LUTUNG AGOM

 LUTUNG AGOM

Bhaigeswar Pogag

  Rim jim rim jimpé oné pédongé.Arunachal mimong sok bojeyang di:té ben-yagla bédu bédangém opinna lé:tung.Édé pédong ara:ngído Lokhimpurbokké miboé ngokké éra:sopé gídungai.Su Assam amo:lo Díyu bondo bitung émna Namsaipé sa:la Paramsuram kundo ,Golden pagoda odokké resort kídarlo gígola ka:ngkolo gídag.Ngosin Lokhimpur mibo kidardém Tung Tao resort pé gíboka.Édé longkídé Yí:lé po:lolok 21/07/2024 longkílok Do:nyi longéai.Ngolu Tung Tao resort dokké longé 2 adído lentoku.Oddar mobile dé kring kring émna  béngkang.Mobile dém jo:sa:la ka:namé Dr.Ghana Kanta Lagachu émna amindé lendag.Ngosin hello  sa:r émna goktatsuto.Émpéi sa:r bí ngom pensam pensamlo pu:nki  luposudagai.Édé longédo:sin aginkémpé bí luposujon kísapé lumanna luposukang. Sa:rbí ainam aimangko tadge:la  ngom sémpé lukang-”Bhaigeswora ngolu Namsaipé gípé mé:dung.Okolok gímílo aiya:yen? Ngolu Pasighat sokké gípé mé:dung.Dambuk,Anpum ,Me:r Namsing Gadum odokké Do:yid Pu:mi:pé émkodo:pé gíye.Do:yid Pu:mi:dé Mising légapé do:pín kané amongko.Turdago:so Mising do:pín do:ying kídarsém makumsula ka:pé mé:dung.Ngokké turgakso Longgíng do:yi:sém aiyompé mo:sisulangamílo aiye émna mé:ngkí dungai.Émpigela leke kémpé mé:pí gerpí:langkumang.Parasuram Kundopé gígela gíladlangkula  ka:pénam amo:ng kídardém kanggoye émna lukang.Yumédo du:yupsumílo dungko ainé hotélém pa:yenéi?Ngolu okum érangé gíye.Resort kídardé aidag-ye?Donam tínam kídardém da:m dag-ye?Taddung Namsai amo:dé bojeko kanggo:pénamé  dung émna.Ngolu érang appíngé yampo len-pé mé:dung.Ngolu gílenmílo nom pu:nko moyeku.Ayir pa:mílo Golden Pagoda,Tengapanido ka:ríksulapé.”Odo ngo Namsai sokké do:ying kídarém aipé bérok bérokpé  lubito.Sa:rbím luposupa:la aipé mé:pokang.Porsuram kundo,7KM resort,Tung Tao resort,Nam wan water plant odokké Namsai amo:so du:né Mising do:lung kídardok do:yingém tauga:lok édémsin lubito.Sa:r bí ngokké kíbinam do:ying kídardém tallai aipé gílí dung émna lukang.Sa:rbí émpigela Parasuram kundopé gítosong gíma:song  ngo kinníktokumang.Ngosin pu:nko molatsukumang.Bí:sin ngom  pu:nko moko tokumang.Sa:rké lédulo luposunamdé asutko angudagai.Bí abíng kísapé luposumangai.Bí aipé jonsunam ajon kísapé luposudagai.Édé longédok luposunamdé aropé mitpansulama:na:m luposunakoai.Do:nyi ka:po:nédé ka:po:néko,Po:lo ka:po:nédé ka:po:néko.Sa:rbí édé longédo  aséng aséngpé luposudagai.Po:sum Daktor Ghono Lagasu abu:bí 29 Julai 2024 (Akon longé) longkído ngolum takamém mé:pagla dé:né péttang kísapé mo:téng amo:pé dé:ngkangku.Bí Longgíng éra:sokké mé:nggé-sunam miga:rungkai.Bíkké dungkumanamé Longgíng Gu:mín ara:so ronggamé pésamé émna mé:sudung.

Longgíng abubí asutko turra du:tuamílo Longgíng éra:sokké ager tarungém bojeko gerboya:pé.Bíkké mé:ngkí ageré mé:ngkípé  du:pakkang.Bíkké gertung ageré gertu:pé du:pakkang.Lutung agomé lutu:pé du:pakkang.Longgíng abu: no Do:nyi ya:ro mo:bang tolopé,Po:lo ya:ro mo:bang tolopé,

Ésaré bi:bipé no  mé:pola du:langkubo.Édung érang,ommang-osoném, Mé:ngkutsuyo-bongka,Arum-ajon, médung magboém ka:ngkut suyo-bongka.Sa, aipé, abu: no agínpé, agínpé tani: amo:so nom mé:pa:tíla du:la:dopé édí:la du:molangka.

Bí pétom Longgíng éra:sokké abu:mangai. Bí Adi-Mising réngamsokké mé:nggésunam abu:rungkai.No okolai du:dogom aséng agampé du:langka émna Do:nyi Po:lokíng kumlígdung.

Doksiri দকচিৰি, ছেপ্টেম্বৰ, ২০২৪