MÉ:PO:LA DU:LAI
Digen Taid
Lo:nyiko turra du:dakso no ngolu
Íbum íbumna éddíko sí:sa:so
Mé:dír payégém lamkulo géla
Ami léng-kanna ngolu du:tíyén.
Mé:dír arangí:so mé:Pola du:lai
Ngasod mé:dírém mé:paksupo:lai
Asin apígém araipé gékinsupo:lai
Sí:jon ajon kídínga méng-kinsulai..
Édé a:péné longé long-kéng légangé
Í:rga:né ngokké jonnam ajon kídínga
Nolusin ngolusin aíké aíké po:yarlo
Mé:jubla méngge:la méng-kutsupo:lai.
Oríng otedém ngolu kango:suma
No-ngolu ané abuké ge:namko
Akonpagé ngolu méng-kin bima:dung
Supakkolokké aropé ngolu mé:ju:sulai…
Korbo:la gípénam bédangé kadung
Silo, yampo yayangé ro:ro: yayangé
Gíbad gíbadla gítíla dung ayiré
Kadu:bo ayiré ying-ngo longgo:ko...
Akkoné amaném pa:nam légang-ki
Kajé abíg bíkkí bíkka: minsupénamé
Síroké ayirsém lékoda pang-kuma:yé
Mé:pég mé:légla semínlosin kaboma:yé...
Ngolum oné ané abu sasibulukké
Díglígnam ayangém ngolusin kinbilai
Píkagné nappa:dém, mikkorogné amigém;
So:le:né dumsígdém le:lad molang-kujé...
Ngolukké nébír bírnamko bulum ka:moi
Aré amaném pangge:la mé:pol du:lai
Ronggamné lottado mé:po loladlai
Takamé lékola anpo ka:pola du:lai...
Doksiri দকচিৰি, জানুৱাৰী, ২০২৫
No comments:
Post a Comment