlo loladdé laddo mo:rum mo:pí:lo
Nok ager agomé bidné ansi:né assé bidyartíye aín turyingé
Agom migang ba:bukolok kinníngélang pa:língé du:papkang
Sé mo:pí:sok do:nyi po:lo do:mírtok takar karné bík asindém
Mo:pí:so réngam ara:lo lékoda buglenteikui karbug takarpé
Pogo pobuglo ukumko di:sayepé nok aminki unna du:dopé
Noggí ngoluk régam gambo gompir gombug gomlabbé
Noggí ngoluk dírbí dírlab a:né abungé bidyarné
Mising réngamké kangír kanggang dumsíg mogmo mité migangé
Nok onané nok sinané longngé ainé lolad ladné longé
Okoko bila kumgésuye:n po:sum uyu tani:nom
Pidlígbito Mising Agom amli:ém anu asinki
Dakorém korgéboto Agom gomlapki dírbí dírlapki
Agom migang ba:bumé kumnané kama alaglo
Lunané kama Agom gompiré
Édaggom bímmí: kumgésuye ménggésuye
Mising réngamké Agom ba:bumé Agom miga:mé
Doksiri দকচিৰি, আগষ্ট, ২০২৪
No comments:
Post a Comment