NO ARO TANI:MANG

 

NO ARO TANI:MANG

                                     Digen Taid

                                            Majuli

Nom se:kobíy luyén

No tani aokoné: émna

Nom se:kobí:nung luyéné

Mising ommang koné: émna

Nolum ngolu lula:ma:yé

Ngolu nom mé:lígla:ma:yé

No ngolug aíké opín sokké

I: kané ommang ékkéda émna.

Mibo galugdém géyémíloi

Nom ngolu kapé luyén

Gonro ugonko séglíksuyémíloi

Kapé ngolu nom méggésuyén

Mo:písog ang-kané migang koné émna.

Ngolu nom kang-kindung

No ngolug aíké dírbí dírlabém

Ngolu bírbo péma:nékoné

Ankin dung ngolu lubomsunam

Anéké aínémpin agomkídí:sémsin

Tayum bílumna no lulí:ma:nékoné.

Ngo nolum kang-kindung

Porin sí:sangém, mimag ajoném

Mimé,ané bérmé ope:yém

Ansín asilo jí:yudla ka:lígnéko,

Ngolu nolum ka:tíla dung

Ngolum oné na:némé nolu

Mé:tin ka:tin suma:pé nolu

Mé:tid samtíd bomnéko.

Nolukké kísa:pé nolum ngolu

Kapésin lékorém korbadmoma:yé

Ngolug méng-kam méng-kampé

Ngolu kapésin gíyar moma:yé.

Nolum, bulum, démpé imílo

Ngolu mé:tin ka:tinsuma:yé

Ngolukké appíkké mé:lod ara:lo

Lékoném émpéi lakkopé du:mínpa:yéku.

Doksiri দকচিৰি, ডিচেম্বৰ, ২০২৪