সম্পাদকীয়

Nébíngké Lupénam সম্পাদকীয়….. 

Poyirné  (শিক্ষক)

  Tani Réngamlok Mé:tinsunam ami:kídí:dok mé:tinsuyangarnamdé Poyirné ope:dé. Réngam ara:lo lukainéko manggom gerkainéko kama:mílo réngamé jí:yuddo. Kapiné réngamlo kin-go loladé latkanma:ji, kapiné réngamlo luyirné, poyirné kama:yeji édé réngamdé édílosin pu:po jarpomang manggom.

   Poyirné poyirsuné ko:ko:néngongém ainé tani:pé imonam léga:pé poyirnam tarungém ru:dag émna akke mé:dag. Arodém lupémílo poyirné ope:é kin-go pe:le:lo éddíko kíngablama:nam angkeném tani réngamém bidagji édémyangsin de:kko réngam jarsa:bonam agerém gerdag.

    Ko:kangé agom lukinsula lékor korkinsula pogolo gídagdokké ‘University’-lo:pébulu poridolo:pé poriné ommang kídí:dém kapé aiyopé kanggab-tadgabnéko, lukai-gerkainéko poyirné abu-anéko lagidagji édémí:pé sé lo:dém yanga:la gíné réngamsé su:k anu adíso kínggíno Poyirnéko lagidung.

   Su: sémpinékosin ka:begdung - Poyirném pogo du:ri arango:lo ménggénamém ka:begdag. Mo:roné mo:pílo:pé gílenyekubomíloi poyirsuné ommangé poyirném kapé ménggé-tadgé:pénaméji édémbulum kinkuma:pé idunémpé andag. Édémpé imílo aro:ru:pé tani: réngamképé aimané agompé iyé.

  Sé tani réngamsé appíngké agomém mí:tinsunanggom poyirnélokké agomém mí:tinsudag. Kapilané poyirné tani:é édílosin luo agomém lumang. Poyirné aíké léga:pé okkomsin mémang. Okko du:ji appí:dém poyirsuné ommangém odokké réngamsém rémsa:bonam léga:pé tomsagdag. Dépila Poyirném mombati émna ludag. Kapilané poyirnékídíngé aíém ugmígmosugela amme:m loladmodag.

   Poyirnélok asin mé:jo mé:lapkampé mé:jo mé:labné naréné asin géné tani:é sé: mo:píso angu tani:é kamang. Poyirné édílosin tani: ako manggom réngamsém jí:yuttoka émna mé:mang. Dépila Poyirné kídíngém mo:písok oudyapagné tetko ungkelo tedmodag.