NOM NGO KA:LÍNG SIYÉBO

 

NOM NGO KA:LÍNG SIYÉBO

Digen Taid

Majuli

Nom ngo kang-kí kuma:nam

    Bojerung-ko ika:bong,

Nom ngo ríksu kuma:nammé 

    Abarung-ko ika:bong.

Nom kang-kíkupé mé:la:sin

    Ngo ka:pa:tokumang,

Nom ngo ríksukupé mé:la:sin

    Ríksuru: la:toku.ang.

Nom ngo lupénam agomé 

    Gasumko dung-kang;

Ngokké kíbisupénam do:yingé

    Kírusupé du:pakkangai.

Lupé lupé mé:la:sin nom ngo

    Lubisula:tomang nom,

Kíbisupé mé:la:sin oi aína

    Kíbisula: toma ngo.

Ngo:dan sipé turpé idu:bong

    Ka:líd ka:pang-kuma:la,

Asinang simadnémpé idu:bong

    Aínnom ríksukuma:la.

Yumdéng ayir a:yémíl aína no

    Okol kapé du:doné,

Asinangé oyémíl no aínno

    Se:komé no ka:doné.

Mé:bom sunama no ngom

    Lékonképé gogmanggom,

Nom ngo asin onam bojedung

    Kang-kapéna gípébong.

Yumnyi yumumko du:yupsul

    Ka:lí:namko ka:pébong,

Ngo:sin lupé, no:sin lubisung-ka

    Aogom lésul méyobong.

Doksiri দকচিৰি, জুলাই, ২০২৪