AHOM ÉLANG MISINGÉ KÉRÍKSUNAM

 AHOM ÉLANG MISINGÉ KÉRÍKSUNAM

Bhaigeswor Pogag

   Aku Sodiya rajyolok péyang sanggo danpé  du:mínné adi: opínlok opín ako Mising opínsé. Édé Mongolio ope:lok lenné opíndé Bromoputro a:nélok sokko pélang sanggolok adi: kéíg kéíkpé du:yarbomla  Obonori dokké ila Siang mongkelo:pé du:lubbom bomna du:dungai.Édé Mising opíndém aying tani: kídaré ba:nyikopé lupansudag. Adi: Mising lang Aying Mising émna. Adi: Mising kídardém Hills-Miri  odokké aying amo:lo du:né Mising kídardém  plain Miri émna.Mising tani: kídadé Ahom kídarké gíama:dagdokkéboi  Asom amo:lok Bromoputro a:nélok péyang-sangga:lok aying amo:lo du:bomna dung. Mising kídaré aying amo:so du:dogom Ahom kídarém  17 to:dído:pag Mising kídaré bérokpé ríksutung. Odok po:pé Mising kídaré ahom kídarém bérokpé kétaksumangai. 

   Bharot do:pínlo (1228-1947) adi: tani: kídardém ka:ríksudo dokké bulukélo réngam kísapé yemínnam légapé  dítag aré bidopé lukang.Ahom migomé Mising kídardém ‘posa’ bidopé lukang. Émpila Mising kídaré dítaglo Ahom migomém dítag Posa bidungai. 

   Émdaggom Mising kídaré aying amo:so:pé gíyi:la Ahom mimong ara:lok do:lung kídarém mimag ajéngém jé:tídungai. Aying amo:sok mipag do:lung kídardém akromon motídungai.

  Joydwoj Hinghoké migom dodag (1648-1663 to:dí) do:gom Ahom kídaré lamté lang asikokkigom Sa:yangiya Mising kídarém mimag  modopé Ahom hoinigém  Mising do:lu:lo:pé mílíktí dungai. 

   Édé abhijan kídardokki Mising kídaré Ahom migomlok do:yingém talla Ahom mimong ara:lo du:mínpé émna togésupé ikang odokké migomém aré bila dumínpé ikang. 

Ahomlok migom suhungmung (1897-1539 to:dí) do Sutiya mimongém rotpagdokké Mising kídardé Ahom migomlok mimong ara:lo du:pé ikang. Odok po:pé Mising kídaré Sutiyang mimong ara:lok du:mínné réngamai. Ahom kídardé aying amo:so du:né Mising kídardém Sodiya Miri émna ludungai. Kapila émyemílo Sodiya ataglo Ahom kídardé buluké rajyodém bomnam légapé bulu Sodiya ageblo du:né Mising tani: kídardém dépé ludungai. Sodiya ara:lo du:né Mising kídardok épug abjoné kídarém buluké hoinikpé la:nga dungai. Bulum kari émna yammíném bidungai. Sodiya Mising kídardém Sodiya khuwa Gohainké kéíglo lé:dungai.

 Émpidaggom 1665 dítagdo Bromoputro kekono:lo du:né Ahom do:lung kídardém Mising kídardé mopen moren bila émé rompag bidungai. Édém tatpa:sula Ahom Migom soktodwoj hingho bí bulum aglí:la Ahom hoinigém mílígla Mising tani: kídardém umgapto  odokké do:lungém mopen moren bito.Mising tani:ém bojeko umgabla  Ahom makanalo tumna lé:to. Mising kídaré Ahom migomém molatsukunam légapé Nyising biro kídarém tomsuto. Mising kídaré Nyising  biro kídarém ajon jonsulangkula dítag 1665 do Ahom hoinik lédulo mimag ajéngém jé:to. Ahom hoinik kídardé édé Mimagdém tora:sula ma:la ngetkursukupé ikang. 17 to:dí me:lamdo 1683 dítagdo Sodiya khuwa  Gohain ké okumém émé rulígla bojeko Asomiyang tani:m  moketo. Buluké do:lung kídardo po:la rotla do:lung kídardo ngasodém a:moto.

   17 to:dí pagdo Mising kídaré ahom kídarém momínsula motabla mé:dír ngoasotpé imopé mé:dungai. Émdogom me:lampé  mé:poé a:ngkangku. Ahom kídarké lulígnamlok Nauboisa Phukhon bí Mising dungko do:lung kídarém motumnam légapé ali géyetsula Mising tani: kídardé kumríké mipag do:lung kídardém momin-sulang-kuma:pé ikang. Odok me:lamdo Mising kídaré Ahom migom lédulo momín pamínsuma:pé  Ahom mimong ara:lok do:lu:pé du:mínpé ikang. Buluké lédulo du:mínna Mising kídaré Ahom migomém bojeko agerém gerdumsula dungkang.Noga odokké angu angu adi:lo du:né opín kídardokki lu:yi:sukang. Posa binamdokki buluké hoiniklo ager gerdopé la:nga:líkto. Ahom kídaré adi: lang ayingsok do:yingém kíbo lubodopé Mising kídarém kotoki yammíném bito. 18 to:dídok kéra:dandokké Ahom amo:lo Mising kídardé mopen morennam agerém gertokumang. Mowamari mimagdo:gom Mising kídaré Ahom migomképé ila dungkang.

Doksiri দকচিৰি, অক্টোবৰ, ২০২৪