Nébíngké Lupénam

 

Nébíngké Lupénam সম্পাদকীয়………

Mising Sports Carnival-sé Mising Opínlok To:dí Kangga:pé Du:ye

Mising opínlok anu sí:rum ope:ém ainé turying bédangko léngkanbimam légangé Takam Mising Porin Kébang (TMPK)-é bottaruné a:ng mé:lotki mé:la gíbídné 2023 dítagdo kínggíru:né yari í:rdíko ru:lento. Édé yari í:rdído takam mising opínlok anu sí:rum manggom anu sí:sa: ya:me mímbírlok 14 éla: 19 kéíglo turtag ko: ko:néngém aíké akemarém anka:sula aíké turying bédangko aíém la:lensumonam légangé TMPK-é Mising Olympic émna anu tarungko ru:podanna ru:lengela 2023 dítag arangído 25 oktubor lokké 27 oktubor longkílo:pé Mising Olympic émna mising yari írdí:ko í:r pongkírpé moí:rnam tarungém ilento.

   Mising Olympic émna po:pé minnam amindém su:pag anupé Mising Sports Carnival-24 émma min-yodgekula 2né tarungém 2024 dítaglok 28 nobemborlokké 1 Disembor longkílo:pé í:r pongkírpé 18 kopé yari kosagém ika. Édé yari í:rdído takam mising du:téng mo:dumlokké kíkum 3,000 kopé yari yarné ko: ko:néngé imínnam lutaddé mising réngamképé írga:né lutadé. Opín akolokképé édémyang ainé agomé angupé okko du:bo:n ? Arorupé édémpiné to:dílo:pé du:péné ager taru:dok léga:pé TMPK írroi.

    TMPK-é aíké opínlok anu sí:rum ope:lok léga:pé ru:lennam Mising Yari Í:rdí (Mising Sports Carnival)-dém takam mising réngamé írroi émdanna asin ara:bokké kínggíné bottané ainé tarungko émna tolígdung. Arorupéi TMPK igurki inam sé yari taru:sém ainé tarungko émna takam Ohom mimo:sok yari yarjo:né odokké pinnyo burné tani:ésin aidag émna tolígdung. Sémpiné yari írdí:lok ngolu bojerungko poriné omma:lok aíké akemaré éddíko kíngkídagji anbegla:dag. 

    Arodém lupémílo yari yarka:mínsunamlo:pag poriné omma:lok appíng kalodlok kakamém pu:po jarpomola:dag. Lukanpé - amírlok ékér, mittunglok ékér, mé:dug minyong, réngamlok minyong, migéné minyong, keriyar siglensunam atí atí aíké turying pe:lelok ru:ségém seglensulanam a:ngém yari yarné tani:é bagémpé ru:ség seglensula:dag émna pinnyo burné tani:é lugéla gítung. 

   Yari:sé tani turyi:lok turying ajoné. Sí:sa:né ommangéla: poriné ommango:é yari:ém yarmang. Aíké turyi:dém aipé mé:bosuné takaméi yari yarra du:pénampé idag. Ainé ékérki ai kampopé turra du:nam léga:pé monam yoga, amír míryirsunam édébulusin yari:lok kosagé.

  A:péné longélokké agom do:ying mé:nosunam manggom lédu lamkom mé:nyo:sunam mé:lotki TMPK-ké mé:lennam sé yari í:rdí taru:sé to:dílok mé:lotko émna su:pag takaméi ludung. Sé taru:sém ru:lendag lédudokké Mising sí:sa: ya:me:sin su:pag aima:n atta:r lukanpé - bhang, sikhor, sigaret, gutkha atí atí donam tí:namém odokké ‘mobile video game’ khelina atí atíém mépaggamgekula Mising Sports Carnival-lo yari yarka:mínsunam taru:lo aíké aminém bíglíksunamém ka:pa:dung.

   Mising du:témg mo:dum, mo:taglo bangkí bangkí yari kosagém yarka:mínsumogela odogbuluk pagya:pagné kídí:dém “Grand final”-lo yari yarka:mínsumogela aidopé yari yarjon kídíngém balennam ko: ko:néng kídí:dok aro-tamkan kídí:dokki mo:rum, mo:pí-mo:rumlo yarka:mínsunam yari:kídí:do langala:dopé TMPK-é mimong, mo:rumsok Sports Association lédulo lupusunam agerémsin gerra dung émna kinnadung. Édébulu arorupéi ainé ageré.

    Mo:písé bojerungko mo:pín opíné dung. Appíng mo:pínlokkéi aíké poriné kébangésin ka:dung émdaggom édé kébangkídí:dé atékpé Mising Yari Í:rdí (Mising Sports Carnival)-émpiné kínggíné tarungém ru:lennammém ka:pa:ma:da:.

   Bharot mo:rum ara:so Mising opínsé:pag atékpé sémpiné yari í:rdí tarungko ru:lenpodupé. Arorupé sé Mising Sports Carnival (Mising Yari Í:rdí)-sé mo:pín ope:lok poriné kéba:lok la:lengarponam yari í:rdí tarungémílo sé TMPK-ké ru:lennam taru:sé ngoluk mising réngam arangolo to:dílokké to:dílo:pé du:ma:ye. Sé Mising Sports Carnival (Mising Yari Í:rdí)-sé mo:písokképéi to:dílok kangga:pé du:pagye. Sa: édé:bo:.

Tapan Lal

Doksiri দকচিৰি, ডিচেম্বৰ, ২০২৪