A:DUNGKU LÍGANGÉ

 

A:DUNGKU LÍGANGÉ

Rahul Chandi

Anu dítagé a:la

Ginmur po:lo a:dung,

Gimur ésar sarra 

Ali-a:yé a:dung.

Ali, enge ngeke:yém

Guni a:m amliyém,

Legod, pidgod léga:pé

Moninamsudung,

Dítak dogo léga:pé.

Do:lung kekon-kesakpé

Bé:dung dum dumé,

Gumrag gumrag gum gum rag,

A:dungku lígangé gum gum rag.

Mé:pola paksong so:dung

Miné-míjíngé ya:me:-mímbíré

Kinné-ko:kang kinma:pé.

Ni:tom paksong so:namki

Pédong ésaré sardung,

Ésar pédong onamki

Mo:pí amongé burdung.

Yubngaksula du:né a:yé

Lomgésula kinsudung,

Otsur anné nginena

Borígsudung lígangém.

Péyi-péttangé modung 

Lígang ni:tomém,

Lo: lo: le lo le

Dabo: lo: le lo le.

Lo:dém sanna du:né 

Appun ba:ridé 

Jarkub-jarrabla pundung appuné,

Lígangé a:la.

Doksiri দকচিৰি, মাৰ্চ, ২০২৫